ຕໍ່ກັບສານອະນຸຍາໂຕຕຸລາການໃນຄະດີຕັດສິນຄວາມຂັດແຍ້ງກັນໃນບັນຫາທະເລຈີນໃຕ້ທີ່ສ້າງຕັ້ງຂຶ້ນຕາມຄຳຮ້ອງຂໍແຕ່ຝ່າຍດຽວຂອງຟິລິບປິນ ໄດ້ທຳການຕັດສິນທີ່ກ່ຽວຂ້ອງໃນວັນທີ 12 ກໍລະກົດປີ 2016, ກະຊວງການຕ່າງປະເທດສາທາລະນະລັດປະຊາຊົນຈີນຖະແຫຼງຢ່າງໜັກແໜ້ນວ່າ ຜົນການຕັດສິນດັ່ງກ່າວບໍ່ມີຜົນສັກສິດ, ບໍ່ມີຄວາມຜູກມັດ ຈີນຈະບໍ່ຮັບຮອງ, ບໍ່ຍອມຮັບ.
ຖະແຫຼງການລະບຸວ່າ, ເມື່ອວັນທີ 22 ມັງກອນປີ 2013, ລັດຖະບານຟິລິບປິນໄດ້ຍື່ນບັນຫາຄວາມຂັດແຍ້ງກັບຈີນໃນທະເລຈີນໃຕ້ໃຫ້ສານອະນຸຍາໂຕຕຸລາການແຕ່ຝ່າຍດຽວ. ຫຼັງຈາກນັ້ນ, ວັນທີ 19 ກຸມພາປີ 2013, ລັດຖະບານຈີນໄດ້ຖະແຫຼງຢ່າງໜັກແໜ້ນວ່າຈະບໍ່ຮັບຮອງ ແລະ ບໍ່ເຂົ້າຮ່ວມການຕັດສິນດັ່ງກ່າວ ແລະໄດ້ຢ້ຳຄືນຫຼັກໝັ້ນນີ້ຫຼາຍເທື່ອໃນເວລາຜ່ານມາ. ວັນທີ 7 ທັນວາປີ 2014, ລັດຖະບານຈີນໄດ້ຖະແຫຼງ "ເອກະສານຫຼັກໝັ້ນຂອງລັດຖະບານສາທາລະນະລັດປະຊາຊົນຈີນກ່ຽວກັບບັນຫາສິດຄອບຄອງໃນຄະດີການຕັດສິນຄວາມຂັດແຍ້ງກັນໃນບັນຫາທະເລຈີນໃຕ້ທີ່ສາທາລະນະລັດຟິລິບປິນສະເໜີ" ໂດຍຊີ້ອອກວ່າ: ຟິລິບປິນຍື່ນບັນຫາທະເລຈີນໃຕ້ໃຫ້ສານອະນຸຍາໂຕຕຸລາການສາກົນຕັດສິນເປັນການກະທຳລະເມີດສັນຍາທີ່ຈີນແລະຟິລິບປິນເຊັນກັນ, ລະເມີດ "ສົນທິສັນຍາສະຫະປະຊາຊາກວ່າດ້ວຍກົດໝາຍທະເລ", ລະເມີດການປະຕິບັດຕົວຈິງຕາມປົກກະຕິໃນການຕັດສິນສາກົນ ແລະສານອະນຸຍາໂຕຕຸລາການບໍ່ມີສິດຄອບຄອງ. ວັນທີ 29 ຕຸລາປີ 2015, ສານອະນຸຍາໂຕຕຸລາການໄດ້ທຳການຕັດສິນກ່ຽວກັບບັນຫາສິດຄອບຄອງແລະລັກສະນະຂອງບັນຫາທີ່ສາມາດຮັບຊຳລະແກ້ໄຂ ລັດຖະບານຈີນກໍອອກຖະແຫຼງການໃນທັນທີ ໂດຍຊີ້ວ່າ ຜົນການຕັດສິນນີ້ບໍ່ມີຜົນສັກສິດ ແລະ ບໍ່ມີຄວາມຜູກມັດ. ຫຼັກໝັ້ນດັ່ງກ່າວຂອງຈີນແມ່ນຈະແຈ້ງ ແລະ ບໍ່ປ່ຽນແປງໂດຍຕະຫຼອດ.
ຖະແຫຼງການລະບຸວ່າ, ຟິລິບປິນຍື່ນບັນຫາດັ່ງກ່າວໃຫ້ສານອະນຸຍາໂຕຕຸລາການແມ່ນມີເຈດຕະນາຮ້າຍ, ບໍ່ແມ່ນເພື່ອແກ້ໄຂຄວາມຂັດແຍ້ງກັບຈີນ, ແລະກໍບໍ່ແມ່ນເພື່ອປົກປັກຮັກສາສັນຕິພາບ ແລະສະຖຽນລະພາບໃນທະເລຈີນໃຕ້, ຫາກແມ່ນເພື່ອຢັບຢັ້ງອະທິປະໄຕດ້ານດິນແດນ ແລະສິດຜົນປະໂຫຍດທາງທະເລຂອງຈີນໃນທະເລຈີນໃຕ້. ຂະນະທີ່ສານອະນຸຍາໂຕຕຸລາການສາກົນໄດ້ປະໝາດທາດແທ້ຂອງຄຳຮ້ອງຂໍຂອງຟິລິປິນນັ້ນແມ່ນບັນຫາອະທິປະໄຕດ້ານດິນແດນແລະການຂີດແບ່ງຊາຍແດນທາງທະເລ, ໄດ້ຕີຄວາມໝາຍທາງເລືອກຮ່ວມລະຫວ່າງຈີນ-ຟິລິບປິນກ່ຽວກັບວິທີແກ້ໄຂຄວາມຂັດແຍ້ງກັນໃນທາງຜິດພາດ, ໄດ້ກະທຳຜິດຢ່າງຈະແຈ້ງງໃນການຊອກຮູ້ຄວາມຈິງ ແລະການນຳໃຊ້ກົດໝາຍ. ການກະທຳຂອງສານອະນຸຍາໂຕຕຸລາການ ກໍ່ຄືການຕັດສິນຂອງສານດ່ັງກ່າວໄດ້ຂັດກັບພຶດຕິກຳທົ່ວໄປຂອງການຕັດສິນສາກົນຢ່າງໜັກໜ່ວງ, ຂັດກັບເຈດຕະນາແລະຈຸດປະສົງການຊຸກຍູ້ການແກ້ໄຂຄວາມຂັດແຍ້ງກັນໂດຍສັນຕິທີ່ລະບຸໄວ້ໃນ《ສົນທິສັນຍາກ່ສະຫະປະຊາຊາວ່າດ້ວຍກົດໝາຍທະເລ》ຢ່າງເຖິງຖອງ, ອັນໄດ້ທຳລາຍຄວາມສົມບູນ ແລຄວາມສັກສິດຂອງສົນທິສັນຍາດ່ັງກ່າວຢ່າງຮ້າຍແຮງ, ໄດ້ລ່ວງລະເມີດສິດທິທີ່ຊອບດ້ວຍກົດໝາຍຂອງຈີນໃນຖານະເປັນປະເທດອະທິປະໄຕ ແລະເປັນປະເທດພາຄີສົນທິສັນຍາດ່ັວກ່າວຢ່າງໜັກໜ່ວງ, ສະນັ້ນ ການກະທຳຂອງສານອະນຸຍາໂຕຕຸລາການຂາດຍຸດຕິທຳ ແລະບໍ່ຖືກຕ້ອງຕາມກົດໝາຍ.
ຖະແຫຼງການລະບຸວ່າ: ລັດຖະບານຈີນຂໍກ່າວຢ້ຳອີກເທື່ອໜຶ່ງ, ຕໍ່ບັນຫາອະທິປະໄຕດ້ານດິນແດນແລະຄວາມຂັດແຍ້ງກັນໃນການຂີດແບ່ງຊາຍແດນທາງທະເລນັ້ນ, ຈີນບໍ່ຮັບຮອງວິທີການແກ້ໄຂຄວາມຂັດແຍ້ງກັນໂດຍຜ່ານຝ່າຍທີ 3 ແລະບໍ່ຮັບຮອງແຜນການແກ້ໄຂຄວາມຂັດແຍ້ງກັນແບບບັງຄັບທີ່ແນໃສ່ຈີນ. ແນວໃດກໍດີ, ລັດຖະບານຈີນຈະສືບຕໍ່ປະຕິບັດຕາມກົດໝາຍສາກົນທີ່ຮັບຮອງໂດຍ "ກົດບັດສະຫະປະຊາຊາດ" ແລະຫຼັກການພື້ນຖານແຫ່ງການພົວພັນສາກົນ, ລວມທັງເຄົາລົບອະທິປະໄຕແລະຜືນແຜ່ນດິນອັນຄົບຖ້ວນກໍຄືຫຼັກການແກ້ໄຂຄວາມຂັດແຍ້ງກັນໂດຍສັນຕິ, ຍຶດໝັ້ນແກ້ໄຂຄວາມຂັດແຍ້ງກັນຢູ່ທະເລຈີນໃຕ້ໂດຍຜ່ານການປຶກສາຫາລືແລະເຈລະຈາກັນກັບປະເທດທີ່ກ່ຽວຂ້ອງໂດຍກົງບົນພື້ນຖານເຄົາລົບຄວາມເປັນຈີິງໃນປະຫວັດສາດແລະອີງຕາມກົດໝາຍສາກົນ, ເພື່ອປົກປັກຮັກສາສັນຕິພາບແລະສະຖຽນລະພາບຢູ່ທະເລຈີນໃຕ້.