ກ່ອນໜ້ານີ້ ຄືໃນວັນທີ 1 ກໍລະກົດ 1921, ພັກ ກອມມູນິດຈີນ ໄດ້ຮັບການສ້າງຕັ້ງຂື້ນ ເຊິ່ງມາຮອດ ວັນທີ 1 ກໍລະກົດ 2016 ກໍພໍດີ ຄົບຮອບ 95 ປີ. ໃນໂອກາດອັນສະຫງ່າລາສີ ແລະ ມີຄວາມໝາຍນີ້, ປະຊາຊົນລາວ ບັນດາເຜົ່າ ຂໍສະແດງຄວາມຊົມເຊີຍ ຖານສະຫາຍອ້າຍນ້ອງທີ່ສະໜິດສະໜົມ ແລະ ອວຍພອນໄຊອັນປະເສິດມາຍັງ ພັກກອມມູນິດ ຈີນ ແລະ ປະຊາຊົນຈີນອ້າຍນ້້ອງຈົ່ງໝັ້ນຄົງຊົ່ວກາລະນານ ແລະ ຍາດໄດ້ ໄຊຊະນະນັບມື້ນັບໃຫຍ່ຫຼວງໃນພາລະກິດສ້າງປະເທດສັງຄົມນິຍົມທີ່ທັນສະໄໝຮັ່ງມີເຂັ້ມແຂງ, ປະຊາທິປະໄຕ, ສີວິໄລ ແລະ ກົມກຽວປອງດອງ.
ຕະຫຼອດ 95 ປີ ຜ່ານມາພາຍໃຕ້ການນຳພາຂອງພັກກອມມູນິດຈີນ, ກອງທັບ ແລະ ປະຊາຊົນຈີນອ້າຍນ້ອງໄດ້ຕໍ່ສູ້ຢ່າງພິລະອາດຫານຕ້ານຈັກກະພັດຜູ້ຮຸກຮານໃນເມື່ອກ່ອນ, ນຳພາການປະຕິຮູບ ແລະ ເປີດປະຕູສູ່ພາຍນອກໄດ້ຮັບຜົນສຳເລັດຢ່າງໃຫຍ່ຫຼວງເຊິ່ງເຮັດໃຫ້ລັກສະນະດີເລີດຂອງສັງຄົມນິຍົມພັົ້ນເດັ່ນຂື້ນ, ການເມືອງມີສະຖຽນລະພາບ, ເສດຖະກິດຂະຫຍາຍຕົວໄວ ແລະ ໝັ້ນທ່ຽງ, ສັງຄົມມີຄວາມສະຫງົບປອດໄພ ແລະ ຊີວິດການເປັນຢູ່ຂອງປະຊາຊົນໄດ້ຮັບການປັບປຸງດີຂຶ້ນເລື້ອຍໆ ອັນໄດ້ສ້າງວັດຖຸປັດໄຈໃຫ້ແກ່ການສ້າງລະບອບສັງຄົມນິຍົມຕາມສີສັນ ແລະ ຈຸດພິເສດຂອງ ສ ປ ຈີນ ນັບມື້ນັບໄດ້ຮັບການເຊີດຊູຂື້ນໃນເວທີພາກພື້ນ ແລະ ສາກົນ.ປະຊາຊົນລາວບັນດາເຜົ່າຂໍສະແດງຄວາມຊົມເຊີຍຕໍ່ຜົນສຳເລັດອັນໃຫຍ່ຫຼວງຂອງປະຊາຊົນຈີນອ້າຍນ້ອງຢ່າງສຸດໃຈ. ລາວ ແລະ ຈີນ ລ້ວນແຕ່ເປັນປະເທດສັງຄົມນິຍົມ ທີ່ນຳພາໂດຍພັກກອມມູນິດ, ມີອຸດົມການທີ່ສອດຄ່ອງກັນ, ມີອະນາຄົດຊະຕາກຳກ່ຽວພັນກັນ ແລະ ມີເສັ້ນທາງແຫ່ງ ການພັດທະນາທີ່ຄ້າຍຄືກັນ ເຊິ່ງແມ່ນພື້ນຖານການເມືອງທີ່ສໍາຄັນ ໃນການພັດທະນາສາຍພົວພັນ ລາວ-ຈີນໂດຍການກຳແໜ້ນທິດທາງການເສີມຂະຫຍາຍສາຍພົວພັນແລະຍຶດໝັ້ນການຊຸກຍູ້ການຮ່ວມມືທີ່ເປັນຮູບປະທຳໃນຂົງເຂດຕ່າງໆ, ເພີ່ມທະວີການປະສານສົມທົບ ໃນກິດຈະການພາກພື້ນ ແລະ ສາກົນ, ເສີມຂະຫຍາຍມິດຕະພາບທີ່ດີ ລະຫວ່າງ ປະຊາຊົນສອງຊາດໃຫ້ໜັກແໜ້ນ, ຊຸກຍູ້ສາຍພົວພັນ ລາວ-ຈີນ ໃຫ້ໄດ້ຮັບຜົນສຳເລັດອັນອຸດົມສົມບູນຢ່າງບໍ່ຢຸດຢັ້ງ ແລະ ກາຍເປັນມໍລະດົກອັນລ້ຳຄ່າລວມ ຂອງ ສອງພັກ, ສອງລັດ ລາວ-ຈີນ. ໃນໂອກາດເດີນທາງຢ້ຽມຢາມ ສປ ຈີນ ຂອງ ທ່ານ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງ ພັກປະຊາຊົນ ປະຕິວັດລາວ, ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ເມື່ອຕັົ້ນເດືອນ ພຶດສະພາ ຜ່ານມາ, ການນຳສອງປະເທດໄດ້ຢືນຢັນວ່າ:ລາວ-ຈີນ ໃນຖານະເປັນປະເທດສັງຄົມນິຍົມ, ເປັນຄູ່ຮ່ວມຊະຕາກຳ ທີ່ມີຄວາມໝາຍຍຸດທະສາດ ຈະສືບຕໍ່ຢຶດໝັ້ນການພົວພັນຕາມທິດນຳໝັ້ນຄົງຍາວນານ, ໄວ້ເນື້ອເຊື່ອໃຈກັນ, ຮ່ວມມືຮອບດ້ານ ບົນຈິດໃຈຂອງການເປັນບ້ານໃກ້ເຮືອນຄຽງທີ່ດີ, ເພື່ອນມິດທີ່ດີ, ສະຫາຍທີ່ດີ ແລະ ຄູ່ຮ່ວມມືທີ່ດີ; ລົງເລິກການຮ່ວມມືແລກ ປ່ຽນໃນຂົງເຂດຕ່າງໆຢ່າງຮອບດ້ານ, ຊຸກຍູ້ສາຍພົວພັນແບບຄູ່ຮ່ວມຍຸດທະສາດຮອບດ້ານ ລາວ-ຈີນ ທີ່ຕ່າງຝ່າຍຕ່າງມີຜົນປະໂຫຍດ, ຊ່ວຍເຫລືອກັນ ແລະ ເຊື່ອໝັ້ນກັນຢ່າງສູງນັ້ນ ໃຫ້ກ້າວສູ່ລະດັບໃໝ່ຢ່າງບໍ່ຢຸດຢັ້ງ, ປະກອບສ່ວນສໍາຄັນເຂົ້າໃນການປົກປັກຮັກສາສັນຕິພາບ, ສະຖຽນລະພາບ, ຄວາມຈະເລີນຮຸ່ງເຮືອງ ແລະ ການພັດທະນາໃນພາກພື້ນ ແລະ ໃນໂລກ.
ປະຊາຊົນລາວບັນດາເຜົ່າຂໍສະແດງຄວາມຊົມເຊີຍຢ່າງສຸດໃຈ ແລະ ເຊື່ອໝັ້ນວ່າພາຍໃຕ້ການນຳ ພາອັນໜັກແໜ້ນ ຂອງ ພັກກອມມູນິດຈີນ, ປະຊາຊົນຈີນ ຈະປະສົບຜົນສຳເລັດ ໃນການສ້າງສັງຄົມອີ່ມໜຳສຳລານຮອບດ້ານ, ການລົງເລິກປະຕິຮູບຮອບດ້ານ, ການປົກຄອງລັດດ້ວຍກົດໝາຍຮອບດ້ານ ແລະ ການຄຸ້ມຄອງພັກຢ່າງເຂັ້ມງວດຮອບດ້ານ; ບັນລຸເປົ້າໝາຍການສ້າງປະເທດສັງຄົມນິຍົມທີ່ທັນສະໄໝ, ຮັ່ງມີເຂັ້ມແຂງ, ປະຊາທິປະໄຕ, ສີວິໄລ ແລະ ກົມກຽວປອງດອງ. ຂໍອວຍພອນໃຫ້ສາຍພົວພັນມິດຕະພາບ,ຄວາມສາມັກຄີຖານສະຫາຍອ້າຍນ້ອງ, ການຮ່ວມມືຮອບດ້ານທີ່ເປັນມູນເຊື້ອ ແລະ ການເປັນຄູ່ຮ່ວມມືແບບຍຸດທະສາດຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຈີນຈົ່ງໝັ້ນຄົງຂະໜົງແກ່ນ ແລະ ແຕກດອກອອກຜົນຍິ່ງໆຂຶ້ນ.