ຂປລ. ຄະນະຜູ້ແທນ ສະມາຄົມນັັກຂ່າວ ທົ່ວປະເທດຈີນ ນໍາໂດຍ ທ່ານ ປັນກັງ ຄະນະບໍລິຫານງານ ບັນນາທິການອາວຸໂສ ຂອງສະມາຄົມນັກຂ່າວ ທົ່ວປະເທດຈີນ ພ້ອມຄະນະ ຢ້ຽມຢາມ ແລະ ພົບປະທ່ານ ສູນທອນ ຄັນທະວົງ ຫົວໜ້າອໍານວຍການໃຫຍ່ ຂ່າວສານປະເທດລາວ ໃນວັນທີ 28 ມິຖຸນາ 2016 ທີ່ນະຄອນຫລວງວຽງຈັນ, ເພື່ອເພີ່ມທະວີ ສາຍພົວພັນການຮ່ວມມື ແລກປ່ຽນບົດຮຽນ ຮ່ວມກັນ ລະຫວ່າງ ຂ່າວສານປະເທດລາວ ແລະ ສະມາຄົມນັກຂ່າວ ທົ່ວປະເທດຈີນ ໃນຕໍ່ໜ້າ.
ທ່ານ ສູນທອນ ຄັນທະວົງ ຫົວໜ້າອໍານວຍການໃຫຍ່ ຂ່າວສານປະເທດລາວ ໄດ້ສະແດງຄວາມຊົມເຊີຍ, ຍີນດີຕ້ອນຮັບ ຄະນະຜູ້ແທນດັ່ງກ່າວ ຢ່າງອົບອຸ່ນ ໃນໂອກາດເດີນທາງ ມາຢ້ຽມຢາມ ແລະ ເຮັດວຽກຢູ່ ສປປ ລາວ ເປັນເວລາຫລາຍວັນ. ພ້ອມກັນນີ້ ຫົວໜ້າອໍານວຍການໃຫຍ່ ຂ່າວສານປະເທດລາວ ກໍໄດ້ແຈ້ງໃຫ້ຄະນະ ຜູ້ແທນຮັບຊາບວ່າ: ຂ່າວສານປະເທດລາວ ມີປະຫວັດຄວາມເປັນມາ ຍາວນານ ແລະ ໄດ້ກໍ່ຕັ້ງຂຶ້ນໃນວັນທີ 6 ມັງກອນ 1968 ມີພະນັກງານພຽງ 5-6 ຄົນ, ໂດຍຜ່ານຜ່າອຸປະສັກນາໆປະການ ໃນສະໄໝຕໍ່ສູ້ກູ້ຊາດ. ປັດຈຸບັນ ມີພະນັກງານເກືອບ 100 ຄົນ ແລະ ມີຫລາຍຜະລິດພັນ ເຊັ່ນ: ໃບຂ່າວ, ໜັງສືພິມປະເທດລາວ, ໜັງສືພິມ KPL News, ວາລະສານ, ເວບໄຊ, ເຟສບຸກ ເຊິ່ງກາຍເປັນ ກະບອກສຽງສໍາຄັນ ໃນການປະກອບສ່ວນເຂົ້າໃນ ການສ້າງສາ ພັດທະນາປະເທດຊາດ, ໂຄສະນາເຜີຍແຜ່ ແນວທາງນະໂຍບາຍ ຂອງພັກ-ລັດຖະບານ, ກົດໝາຍ-ນິຕິກໍາ, ການຄ້າ, ການລົງທຶນ, ປະກົດການຫຍໍ້ ແລະ ອື່ນໆ ເພື່ອຮັບປະກັນ ໃຫ້ປະຊາຊົນລາວ ບັນດາເຜົ່າ, ທັງແຂກພາຍໃນ, ຕ່າງປະເທດ ແລະ ຜູ້ປະກອບອື່ນໆ ໄດ້ມີຄວາມເຂົ້າໃຈເລິກເຊິ່ງ ຢ່າງຖືກຕ້ອງ.
ປັດຈຸບັນ ຂ່າວສານປະເທດລາວ ໄດ້ມີການຮ່ວມມື ກັບບັນດາອົງການຈັດຕັ້ງ ສື່ມວນຊົນປະເທດເພື່ອບ້ານ ແລະ ຕ່າງປະເທດ ເປັນຕົ້ນ: ສໍານັກຂ່າວຫວຽດນາມ, ສໍານັກຂ່າວຊິນຫົວ, ໜັງສືພິມ ປະຊາຊົນຈີນ, ວິທະຍຸສາກົນ ແຫ່ງປະເທດຈີນ, ສໍານັກຂ່າວ ກຽວໂດຂອງຍີ່ປຸ່ນ ແລະ ອື່ນໆ. ແຕ່ແນວໃດກໍດີ ຜ່ານການຮ່ວມມື ຕົວຈິງເຫັນວ່າ ຍັງບໍ່ທັນໜັກແໜ້ນ ເທົ່າທີ່ຄວນ ສ່ວນໃຫຍ່ແມ່ນ ໄດ້ແລກປ່ຽນດ້ານຂໍ້ມູນຂ່າວສານ ແລະ ໃນອະນາຄົດຫວັງວ່າ ການຮ່ວມມືໄລຍະໃໝ່ ຄວນເປັນຮູບປະທໍາ ຫລາຍຂຶ້ນ ເຊັ່ນ: ການແລກປ່ຽນທາງ ດ້ານວິຊາການ, ການກໍ່ສ້າງບຸກຄະລາກອນ ໄລຍະສັ້ນ-ໄລຍະຍາວ, ຝຶກອົບຮົມ ໃຫ້ພະນັກງານ ເພື່ອສ້າງຄວາມເຂັ້ມແຂງ ທາງດ້ານວິຊາການ, ການຊ່ວຍເຫລືອ ດ້ານເຕັກນິກ-ອຸປະກອນຮັບໃຊ້ ແລະ ອື່ນໆ.
ພ້ອມດຽວກັນນີ້ ທ່ານ ປັນກັງ ຄະນະບໍລິຫານງານ ບັນນາທິການອາວຸໂສ ຂອງສະມາຄົມນັກຂ່າວ ທົ່ວປະເທດຈີນ ກໍໄດ້ສະແດງ ຄວາມຂອບໃຈຕໍ່ທ່ານ ຫົວໜ້າອໍານວຍການໃຫຍ່ ຂ່າວສານປະເທດລາວ ທີ່ໃຫ້ການຕ້ອນຮັບ ອັນອົບອຸ່ນ ແລະ ຈະນໍາເອົາ ເນື້ອໃນຈິດໃຈ, ບົດຮຽນ, ຄວາມຄິດເຫັນ ໄປປຶກສາຫາລື ພິຈາລະນາ ເພື່ອຊອກຫາຊ່ອງທາງ ໃນການຮ່ວມມືກັນ ໃນອະນາຄົດ ໂດຍສະເພາະ ແມ່ນແລກປ່ຽນການຢ້ຽມຢາມ ຂອງຄະນະຜູ້ແທນ ສອງຝ່າຍ, ໃຫ້ການຊ່ວຍເຫລືອ ຝຶກອົບຮົມ ທາງດ້ານວິຊາການ ແລະ ແລກປ່ຽນວິຊາການ ໄປປະຈໍາການ ຢູ່ປະເທດຈີນ ແລະ ອື່ນໆ.
