ລັດຖະມົນຕີການຕ່າງປະເທດຈີນຖະແຫຼງກ່ຽວກັບອັນທີ່ກ່າວອ້າງວ່າຜົນການຕັດສິນບັນຫາທະເລຈີນໃຕ້ຂອງສານອະນຸຍາໂຕຕຸລາການ
2016-07-12 21:57:50 cri
ຕາມຂ່າວ CRI: ວັນທີ 12 ກໍລະກົດນີ້ ທ່ານຫວາງອີ້ ລັດຖະມົນຕີກະຊວງການຕ່າງປະເທດຈີນໄດ້ຖະແຫຼງກ່ຽວກັບອັນທີ່ກ່າວອ້າງວ່າຜົົນການຕັດສິນບັນຫາທະເລຈີນໃຕ້ຂອງສານອະນຸຍາໂຕຕຸລາການສາກົນເພື່ອບັນຍາຍຄຳເຫັນຂອງຈີນຕື່ມອີກ.
ທ່ານຫວາງຢີ້ຊີ້ອອກວ່າ:
ໜຶ່ງ: ຄະດີຕັດສິນບັນຫາທະເລຈີນໃຕ້ແມ່ນເຫດການການເມືອງທີ່ປົກຫົ່ມດ້ວຍກົດໝາຍແຕ່ຕົ້ນຕະຫຼອດປາຍ.
ລັດຖະບານຟິລິບປິນຊຸດກ່ອນໄດ້ຍື່ນຍັນຫາທະເລຈີນໃຕ້ໃຫ້ສານອະນຸຍາໂຕຕຸລາການແຕ່ຝ່າຍດຽວໂດຍມີອິດທິກຳລັງນອກພາກພື້ນວາງແຜນຢູ່ເບື້ອງຫຼັງ, ບໍ່ໄດ້ຮັບຄວາມເຫັນດີຈາກຄູ່ກໍລະນີກ່ອນ, ລະເມີດສັນຍາແກ້ໄຂຄວາມຂັດແຍ້ງກັນໂດຍຜ່ານການເຈລະຈາລະປຶກສາຫາລືທີ່ສອງຝ່າຍຕົກລົງກັນ, ແລະຝ່າຝືນຄຳໝັ້ນສັນຍາທີ່ລະບຸໄວ້ໃນ 《ຖະແຫຼງການແຫ່ງການປະພຶດຂອງບັນດາຝ່າຍໃນທະເລຈີນໃຕ້》,ເປັນອັນຈະແຈ້ງແລ້ວວ່າຈຸດປະສົງຂອງການກະທຳດັ່ງກ່າວບໍ່ແມ່ນເພື່ອແກ້ໄຂຄວາມຂັດແຍ້ງກັນລະຫວ່າງຈີນ-ຟີລິບປິນຢ່າງເໝາະສົມ, ຫາກມີເຈດຕະນາເພື່ອລ່ວງລ້ຳອະທິປະໄຕດ້ານດິນແດນ ແລະສິດຜົນປະໂຫຍດທາງທະເລຂອງຈີນ, ທຳລາຍສັນຕິພາບແລະສະຖຽນລະພາບຂອງພາກພື້ນທະເລຈີນໃຕ້.
ສອງ:ຈີນບໍ່ຮັບຮອງ ແລະບໍ່ເຂົ້າຮ່ວມການຕັດສິນ ກໍເພື່ອປົກປ້ອງກົດໝາຍສາກົນ ແລະກົດລະບຽບຕ່າງໆຢູ່ພາກພື້ນຕາມກົດໝາຍ.
ກົດໝາຍສາກົນໄດ້ມອບໝາຍໃຫ້ປະເທດຕ່າງໆມີສິດເປັນເຈົ້າການເລືອກເອົາວິທີແກ້ໄຂຄວາມຂັດແຍ້ງກັນ; 《ສົນທິສັນຍາສະຫະປະຊາຊາດວ່າດ້ວຍກົດໝາຍທະເລ》ໄດ້ກຳນົດໃຫ້ປະເທດສະມາຊິກມີສິດປະຕິເສດລະບຽບການຄອບຄອງທີ່ແບບບັງຄັບ; 《ຖະແຫຼງການແຫ່ງການປະພຶດຂອງບັນດາຝ່າຍໃນທະເລຈີນໃຕ້》ໄດ້ກຳນົດໄວ້ຢ່າງຈະແຈ້ງວ່າໃຫ້ປະເທດທີ່ກ່ຽວພັນກັບບັນຫາໂດຍກົງແກ້ໄຂຄວາມຂັດແຍ້ງກັນໂດຍຜ່ານການສົນທະນາ ແລະເຈລະຈາກັນ. ສະນັ້ນ ການທີ່ຈີນ ບໍ່ຮັບຮອງແລະບໍ່ເຂົ້າຮ່ວມການຕັດສິນ ແມ່ນມີຫຼັກອ້າງອີງກົດໝາຍຢ່າງເຕັມສ່ວນ, ສອດຄ່ອງກັບລະບຽບການຂອງກົດໝາຍທະເລສາກົນ, ແມ່ນປະຕິບັດຕາມກົດໝາຍທັງນັ້ນ. ປັດຈຸບັນ ມີ 60 ກວ່າປະເທດໄດ້ສະແດງຄວາມເຂົ້າໃຈ ແລະສະໜັບສະໜູນຫຼັກໝັ້ນ ແລະຈຸດຢືນຂອງຈີນຢ່າງເປີດເຜີຍແລ້ວ.
ສາມ: ອະທິປະໄຕດ້ານດິນແດນ ແລະສິດຜົນປະໂຫຍດທງທະເລຂອງຈີນໃນທະເລຈີນໃຕ້ແມ່ນມີພື້ນຖານດ້ານປະຫວັດສາດແລະດ້ານກົດໝາຍຢ່າງໜັກແໜ້ນ, ຈະບໍ່ຖືກກະທົບຈາກຜົນການຕັດສິນຂອງອັນທີ່ວ່ກ່າວອ້າງາສານອະນຸຍາໂຕຕຸລາການສາກົນ.
ທ່ານຫວາງຢີ້ກ່າວເນັ້ນວ່າ, ອະທິປະໄຕດ້ານດິນແດນ ແລະສິດຜົນປະໂຫຍດທາງທະເລຂອງຈີນໃນທະເລຈີນໃຕ້ແມ່ນເລື່ອງຄວາມເປັນຈິງທາງພາວະວິໄສທີ່ກຳເນີດຈາກຂະບວນວິວັດປະຫວັດສາດທີ່ຍາວນານ, ແມ່ນຫຼັກໝັ້ນທີ່ລັດຖະບານຈີນທຸກຊຸດຍຶດໝັ້ນໂດຍຕະຫຼອດ. ໃນບັນຫາກ່ຽວກັບອະທິປະໄຕດ້ານດິນແດນ ແລະສິດຜົນປະໂຫຍດທາງທະເລ, ຈີນບໍ່ຮັບເອົາວິທີແກ້ໄຂຂອງຝ່າຍທີ 3 ທີ່ບໍ່ໄດ້ຮັບຄວາມເຫັນດີຈາກຈີນ, ຈະບໍ່ຮັບເອົາແຜນການແກ້ໄຂໃດໆທີ່ຂືນເຕັງໃສ່ຈີນ.
ສີ່ ຈີນຈະສືບຕໍ່ສຸມໃສ່ການແກ້ໄຂຄວາມຂັດແຍ້ງກັນໂດຍຜ່ານການປຶກສາຫາລືແລະເຈລະຈາກັນເພື່ອປົກປັກຮັກສາສັນຕິພາບແລະສະຖຽນລະພາບຂອງພາກພື້ນ.
ຈີນຈະສືບຕໍ່ຍຶດໝັ້ນແກ້ໄຂຄວາມຂັດແຍ້ງກັນດ້ວຍສັນຕິວິທີໂດຍຜ່ານການປຶກສາຫາລືແລະເຈລະຈາກັນລະຫວ່າງຝ່າຍທີ່ກ່ຽວຂ້ອງກັບບັນຫາໂດຍກົງ ຕາມກົດໝາຍສາກົນ; ຍຶດໝັ້ນປົກປັກຮັກສາເສລີພາບຂອງປະເທດຕ່າງໆໃນການເດີນເຮືອແລະບິນຜ່ານທະເລຈີນໃຕ້ຕາມກົດໝາຍສາກົນ; ຍຶດໝັ້ນຈັດຕັ້ງປະຕິບັດ "ຖະແຫຼງການແຫ່ງການປະພຶດຂອງບັນດາຝ່າຍໃນທະເລຈີນໃຕ້" ຢ່າງຮອບດ້ານແລະມີປະສິດທິຜົນທັງຊຸກຍູ້ຂະບວນການປຶກສາຫາລື "ກົດລະບຽບແຫ່ງການປະພຶດຢູ່ທະເລຈີນໃຕ້" ພາຍໃຕ້ຂອບດັ່ງກ່າວ.
ທ່ານ ຫວາງຢີ້ ກ່າວວ່າ, ຄະດີຕັດສິນບັນຫາທະເລຈີນໃຕ້ແລະພ້ອມດ້ວຍການປັ້ນຂ່າວດ້ວຍເຈຕະນາຮ້າຍແລະການຄວບຄຸມທາງການເມືອງຈາກຄະດີດັ່ງກ່າວໄດ້ເຮັດໃຫ້ບັນຫາທະເລຈີນໃຕ້ຕົກຢູ່ໃນສະພາບອັນຕະລາຍທີ່ເກີດການປໍລະປັກກັນ,ເຊິ່ງບໍ່ເປັນຜົນດີຕໍ່ການປົກປັກຮັກສາສັນຕິພາບແລະສະຖຽນລະພາບຂອງພາກພື້ນ. ແນວໃດກໍດີ, ຈີນໄດ້ເຫັນລັດຖະບານຊຸດໃໝ່ຂອງຟິລິບປິນສະແດງທ່າທີຕ່າງໆໃນຫວ່າງມໍ່ໆມານີ້ໂດຍ ຈີນຍິນດີທີ່ເຫັນຄວາມຈິງໃຈຂອງລັດຖະບານຊຸດໃໝ່ຂອງຟິລິບປິນໃນການໃຊ້ມາດຕະການທີ່ແທ້ຈິງເພື່ອປັບປຸງສາຍພົວພັນລະຫວ່າງສອງປະເທດໃຫ້ດີຂຶ້ນ ເພື່ອຊຸກຍູ້ສາຍພົວພັນລະຫວ່າງສອງປະເທດໃຫ້ກັບຄືນສູ່ເສັ້ນທາງພັດທະນາທີ່ປອດໄສ.
ທ່ານ ຫວາງຢີ້ ກ່າວຢ້ຳວ່າ, ການພັດທະນາສາຍພົວພັນໄມຕີຈິດມິດຕະພາບກັບບັນດາປະເທດອ້ອມຂ້າງແມ່ນທິດທາງສະເໝີຕົ້ນສະເໝີປາຍຂອງຈີນ; ການປົກປັກຮັກສາສັນຕິພາບແລະສະຖຽນລະພາບຂອງພາກພື້ນແມ່ນຄວາມຮັບຜິດຊອບເທົ່າທີ່ຄວນຂອງຈີນໃນສາກົນແລະການຍຶດໝັ້ນເສັ້ນທາງພັດທະນາໂດຍສັນຕິກໍແມ່ນທາງເລືອກຍຸດທະສາດທີ່ເດັດດ່ຽວໜຽວແໜ້ນຂອງຈີນ.
