ຫວ່າງມໍ່ໆມານີ້, ທ່ານ ລິວເຈີ້ນມິນ ຮອງລັດຖະມົນຕີກະຊວງການຕ່າງປະເທດຈີນ ໄດ້ພິມບົດຄວາມລົງວາລະສານ "ຊິວຊື້" ໂດຍຂຽນວ່າ, ການທີ່ຟິລິບປິນຮ້ອງຂໍຕັດສິນຄະດີທະເລຈີນໃຕ້ ແມ່ນລະຄອນຕະຫຼົກທີ່ເປືອກນອກຄືກົດໝາຍ. ອະທິປະໄຕແລະສິດຜົນປະໂຫຍດທີ່ກ່ຽວຂ້ອງຢູ່ທະເລຈີນໃຕ້ຂອງຈີນ ແມ່ນໄດ້ຮັບໃນຂະບວນການປະຫວັດສາດອັນຍາວນານ ແລະໄດ້ຮັບການປົກປ້ອງຈາກກົດໝາຍສາກົນ ເຊິ່ງລວມທັງ "ສົນທິສັນຍາສະຫະປະຊາຊາດວ່າດ້ວຍກົດໝາຍທະເລ". ການທີ່ຈີນບໍ່ຮັບເອົາການຕັດສິນບັນຫາທະເລຈີນໃຕ້ທີ່ຟິລິບປິນສະເໜີນັ້ນ ຈຶ່ງສອດຄ່ອງກັບກົດໝາຍສາກົນທັງນັ້ນ.
ໃນບົດຄວາມມີບາງຕອນຂຽນວ່າ, ຄະດີຕັດສິນ ໄດ້ປະຕິເສດຄວາມຈິງຕໍ່ສິດຂອງປະເທດທີ່ລົງນາມເລືອກຮູບການແກ້ໄຂຂໍ້ຂັດແຍ້ງກັນຢ່າງເປັນເຈົ້າການ ແລະໄດ້ທຳລາຍລັກສະນະຄົບຖ້ວນຂອງລະບອບແກ້ໄຂຂໍ້ຂັດແຍ້ງກັນຂອງສົນທິສັນຍາດັ່ງກ່າວ. ການກະທຳຂອງສານຕັດສິນພ້ອມດ້ວຍການຕັດສິນໄດ້ລະເມີດຈຸດປະສົງທີ່ຊຸກຍູ້ການແກ້ໄຂຂໍ້ຂັດແຍ້ງກັນໂດຍສັນຕິຂອງສົນທິສັນຍາທັງນັ້ນ ທັງໄດ້ທຳລາຍລັກສະນະຄົບຖ້ວນແລະອິດທິພົນຂອງສົນທິສັນຍາຢ່າງໜັກໜ່ວງ. ສະນັ້ນ ຈຶ່ງບໍ່ມີຄວາມຍຸຕິທຳແລະບໍ່ຊອບດ້ວຍກົດໝາຍ.
ບົດຄວາມຍັງຂຽນວ່າ, ຈີນເຄົາລົບບັນດາປະເທດທີ່ແກ້ໄຂຄວາມຂັດແຍ້ງກັນດ້ວຍສັນຕິວິທີໂດຍຜ່ານຮູບການທີ່ເລືອກເອງບົນພື້ນຖານການປຶກສາຫາລືເຊິ່ງກັນແລະກັນ. ໃນຖານະເປັນປະເທດທີ່ເຊັນ "ສົນທິສັນຍາ" ດັ່ງກ່າວ, ຈີນໄດ້ມີຄວາມພະຍາຍາມຢ່າງຫຼວງຫຼາຍເພື່ອບັນລຸສົນທິສັນຍາດັ່ງກ່າວ ແລະໄດ້ປະຕິບັດຕາມພັນທະຕ່າງໆຂອງສົນທິສັນຍາຕະຫຼອດມາ. ບໍ່ວ່າຄະດີທະເລຈີນໃຕ້ທີ່ຟິລິບປິນສະເໜີນັ້ນ ຜົນການຕັດສິນຈະອອກມາແນວໃດກໍຕາມ, ມັນກໍບໍ່ສາມາດຈຳກັດຈີນ ແລະບໍ່ກະທົບຕໍ່ອະທິປະໄຕແລະສິດຜົນປະໂຫຍດຢູ່ທະເລຈີນໃຕ້ຂອງຈີນຢ່າງແນ່ນອນ.