ຕາມຂ່າວ CRI: ວັນທີ 5 ກໍລະກົດນີ້ຢູ່ນະຄອນຫຼວງວໍຊິງຕັນປະເທດອາເມລິກາ, ອົງການຫົວກະທິຈີນ-ອາເມລິກາໄດ້ຈັດຕັ້ງການສຳມະນາກ່ຽວກັບບັນຫາທະເລຈີນໃຕ້ໂດຍປຶກສາຫາລື 3 ຫົວຂໍ້ຄື "ບັນຫາທະເລຈີນໃຕ້ໃນມຸມມອງຂອງຈີນແລະອາເມລິກາ" "ການພິຈາລະນາຄວາມຂັດແຍ້ງກັນແລະອະນາຄົດຢູ່ທະເລຈີນໃຕ້ຈາກຫຼາຍແງ່" ແລະ "ແນວຄິດແລະຂໍ້ສະເໜີໃນການແກ້ໄຂບັນຫາທະເລຈີນໃຕ້ຢ່າງແທ້ຈິງ".
ທ່ານ ດ້າຍບິງໂກ ອະດີດທີ່ປຶກສາແຫ່ງລັດຈີນໄດ້ກ່າວໃນພິທີໄຂການສຳມະນາດັ່ງກ່າວວ່າ, ຜົນການຕັດສິນບັນຫາທະເລຈີນໃຕ້ທີ່ຈະປະກາດໃນໄວໆນີ້ເປັນພຽງແຕ່ເຈ້ຍທີ່ບໍ່ມີຜົນບັງຄັບໃຊ້ແຕ່ປະການໃດເຊິ່ງມີແຕ່ຈີນເທົ່ານັ້ນທີ່ເປັນຜູ້ຕັດສິນຊາຕາກຳຕໍ່ບັນຫາອະທິປະໄຕດິນແດນແລະກໍຈະບໍ່ຮັບຮອງວິທີການແກ້ໄຂຄວາມຂັດແຍ້ງກັນທີ່ຮ້ອງຂໍນຳຝ່າຍທີ 3 ໃດໆທັງນັ້ນ. ຈາກນີ້ຈຶ່ງຮຽກຮ້ອງໃຫ້ອາເມລິກາຈົ່ງປະຕິບັດຕາມສັນຍາທີ່ບໍ່ເຂົ້າແຄ່ງອອກຂາໃນບັນຫາອະທິປະໄຕດິນແດນທີ່ຕົນໃຫ້ໄວ້ທັງໃຫ້ເຫັນແຈ້ງວ່າເຈດຈຳນົງຫຼືຍຸດທະສາດຂອງຈີນຄືການສ້າງຄວາມຈະເລີນວັດທະນາໂດຍສັນຕິແລະຈີນກໍບໍ່ມີເຈຕະນາແຂ່ງຂັນຍາດແຍ່ງອຳນາດໃດໆ,ຈົ່ງປ່ອຍບັນຫາທະເລຈີນໃຕ້ຢູ່ບ່ອນທີ່ເໝາະສົມສຳລັບສາຍພົວພັນລະຫວ່າງຈີນ-ອາເມລິກາແລະຈົ່ງຢຸດຕິການແຊກແຊງບັນຫາອະທິປະໄຕທີ່ກ່ຽວຂ້ອງກັບທະເລຈີນໃຕ້.
ທ່ານ Brandan S. Mulvaney, ຮອງຫົວໜ້າພະແນກພາສາແລະວັດທະນະທຳຂອງສະຖາບັນກອງທັບເຮືອອາເມລິກາກ່າວວ່າ:
"ເວົ້າລວມແລ້ວ, ການພົວພັນລະຫວ່າງອາເມລິກາກັບຈີນ, ໂດຍສະເພາະແມ່ນການພົວພັນລະຫວ່າງກອງທັບສອງປະເທດ, ໄດ້ປັບປຸງດີຂຶ້ນຫຼາຍແລ້ວ. ແນວໃດກໍດີບັນຫາທະເລຈີນໃຕ້ຈະສືບຕໍ່ກາຍເປັນບັນຫາໜຶ່ງທີ່ເປັນຈຸດສຸມ, ແຕ່ສອງຝ່າຍກໍບໍ່ຄວນກົດໜ່ວງວຽກງານເພື່ອການຮ່ວມມືແລະສ້າງສາຍພົວພັນທີ່ດີກວ່າເກົ່າ. ຂ້າພະເຈົ້າເຫັນວ່າຂໍພຽງແຕ່ພວກຂ້າພະເຈົ້າຍຶດໝັ້ນສົ່ງສັນຍານທີ່ຕັ້ງໜ້າ, ກໍຈະສາມາດຫຼຸດຜ່ອນສະຖານະການທີ່ອາດຈະເກີດຄວາມເຄັ່ງຕຶງໄດ້."
ຂະນະທີ່ນັກວິຊາການຈີນ-ອາເມລິກາທີ່ເຂົ້າຮ່ວມກອງປະຊຸມກໍເຫັນວ່າ: ເນື່ອງຈາກມີຄະດີຕັດສິນບັນຫາທະເລຈີນໃຕ້ຈຶ່ງເຮັດໃຫ້ເລື່ອງນ້ອຍໆນີ້ກາຍເປັນເລື່ອງໃຫຍ່, ແຕ່ແນວໃດກໍດີ, ຜົນການຕັດສິນບັນຫາດັ່ງກ່າວບໍ່ສາມາດສົ່ງຜົນກະທົບທີ່ແທ້ຈິງຕໍ່ສະຖານະການຢູ່ທະເລຈີນໃຕ້.
