ວັນທີ 23 ມິຖຸນານີ້ຕາມເວລາທ້ອງຖິ່ນ, ອັງກິດເລີ່ມລົງປະຊາມະຕິທົ່ວປວງຊົນກ່ຽວກັບການຖອນ ຫຼື ການສືບຕໍ່ຢູ່ໃນສະຫະພາບເອີຣົບ ໂດຍໜ່ວຍປ່ອນບັດທົ່ວປະເທດດັ່ງກ່າວໄດ້ເປີດຫີບບັດແຕ່ເວລາ 7:00 ໂມງເປັນຕົ້ນໄປ ໃຫ້ຜູ້ມີສິດເລືອກຕັ້ງຕັດສິນໃຈວ່າ "ອັງກິດຈະສືບຕໍ່ຢູ່ ຫຼື ຈະຖອນອອກຈາກສະຫະພາບເອີຣົບ".
ຄະນະກຳມະການເລືອກຕັ້ງອັງກິດເປີດເຜີຍຂໍ້ມູນກ່ອນການປ່ອນບັດ 2 ມື້ ໂດຍສະແດງໃຫ້ເຫັນວ່າ, ມີປະຊາຊົນຜູ້ມີສິດເລືອກຕັ້ງເກືອບ 46 ລ້ານ 5 ແສນຄົນ ເຊິ່ງເປັນສະຖິຕິໃໝ່ໃນປະຫວັດສາດ, ຂະນະທີ່ຜົນການຢັ່ງສຽງຊີ້ໃຫ້ເຫັນວ່າ, ຝ່າຍໃຫ້ສືບຕໍ່ຢູ່ກັບຝ່າຍໃຫ້ຖອນອອກຈາກສະຫະພາບເອີຣົບມີອັດຕາໄລ່ເລຍກັນ.
ຄະນະກຳມະການເລືອກຕັ້ງອັງກິດຊີ້ວ່າ: ຄາດວ່າການປ່ອນບັດຈະສິ້ນສຸດລົງໃນເວລາ 22:00 ໂມງຂອງມື້ດັ່ງກ່າວ, ຈາກນັ້ນ, ໜ່ວຍປ່ອນບັດຕ່າງໆກໍຈະເລີ່ມນັບບັດທັນທີ ແລະຈະແຈ້ງຜົນໃນຕອນເຊົ້າວັນທີ 24 ມິຖຸນານີ້ຕາມເວລາທ້ອງຖິ່ນ.