ວັນທີ 29 ມິຖຸນານີ້ ຢູ່ຫໍສະພາປະຊາຊົນແຫ່ງຊາດນະຄອນຫຼວງປັກກິ່ງ, ທ່ານ ສີຈິ້ນຜິງ ປະທານປະເທດຈີນໄດ້ພົບປະກັບທ່ານ ຮວາງກຽວອັນ ນາຍົກລັດຖະມົນຕີ ສ.ເກົາຫຼີ.
ທ່ານ ສີຈິ້ນຜິງ ກ່າວວ່າ: ປັດຈຸບັນ, ສາຍພົວພັນລະຫວ່າງຈີນ-ສ.ເກົາຫຼີ ໄດ້ສືບຕໍ່ຮັກສາທ່າອ່ຽງແຫ່ງການພັດທະນາ. ການພົວພັນຄູ່ຮ່ວມມືຍຸດທະສາດລະຫວ່າງສອງຝ່າຍໄດ້ພັດທະນາແລະກ້າວເຂົ້າສູ່ລວງເລິກຢ່າງບໍ່ຢຸດຢັ້ງ, ຜົນການປະຕິບັດສັນຍາການຄ້າເສລີພວມມີທ່ວງທ່າທີ່ຕັ້ງໜ້າ,ສອງຝ່າຍໄດ້ຮັກສາການຕິດຕໍ່ພົວພັນແລະການປະສານງານໃນວຽກງານສາກົນຢ່າງແໜ້ນແຟ້ນແລະຫວັງວ່າສອງຝ່າຍສາມາດຈັດຕັ້ງປະຕິບັດຄວາມຮັບຮູ້ຕ່າງໆທີ່ຕົນກັບປະທານາທິບໍດີ ປັກກິນແຮ ຕົກລົງກັນນັ້ນ ຈະຊຸກຍູ້ການພົວພັນລະຫວ່າງສອງຝ່າຍໃຫ້ມີຄວາມຄືບໜ້າຢ່າງບໍ່ຢຸດຢັ້ງ.
ທ່ານ ສີຈິ້ນຜິງ ກ່າວຕື່ມວ່າ: ຈີນແລະ ສ.ເກົາຫຼີ ຄວນສືບຕໍ່ສຸມໃສ່ການບັນລຸການປອດນິວເຄລຍຂອງແຫຼມເກົາຫຼີ, ພ້ອມກັນປົກປັກຮັກສາສັນຕິພາບແລະສະຖຽນລະພາບຂອງ ແຫຼມເກົາຫຼີ, ພະຍາຍາມຊຸກຍູ້ການແກ້ໄຂບັນຫາລະຫວ່າງບັນດາຝ່າຍທີ່ກ່ຽວຂ້ອງໂດຍຜ່ານການປຶກສາຫາລືແລະການເຈລະຈາ. ຫວັງວ່າ ສ.ເກົາຫຼີ ຈະໃຫ້ຄວາມສຳຄັນເຖິງຄວາມເປັນຫ່ວງ ຕໍ່ຄວາມໝັ້ນຄົງຂອງຈີນຢ່າງເໝາະສົມ, ແກ້ໄຂບັນຫາທີ່ອາເມລິກາຈະຕິດຕັ້ງລະບົບຕ້ານລູກສອນໄຟນຳວິຖີຢູ່ ສ.ເກົາຫຼີ ຢ່າງເໝາະສົມແລະຮອບຄອບ.
ທ່ານ ຮວາງກຽວອັນ ຍັງໄດ້ຝາກຄວາມຢື້ຢາມຖາມຂ່າວຢ່າງອົບອຸ່ນຂອງທ່ານ ປັກກິນແຮ ມາຍັງທ່ານ ສີຈິ້ນຜິງ ແລະ ກ່າວວ່າ: ສ.ເກົາຫຼີ ຍິນດີຮ່ວມກັບຈີນພະຍາຍາມເຮັດໃຫ້ຜົນແຫ່ງການຮ່ວມມືລະຫວ່າງສອງຝ່າຍໃນຂົງເຂດຕ່າງໆສອດຄ່ອງກັບລະດັບການພັດທະນາແລະການພົວພັນລະຫວ່າງສອງປະເທດໃນປັດຈຸບັນຢ່າງເຕັມສ່ວນ.
 |
