ຕາມຂ່າວ CRI, ວັນທີ 6 ກໍລະກົດນີ້ ຢູ່ສະຖາບັນຄົ້ນຄວ້າບັນຫາສາກົນລາຊະອານາຈັກອັງກິດ, ທ່ານນາງຟູ້ຢິງ ຫົວໜ້າຄະນະກຳມາທິການການຕ່າງປະເທດຂອງສະພາປະຊາຊົນແຫ່ງຊາດຈີນໄດ້ປາຖະກະຖາຫົວຂໍ້ "ການເສຍລະບຽບກັບການສ້າງລະບຽບຄືນໃໝ່"ໂດຍໄດ້ບັນຍາຍຕື່ມກ່ຽວກັບຂໍ້ຂັດແຍ້ງໃນທະເລຈີນໃຕ້ແລະເປົ້າໝາຍຂອງຈີນຢູ່ທະເລຈີນໃຕ້.
ທ່ານກ່າວວ່າ: ສິດເປັນເຈົ້າໂລກຂອງອາເມລິກາ ຢູ່ບົນພື້ນຖານການຄວບຄຸມຊຸມທາງສຳຄັນທາງທະເລ,ດ້ວຍເຫດນີ້ຈິ່ງກັງວົນທີ່ຈີນດຳເນີນການກໍ່ສ້າງເພື່ອຂະຫຍາຍເກາະແລະຫີນໂສໂຄກຢູ່ທະເລຈີນໃຕ້ຫຼາຍທີ່ສຸດ. ສຳລັບປະເທດຈີນແລ້ວ, ຈຸດໃຈກາງຂອງບັນຫາທະເລຈີນໃຕ້ແມ່ນຂໍ້ຂັດແຍ້ງທີ່ປິ່ນອ້ອມອະທິປະໄຕເໜືອດິນແດນຂອງໝູ່ເກາະນານຊ່າພ້ອມດ້ວຍເຂດທະເລທີ່ກ່ຽວຂ້ອງ. ແຕ່ໃນຊຸມປີມໍ່ໆມານີ້, ການກະທຳຂອງບາງປະເທດຮຽກຮ້ອງສິດອຳນາດອະທິປະໄຕແລະການແຊກແຊງຂອງອາເມລິກາກຳລັງເຮັດໃຫ້ສະຖານະການຢູ່ທະເລຈີນໃຕ້ເກີດການປ່ຽນແປງ. ຄົນຈີນເຊື່ອນັບມື້ນັບຫຼາຍຂຶ້ນວ່າ ອາເມລິກາກຳລັງສະໜັບສະໜູນບາງປະເທດທຳລາຍຜົນປະໂຫຍດຂອງຈີນ. ການວິນິໄສທີ່ຜິດພາດມັກຈະເຮັດໃຫ້ເກີດຜົນຮ້າຍໃນພາຍຫຼັງ, ຖ້າຢາກຫຼຸດອອກຈາກສະພາບອັດຕະຄັດດ້ານຄວາມໝັ້ນຄົງທີ່ເກີດຈາກບັນຫາທະເລຈີນໃຕ້ນັ້ນ, ຈີນແລະອາເມລິກາຄວນໃຫ້ຄວາມກະຈ່າງແຈ້ງກ່ຽວກັບເຈດຈຳນົງຂອງຕົນເພື່ອຫຼີກເວັ້ນບໍ່ໃຫ້ວິນິດໄສຢ່າງຜິດພາດ.
ທ່ານນາງຟູ້ຢິງກ່າວຕື່ມວ່າ: ເປົ້າໝາຍຂອງຈີນຢູ່ທະເລຈີນໃຕ້, ກ່ອນອື່ນແມ່ນການປົກປັກຮັກສາຜົນປະໂຫຍດດ້ານອະທິປະໄຕເຊິ່ງຈຸດນີ້ ຈີນແລະອາເມລິກາບໍ່ຄວນກ້າວສູ່ການແຂ່ງຂັນຍຸດທະສາດທີ່ຕັ້ງພູມສາດ ເພາະວ່າເມື່ອໃດທີ່ເກີດກໍລະນີດັ່ງກ່າວນີ້ແລ້ວ ກໍຍາກທີ່ຈະຫຼີກເວັ້ນ ການຕົກຢູ່ໃນພາວະການຕໍ່ສູ້ໄລຍະຍາວ.