ຕາມຂ່າວ CRI ລາຍງານວ່າ: ຕອນບ່າຍວັນທີ 30 ມິຖຸນາຜ່ານມາ, ສູນວັດທະນະທຳຈີນລາວທີ່ນະຄອນຫຼວງວຽງຈັນໄດ້ຈັດຕັ້ງການສຳມະນາພາຍໃຕ້ຫົວຂໍ້ "ການໄປມາຫາສູ່ກັນຢ່າງມີໄມຕີຈິດມິດຕະພາບຈີນ-ລາວ"ເພື່ອສະເຫຼີມສະຫຼອງວັນສ້າງຕັ້ງພັກກອມມູນິດຈີນຄົບຮອບ 95 ປີໂດຍທ່ານຫົງຈ່ຽງ ຫົວໜ້າພະແນກການເມືອງຂອງສະຖານທູດຈີນປະຈຳລາວ, ອົງການຈັດຕັ້ງຊາວຈີນແລະຄົນລາວເຊື້ອສາຍຈີນ, ນັກທຸ ລະກິດຈີນ, ອາສາສະໝັກຈີນ, ຄູອາຈານແລະນັກສຶກສາຈີນຢູ່ປະເທດລາວພ້ອມດ້ວຍຜູ້ຕາງໜ້າຂະແໜງການສຶກສາແລະວັດທະນະທຳລາວ 100 ກວ່າຄົນເຂົ້າຮ່ວມ.
ໂອກາດດັ່ງກ່າວ,ທ່ານສຸກທະວີ ແກ້ວລາ ເຈົ້າໜ້າທີ່ການທູດອາວຸໂສຂອງລາວ, ທ່ານຢົງຈົ່ງເຊຍ ຫົວໜ້າສຳນັກຂ່າວສານຊິນຮວາສາຂາວຽງຈັນໄດ້ປະກອບຄຳເຫັນໃນຫົວຂໍ້ "ການໄປມາຫາສູ່ກັນຢ່າງມີໄມຕີຈິດມິດຕະພາບ". ຂະນະດຽວກັນ,ທັງສອງທ່ານຍັງໄດ້ປຶກສາຫາລືແລກປ່ຽນຄຳເຫັນກັບຜູ້ເຂົ້າຮ່ວມສຳມະນາຕໍ່ການສົ່ງເສີມມິດຕະພາບແລະການແລກປ່ຽນລະຫວ່າງປະຊາຊົນສອງຊາດພ້ອມທັງການຮ່ວມມືຕາມຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ".
ທ່ານເຈ້ສ້ຽວຮວາ ຫົວໜ້າສູນວັດທະນະທຳຈີນລາວຢືນຢັນວ່າ: ສາຍພົວພັນມິດຕະພາບລະຫວ່າງສອງປະເທດຈີນ-ລາວແມ່ນຜູ້ນຳຮຸ່ນອາວຸໂສຂອງສອງປະເທດໄດ້ຮ່ວມກັນສ້າງຕັ້ງ,ຖະທຸຖະໜອມແລະໄດ້ຜ່ານການທົດສອບຈາກການຜັນແປຂອງສະຖານະການສາກົນແລະສະພາບການພາຍໃນແຕ່ລະປະເທດ. ໃນການຕໍ່ສູ້ປະຕິວັດອັນຍາວນານແລະພາລະກິດກໍ່ສ້າງສັງຄົມນິຍົມ, ປະຊາຊົນສອງຊາດໄດ້ຊ່ວຍເຫຼືອ, ສະໜັບສະໜູນກັນແລະຜູກແໜ້ນມິດໄມຕີອັນເລິກເຊິ່ງ. ເນື່ອງໃນໂອກາດວັນສ້າງຕັ້ງພັກກອມມູນິດຈີນຄົບຮອບ 95 ປີໃນປີນີ້, ພວກເຮົາໄດ້ຮ່ວມກັນຫວນຄືນປະຫວັດການໄປມາຫາສູ່ກັນຢ່າງມີໄມຕີຈິດມິດຕະພາບລະຫວ່າງສອງປະເທດ, ລະນຶກເຖິງຄຸນງາມຄວາມດີອັນຍິ່ງໃຫຍ່ຂອງຜູ້ນຳອາວຸໂສຈີນ-ລາວ, ເບິ່ງອະນາຄົດແຫ່ງການໄປມາຫາສູ່ກັນຢ່າງມີໄມຕີຈິດມິດຕະພາບແລະການຮ່ວມມືລະຫວ່າງສອງປະເທດຢ່າງສົດໃສແລະມີຄວາມໝາຍພິເສດ.
 |
