ບົດສູນທອນພົດໃນໂອກາດສະເຫຼີມສະຫຼອງວັນສ້າງຕັ້ງພັກກອມມູນິດຈີນຄົບຮອບ 95 ປີ
(ວັນທີ 1 ກໍລະກົດ 2016)
ໂດຍ: ທ່ານສີຈິ້ນຜິງ
ບັນດາສະຫາຍ ແລະເພື່ອນມິດ:
ມື້ນີ້ ພວກເຮົາໂຮມຊຸມນຸມຢູ່ແຫ່ງນີ້ ເພື່ອສະເຫຼີມສະຫຼອງວັນສ້າງຕັ້ງພັກກອມມູນິດຈີນຄົບຮອບ 95 ປີ ເພື່ອຫວນຄືນຂະບວນວິວັດແຫ່ງຄວາມຮຸ່ງເຮືອງທີ່ພັກກອມມູນິດຈີນນຳພາປະຊາຊົນບຸກບືນສູ້ຊົນ, ທັງເບິ່ງອະນາຄົດທີ່ສະຫວ່າງສະໄຫວໃນພາລະກິດຂອງພັກແລະປະຊາຊົນ, ຍົກຍ້ອງສັນລະເສີນສະມາຊິກພັກຜູ້ດີເດັ່ນ, ຜູ້ທີ່ເຮັດວຽກກ່ຽວກັບພັກຜູ້ດີເດັ່ນ, ອົງການຈັດຕັ້ງພັກຂັ້ນຮາກຖານທີ່ກ້າວໜ້າ, ຂົນຂວາຍໃຫ້ທົ່ວພັກ ແລະປະຊາຊົນບັນດາເຜົ່າທຸກຖ້ວນໜ້າໃນທົ່ວປະເທດກ້າວໄປສູ່ເປົ້າໝາຍສູ້ຊົນຂອງການສ້າງສັງຄົມທີ່ອີ່ມໜາມສຳລານຢ່າງຮອບດ້ານ ແລະບັນລຸຄວາມມຸ່ງຫວັງຂອງຈີນທີ່ສ້າງປະຊາຊາດຈີນໃຫ້ຈະເລີນຮຸ່ງເຮືອງດ້ວຍຄວາມໝັ້ນໃຈຢ່າງເຕັມປ່ຽມ.
ບັນດາສະຫາຍ ແລະເພື່ອນມິດ!
ໃນປະຫວັດສາດທີ່ຫຼາຍພັນປີ, ປະຊາຊາດຈີນໄດ້ປະດິດສ້າງວັດທະນະ ທຳຈີນອັນຮຸ່ງເຮືອງ, ໄດ້ປະກອບສ່ວນຢ່າງພົ້ນເດັ່ນເຂົ້າໃນຄວາມສີວິໄລຂອງມະນຸດ ຈິ່ງກາຍເປັນຊົນຊາດທີ່ຍິ່ງໃຫຍ່ໃນໂລກນີ້, ແຕ່ໃນໄລຍະຜ່ານມາ, ຍ້ອນຖືກພວກຝ່າຍຕາເວັນຕົກເຂົ້າຮຸກຮານ, ຍ້ອນຄວາມເປື່ອຍເຍື່ອຍຂອງການປົກຄອງແບບສັກດິນາ ເຮັດໃຫ້ປະເທດຈີນຄ່ອຍໆຕົກເປັນສັງຄົມເຄິ່ງລ່າເມືອງຂຶ້ນເຄິ່ງສັກດິນາ, ປະເທດແຕກແຍກ, ປະຊາຊົນດຳລົງຊີວິດດ້ວຍຄວາມຫຍຸ້ງຍາກລຳບາກ, ປະຊາຊາດຈີນໄດ້ປະສົບກັບຄວາມທຸກທໍລະມານທີ່ບໍ່ເຄີຍມີມາກ່ອນ.
ແຕ່ຢູ່ຕໍ່ໜ້າຄວາມທຸກຍາກລຳບາກນັ້ນ, ປະຊາຊົນຈີນບໍ່ໄດ້ອ່ອນແອ, ຫາກໄດ້ລຸກຂຶ້ນຢືນບຸກບືນສູ້ຊົນຢ່າງແຂງແຮງດ້ວຍການເຂົ້າຮ່ວມການຕໍ່ສູ້ຫຼາຍຄັ້ງຢ່າງພິລະອາດຫານ ອັນໄດ້ສ້າງປະຫວັດສາດທີ່ໜ້າສັນລະເສີນ.
ຫຼັງຈາກຂະບວນການ "4 ພຶດສະພາ" ເມື່ອປີ 1921, ພາຍໃຕ້ສະພາບການທີ່ປະຊາຊາດຈີນປະສົບກັບຄວາມຫຍຸ້ງຍາກທັງພາຍໃນ ແລະຄວາມອັນຕະລາຍຈາກພາຍນອກໂດຍການເອົາລັດທິມາກເລນິນ ປະສົມປະສານກັບຂະບວນການກຳມະກອນຂອງຈີນ ຈິ່ງເຮັດໃຫ້ພັກກອມມູນິດຈີນກຳເນີດຂຶ້ນ.
ການກຳເນີດຂອງພັກກອມມູນິດຈີນໄດ້ກາຍເປັນເຫດການໃຫຍ່ທີ່ສຳຄັນທີ່ບໍ່ເຄີຍເກີດມາກ່ອນ ອັນໄດ້ປ່ຽນແປງທິດຂະຫຍາຍ ແລະຂະບວນວິວັດແຫ່ງການພັດທະນາຂອງປະຊາຊາດຈີນໃນສະໄໝປັດຈຸບັນຢ່າງເລິກເຊິ່ງ ທັງໄດ້ປ່ຽນແປງອະນາຄົດ ແລະຊາຕາກຳຂອງປະຊາຊົນ ແລະປະຊາຊາດຈີນຢ່າງເລິກເຊິ່ງ ແລະກໍໄດ້ປ່ຽນແປງສະຖານະພາບຂອງການພັດທະນາໃນທົ່ວໂລກຢ່າງເລິກເຊິ່ງເຊັ່ນກັນ.
ໃນຂະບວນວິວັດປະຫວັດສາດຕະຫຼອດ 95 ປີມານີ້, ພັກກອມມູນິດຈີນ ໄດ້ອີງໃສ່ປະຊາຊົນຢ່າງໜັກແໜ້ນ, ຜ່ານຜ່າຄວາມຫຍຸ້ງຍາກຕ່າງໆນາໆຍາດໄດ້ໄຊຊະນະຢ່າງຕໍ່ເນື່ອງ, ໄດ້ປະກອບສ່ວນຢ່າງຍິ່ງໃຫຍ່ເຂົ້າໃນປະຫວັດສາດຂອງປະຊາຊາດຈີນ.
ສ່ວນປະກອບອັນຍິ່ງໃຫຍ່ທາງປະຫວັດສາດນີ້ ກໍຄືພັກກອມມູນິດຈີນສາມັກຄີ ແລະນຳພາປະຊາຊົນດຳເນີນການຕໍ່ສູ້ເປັນເວລາ 28 ປີ ເອົາຊະນະລັດທິເຈົ້າອຳນາດຍີ່ປຸ່ນ, ໂຄ່ນລົ້ມການປົກຄອງແບບປະຕິການຂອງພັກກົກມິນຕັງ, ສຳເລັດການປະຕິວັດລັດທິປະຊາທິປະໄຕໃໝ່ ແລະໃນທີ່ສຸດກໍກ້າວມາສູ່ການສ້າງຕັ້ງ ສາທາລະນະລັດປະຊາຊົນຈີນຂຶ້ນ.ສ່ວນປະກອບອັນຍິ່ງໃຫຍ່ທາງປະຫວັດສາດນີ້ ມີຄວາມໝາຍວ່າ, ໄດ້ສິ້ນສຸດປະຫວັດສາດທີ່ເປັນປະເທດເຄິ່ງລາເມືອງຂຶ້ນເຄິ່ງສັກດິນາຂອງປະເທດເກົ່າຢ່າງສິ້ນເຊີງ, ສິ້ນສຸດສະພາບການແຕກແຍກຂອງປະເທດຈີນເກົ່າຢ່າງສິ້ນເຊີງ, ຍົກເລີກສັນຍາບໍ່ຍຸຕິທຳຕ່າງໆທີ່ຕ່າງປະເທດຂົ່ມໃຫ້ຈີນແລະສິດທິພິເສດທັງໝົດຂອງພວກລັດທິເຈົ້າອຳນາດທີ່ຢູ່ຈີນຢ່າງສິ້ນເຊີງ ແລະເຮັດໃຫ້ຈີນໄດ້ບັນລຸການກ້າວກະໂດດຈາກການເມືອງຜະເດັດການສັກດິນາໃນຫຼາຍພັນປີນັ້ນຫັນໄປສູ່ລັດທິປະຊາທິປະໄຕຢ່າງຍິ່ງໃຫຍ່.
ສ່ວນປະກອບອັນຍິ່ງໃຫຍ່ທາງປະຫວັດສາດນີ້ ກໍຄືພັກກອມມູນິດຈີນສາມັກຄີ ແລະນຳພາປະຊາຊົາຈີນສຳເລັດການປະຕິວັດສັງຄົມນິຍົມ, ສ້າງຕັ້ງລະບອບພື້ນຖານຂອງສັງຄົມນິຍົມ, ລົບລ້າງລະບຽບການກົດຂີ່ຂູດຮີດຕ່າງໆນາໆ, ຊຸກຍູ້ການກໍ່ສ້າງສັງຄົມນິຍົມ. ສ່ວນປະກອບອັນຍິ່ງໃຫຍ່ທາງປະຫວັດສາດນີ້ ມີຄວາມໝາຍວ່າ: ໄດ້ສຳເລັດການປະຕິຮູບສັງຄົມທີ່ມີຂອບເຂດກວ້າງຂວາງທີ່ສຸດແລະມີຄວາມໝາຍເລິກເຊິ່ງທີ່ສຸດໃນປະຫວັດສາດຂອງປະຊາຊາດຈີນ, ກາຍເປັນເບື້ອງຫຼັງທາງການເມືອງ ແລະພື້ນຖານດ້ານລະບຽບການໃຫ້ແກ່ຈີນປັດຈຸບັນມີການກ້າວໜ້າແລະພັດທະນາຕໍ່ໄປ, ໄດ້ສ້າງພື້ນຖານອັນໝັ້ນແກ່ນໃຫ້ແກ່ປະເທດຈີນມີຄວາມມັ່ງຄັ່ງເຂັ້ມແຂງ ແລະປະຊາຊົນມີຊີວິດການເປັນຢູ່ຢ່າງຮັ່ງມີຜາສຸກ, ໄດ້ບັນລຸການກ້າວກະໂດດອັນຍິ່ງໃຫຍ່ຂອງປະຊາຊາດຈີນຈາກການຊຸດໂຊມລົງເລື້ອຍໆຫັນມາເປັນການສືບຕໍ່ພັດທະນາໄປສູ່ຄວາມຈະເລີນຮຸ່ງເຮືອງແລະຄວາມມັ່ງຄັ່ງເຂັ້ມແຂງ.
ສ່ວນປະກອບອັນຍິ່ງໃຫຍ່ທາງປະຫວັດສາດນີ້ກໍຄື ພັກກອມມູນິດຈີນສາມັກຄີ ແລະນຳພາປະຊາຊົາຈີນດຳເນີນການປະຕິວັດອັນຍິ່ງໃຫຍ່ຄື: ການປະຕິຮູບແລະໄຂປະຕູສູ່ພາຍນອກ, ໄດ້ຊຸກຍູ້ໃຫ້ປະຊາຊົນຢ່າງມະຫາສານມີຄວາມປະດິດສ້າງຫຼາຍຂຶ້ນ, ປົດປ່ອຍແລະພັດທະນາກຳລັງການຜະລິດຂອງສັງຄົມຢ່າງໃຫຍ່, ເພີ່ມທະວີພະລັງຊີວິດຂອງການພັດທະນາສັງຄົມ ເຮັດໃຫ້ປະຊາຊົນມີຊີວິດການເປັນຢູ່ດີຂຶ້ນຢ່າງເດັ່ນຊັດ, ກຳລັງສັງລວມແຫ່ງຊາດເພີ່ມທະວີຂຶ້ນຢ່າງເດັ່ນຊັດ, ຖານະໃນສາກົນສູງຂຶ້ນຢ່າງເດັ່ນຊັດ. ສ່ວນປະກອບອັນຍິ່ງໃຫຍ່ທາງປະຫວັດສາດນີ້ ມີຄວາມໝາຍວ່າ: ໄດ້ສ້າງເສັ້ນທາງພັດທະນາສັງຄົມນິຍົມທີ່ມີສີສັນພິເສດຂອງຈີນ, ຈໍ່ຕົວເປັນລະບົບທິດສະດີສັງຄົມນິຍົມທີ່ມີສີສັນພິເສດຂອງຈີນ, ໄດ້ກຳນົດລະບອບສັງຄົມນິຍົມທີ່ມີສີສັນພິເສດຂອງຈີນ ເຮັດໃຫ້ປະເທດຈີນກ້າວໄປຕາມຍຸກສະໄໝ, ບັນລຸການກ້າວກະໂດດທີ່ເຮັດໃຫ້ປະຊາຊົນລຸກຢືນຂຶ້ນ, ຮັ່ງມີຂຶ້ນ ແລະເຂັ້ມແຂງຂຶ້ນ.