ຕາມຂ່າວສານຊິນຮວາ: ວັນທີ 4 ກໍລະກົດນີ້ຢູ່ນະຄອນຫຼວງມົສກູປະເທດຣັດເຊຍ, ໄດ້ຈັດພິທີສຳເລັດການກໍ່ສ້າງຫໍພິພິທະພັນປະຈຳສະຖານທີ່ຈັດກອງປະຊຸມຜູ້ແທນທົ່ວປະເທດຄັ້ງທີ 6 ຂອງພັກກອມມູນິດຈີນໂດຍທ່ານ ສິຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນ, ປະທານປະເທດ, ປະທານຄະນະກຳມະການການທະຫານສູນກາງຈີນໄດ້ກ່າວອວຍພອນວ່າ, ການທີ່ຫໍພິພິທະພັນດັ່ງກ່າວສ້າງສຳເລັດເປັນໜຶ່ງໃນໝາກຜົນທີ່ສຳຄັນຂອງການພັດທະນາສາຍພົວພັນຄູ່ຮ່ວມມືປະສານງານຍຸດທະສາດຮອບດ້ານ ທັງເປັນອີກໜຶ່ງສັນຍະລັກ ແຫ່ງການຮ່ວມມືມິດຕະພາບລະຫວ່າງຈີນ-ຣັດເຊຍທີ່ໄດ້ພັດທະນາກ້າວເຂົ້າສູ່ລວງເລິກ. ຈາກນີ້ຈຶ່ງເຊື່ອໝັ້ນວ່າຜົນສຳເລັດດັ່ງກ່າວຈະຊຸກຍູ້ໃຫ້ປະຊາຊົນສອງປະເທດບັນທຶກໜ້າໃໝ່ໃສ່ປື້ມປະຫວັດສາດແຫ່ງການຮ່ວມມືມິດຕະພາບລະຫວ່າງສອງປະເທດ.
ທ່ານ ວຼາດີເມຍ ປູຕິນ ປະທານາທິບໍດີຣັດເຊຍກໍໄດ້ກ່າວອວຍພອນວ່່າ, ການສ້າງຫໍພິພິທະພັນດັ່ງກ່າວເພື່ອເປັນການລະນຶກເຫດການສຳຄັນໃນປະຫວັດສາດ ຮ່ວມຂອງຣັດເຊຍ-ຈີນແລະຖືວ່າເປັນຜົນງານທີ່ໄດ້ມາຈາກຄວາມພະຍາຍາມຮ່ວມກັນຂອງຜູ້ຊ່ຽວຊານສອງປະເທດໃນຫຼາຍປີຜ່ານມາ. ແນວໃດກໍດີ, ການອະນຸລັກບູຮານສະຖານຍ່ອມຈະຊຸກຍູ້ສາຍພົວພັນຄູ່ຮ່ວມມືປະສານງານຍຸດທະສາດຮອບດ້ານຣັດເຊຍ-ຈີນເຊິ່ງລວມທັງການຮ່ວມມືວັດທະນະທຳໃຫ້ໄດ້ຮັບການພັດທະນາຢ່າງ ມີຊີວິດຊີວາຕື່ມອີກ.
 |
