ວັນທີ 5 ກໍລະກົດນີ້ຕາມເວລາທ້ອງຖິ່ນ, ຢູ່ເມືອງ ບາໂຕນ ຣຸເກີ ລັດລູອີເຊຍນາຂອງອາເມລິກາ, ຊາຍຜິວດຳຊື່ Alton Starling ອາຍຸ 37 ປີ ໄດ້ຖືກຍິງເສຍຊີວິດຈາກການຍິງຂອງເຈົ້າໜ້າທີ່ຕຳຫຼວດຜິວຂາວ 2 ຄົນ ເຊິ່ງເຫດການສະຫຍອງຂວັນດັ່ງກ່າວໄດ້ຖືກບັນທຶກຈາກກ້ອງຣາຈອນປິດໃນຂະນະກ່ອນແລະຫຼັງເກີດເຫດ ແລະຜ່ານການສັນລະສູດສົບພົບວ່າ: ເອິກແລະຫຼັງຊາຍຜິວດຳຄົນນີ້ຖືກຍິງຫຼາຍນັດ. ຂະນະທີ່ກ່ອນເກີດເຫດ, ລາວໄດ້ຕັ້ງຈຸດຂາຍແຜ່ນ CD ຢູ່ໜ້າຮ້ານຂາຍສິນຄ້າແຫ່ງໜຶ່ງເຂດເມືອງດັ່ງກ່າວ.
ເຈົ້າໜ້າທີ່ຕຳຫຼວດອາເມລິກາເປີດເຜີຍວ່າ: ກ່ອນເກີດເຫດ, ໄດ້ຮັບຊາບວ່າມີຜູ້ຊາຍຜິວດຳທີ່ເຄາະຮ້າຍລາຍນີ້ຖືປືນຂົ່ມຂູ່ຜູ້ອື່ນຢູ່ບໍລິເວນດັ່ງກ່າວ. ແນວໃດກໍດີໃນປັດຈຸບັນ, ຕຳຫຼວດທັງສອງຄົນດັ່ງກ່າວພວມພັກວຽກຕາມປົກກະຕິ. ຂະນະດຽວກັນກໍມີຜູ້ປະທ້ວງປະມານ 200 ຄົນໄດ້ເຕົ້າໂຮມກັນຢູ່ຖະໜົນໃກ້ຈຸດເກີດເຫດ ແຕ່ກໍຖືກຕຳຫຼວດສະລາຍການຊຸມນຸມ.