ຂ່າວສານຊິນຮວາລາຍງານວ່າ: ວັນທີ 29 ມິຖຸນານີ້, ທ່ານຈອນ ເບຣັນນານ ຫົວໜ້າອົງການສືບຂ່າວລັບອາເມລິກາໄດ້ເຕືອນວ່າ: ບໍ່ສາມາດປະຕິເສດຄວາມເປັນໄປໄດ້ຢ່າງເດັດຂາດວ່າປະເທດຕົນຈະບໍ່ຖືກຫຼອນໂຈມຕີແບບກໍ່ການຮ້າຍຫຼັງເຫັນວ່າ: ກຸ່ມຫົວຮຸນແຮງ "ລັດອິສລາມ"ຫຼືISກຳລັງຫາຊ່ອງທາງກໍ່ເຫດຫຼອນໂຈມຕີແບບກໍ່ການຮ້າຍເໝືອນດັ່ງເຫດລະເບີດທີ່ເກີດຂຶ້ນຢູ່ສະໜາມບິນສາກົນອາຕາເຕີກເມືອງອິສຕັນບູນ.
ທ່ານເບຣັນນານກ່າວໃນໂອກາດເຂົ້າຮ່ວມກິດຈະກຳຂອງສະພາການຕ່າງປະເທດອາເມລິກາໃນວັນດັ່ງກ່າວວ່າ: ກຸ່ມISໄດ້ກໍ່ການຫຼອນໂຈມຕີແບບກໍ່ການຮ້າຍຕ່າງໆຢູ່ເຂດຕາເວັນອອກກາງລວມທັງເຂດແຄວ້ນອື່ນໆໃນໂລກທັງທາງກົງແລະທາງອ້ອມ, ພ້ອມທັງໂຄສະນາປຸກປັ່ນໂດຍຮຽກຮ້ອງໃຫ້ກໍ່ເຫດຈູ່ໂຈມດ່ຽວແບບກອງຫຼອນຫຼື "lone wolf"ຕໍ່ອາເມລິກາ. ຈາກນີ້ຕົນຈິ່ງຄັດຄ້ານທຸກທັດສະນະທີ່ວ່າ ອາເມລິກາຈະບໍ່ເກີດເຫດຫຼອນໂຈມຕີແບບກໍ່ການຮ້າຍຢ່າງເດັດຂາດຫຼື ກຸ່ມISບໍ່ມີແຜນຈະຫຼອນໂຈມຕີອາເມລິກາ.
ທ່ານເບຣັນນານກ່າວຕື່ມວ່າ: ປັດຈຸບັນ, ມີຄວາມເປັນໄປໄດ້ໜ້ອຍລົງທີ່ກຸ່ມກໍ່ການຮ້າຍຈະເລັດລອດເຂົ້າດິນແດນອາເມລິກາ, ແຕ່ການທີ່ກຸ່ມISຮູ້ນຳໃຊ້ເຕັກໂນໂລຊີການສື່ສານກັນດ້ວຍວິທີປິດລັບນັ້ນເປັນສິ່ງທີ່ໜ້າວິຕົກກັງວົນທີ່ສຸດ.