ງານລ້ຽງຮັບຮອງເພື່ອລະນຶກວັນຄົບຮອບ 25 ປີການສ້າງສາຍພົວພັນຄູ່ເຈລະຈາຈີນ-ອາຊຽນໄດ້ຈັດຂຶ້ນຢູ່ນະຄອນຫຼວງຈາກາຕາ ປະເທດອິນໂດເນເຊຍໃນວັນທີ 11 ກໍລະກົດນີ້ ໂດຍທ່ານສີປູ້ ເອກອັກຄະລັດຖະທູດຈີນປະຈຳອາຊຽນ, ທ່ານເລເລືອງມິງ ເລຂາທິການໃຫຍ່ອາຊຽນ ແລະຜູ້ຕາງໜ້າປະເທດຕ່າງໆປະຈຳອາຊຽນ ພ້ອມດ້ວຍແຂກຮັບເຊີນປະມານ 600 ທ່ານໄດ້ເຂົ້າຮ່ວມງານລ້ຽງດັ່ງກ່າວ.
ທ່ານສີປູ້ ເອກອັກຄະລັດຖະທູດຈີນປະຈຳອາຊຽນ ໄດ້ກ່າວວ່າ: 25 ປີຜ່ານມາ, ການຮ່ວມມືລະຫວ່າງຈີນ-ອາຊຽນໄດ້ຮັບໝາກຜົນຢ່າງຫຼວງຫຼາຍ, ຂະນະທີ່ຈາກຄວາມພະຍາຍາມຂອງສອງຝ່າຍນັ້ນ, ຈີນ-ອາຊຽນໄດ້ພັດທະນາສາຍພົວພັນກາຍເປັນຄູ່ພົວພັນທີ່ໜັກແໜ້ນ ແລະ ຄຶກຄັກທີ່ສຸດໃນສາຍພົວພັນລະຫວ່າງອາຊຽນກັບຄູ່ເຈລະຈາຂອງຕົນ ແລະຍົກລະດັບສູງຂຶ້ນຈາກທີ່ເຄີຍເປັນການພົວພັນສອງຝ່າຍນັ້ນຢ່າງຫຼວງຫຼາຍ ທັງກາຍເປັນກຳລັງສຳຄັນໃນການຊຸກຍູ້ສັນຕິພາບແລະສະຖຽນລະພາບຂອງພາກພື້ນ, ການຮັກສາທິດທາງໃຫຍ່ແຫ່ງການຮ່ວມມືທີ່ຕ່າງຝ່າຍຕ່າງມີຜົນປະໂຫຍດໃຫ້ດີແມ່ນພາລະກຳຮ່ວມຂອງສອງຝ່າຍ.
ທ່ານເລເລືອງມິງ ເລຂາທິການໃຫຍ່ອາຊຽນ ກ່າວວ່າ: ອາຊຽນຈະສືບຕໍ່ຮັກສາການຮ່ວມມືກັບຈີນຢ່າງແໜ້ນແຟ້ນ ເພື່ອຊຸກຍູ້ສາຍພົວພັນຄູ່ຮ່ວມຍຸດທະສາດລະຫວ່າງສອງຝ່າຍໃຫ້ພັດທະນາກ້າວໄປໜ້າ ແລະເສີມຂະຫຍາຍສັນຕິພາບ, ສະຖຽນລະພາບ ແລະ ຄວາມຈະເລີນຮຸ່ງເຮືອງຂອງພາກພື້ນນີ້ແລະຂອງໂລກໃຫ້ກ້າວຂຶ້ນສູ່ລະດັບໃໝ່.