ໜັງສືພິມປະຊາຊົນລາຍວັນຫຼືເຢິນມິນຢື້ປ້າວຂອງຈີນລາຍງານວ່າ: ນັບແຕ່ຟີລິບປິນສະເໜີໃຫ້ສານອະນຸຍາໂຕຕຸລາການຕັດສິນບັນຫາທະເລຈີນໃຕ້ພຽງຝ່າຍດຽວແຕ່ເດືອນມັງກອນ 2013 ມານີ້, ນັກວິຊາການແລະຊ່ຽວຊານກົດໝາຍລະຫວ່າງຊາດຂອງຫຼາຍປະເທດແລະເຂດແຄວ້ນໄດ້ເຫັນເປັນເອກະພາບກັນໃນເວລາໃຫ້ສຳພາດວ່າ: ຄະດີດັ່ງກ່າວນີ້ໄດ້ເຮັດໃຫ້ກົດໝາຍລະຫວ່າງຊາດສູນເສຍຄວາມທ່ຽງທຳແລະຍຸຕິທຳແລະໄດ້ທຳລາຍລະບຽບການຄວາມໝັ້ນຄົງແລະກົນໄກສົນທະນາໃນພາກພື້ນ.ຈາກນີ້ຈິ່ງຖືວ່າອາດຈະເປັນໄພຂົ່ມຂູ່ອັນໜັກໜ່ວງຕໍ່ຄວາມສົມບູນແລະຄວາມສັກສິດຂອງສົນທິສັນຍາວ່າດ້ວຍກົດໝາຍທະເລຂອງອົງການສະຫະປະຊາຊາດ.
ທ່ານນາງນາທາລີ ເຄລອິນ ສາສະດາຈານວິທະຍາໄລນິຕິສາດມະຫາວິທະຍາໄລແມັກໂຄຣີອົສຕລາລີຢືນຢັນວ່າ ຕາມສົນທິສັນຍາວ່າດ້ວຍກົດໝາຍທະເລຂອງອົງການສະຫະປະຊາຊາດແລ້ວ, ສານອະນຸຍາໂຕຕຸລາການບໍ່ມີສິດຄຸ້ມຄອງໃນການຕັດສິນຄະດີບັນຫາທະເລຈີນໃຕ້ທີ່ສະເໜີໂດຍຟີລິບປິນ, ເນື່ອງຈາກວ່າສົນທິສັນຍາດັ່ງກ່າວບໍ່ໄດ້ມອບສິດໃຫ້ສານອະນຸຍາໂຕຕຸລາການແກ້ໄຂຂໍ້ຂັດແຍ້ງທີ່ກ່ຽວພັນເຖິງອະທິປະໄຕໃດໆ ແລະກໍບໍ່ໄດ້ມອບສິດໃຫ້ສານດັ່ງກ່າວແກ້ໄຂຄວາມຂັດແຍ້ງລະຫວ່າງເສັ້ນຊາຍແດນຫຼືຕັດສິນໃຫ້ປະເທດໃດໜຶ່ງຂີດແບ່ງເສັ້ນຊາຍແດນທາງທະເລ.
ສາສະດາຈານວິຊາລັດຖະທຳມະນູນໂປເຕີ ສະຕິວເຕີຂອງວິທະຍາໄລນິຕິສາດມະຫາວິທະຍາໄລເຢວສະຫະລັດອາເມລິກາຢືນຢັນວ່າສານອະນຸຍາໂຕຕຸລາການບໍ່ເອົາຫົວໃສ່ໃຈຊາເຖິງຄວາມເປັນຈິງກ່ຽວກັບທາດແທ້ຂອງຂໍ້ຂັດແຍ້ງຢູ່ທະເລຈີນໃຕ້ລະຫວ່າງຈີນ-ຟີລິບປິນແມ່ນບັນຫາກ່ຽວກັບອະທິປະໄພດ້ານດິນແດນແລະການຂີດແບ່ງເສັ້ນຊາຍແດນທາງທະເລໂດຍຂືນປະຕິບັດການຕັດສິນໂດຍສານອະນຸຍາໂຕຕຸລາການ ເຊິ່ງທາດແທ້ແລ້ວ, ເປັນການກະທຳທີ່ລະເມີດສົນທິສັນຍາວ່າດ້ວຍກົດໝາຍທະເລຂອງອົງການສະຫະປະຊາຊາດທີ່ໄດ້ມອບສິດໃຫ້ປະເທດພາຄີໝູນໃຊ້ສິດຄັດເລືອກເພື່ອປະຕິເສດຂໍ້ຂັດແຍ້ງພິເສດ.
ທ່ານຮາຊັນ ຈາວິດ ຫົວໜ້າສູນຄົ້ນຄວ້າຈີນຂອງມະຫາວິທະຍາໄລວິທະຍາສາດເຕັກໂນໂລຊີແຫ່ງຊາດປາກິສະຖານ ອະດີດເອກອັກຄະລັດຖະທູດປາກິສະຖານປະຈຳເຢຍລະມັນເຫັນວ່າ: ການທີ່ສານອະນຸຍາໂຕຕຸລາການບັງຄັບເອົາສົນທິສັນຍາວ່າດ້ວຍກົດໝາຍທະເລຂອງອົງການສະຫະປະຊາດໃຫ້ຢູ່ເໜືອຂອບສົນທະນາສັນຕິພາບໃນປັດຈຸບັນທີ່ໄດ້ຮັບການປົກປ້ອງຈາກກົດໝາຍລະຫວ່າງຊາດນັ້ນເປັນການທຳລາຍກົດໝາຍລະຫວ່າງຊາດແລະສ້າງຜົນເສຍຫາຍໃຫ້ແກ່ກົນໄກສົນທະນາສັນຕິພາບໃນພາກພື້ນແລະນີ້ຄືການຂະຫຍາຍແລະການໃຊ້ສິດຢ່າງຜິດກົດໝາຍ.
 |
