ທ່ານທອງລຸນ ສີສຸລິດ ນາຍົກລັດຖະມົນຕີລາວກ່າວໃນເວລາພົບປະກັບທ່ານຫຼີເຄີ້ສຽງ ນາຍົກລັດຖະມົນຕີຈີນຢູ່ນະຄອນຫຼວງອູລານບາຕໍ ປະເທດມົງໂກລີໃນວັນທີ 14 ກໍລະກົດນີ້ວ່າ: ລາວສະໜັບສະໜູນຫຼັກໝັ້ນຂອງຈີນໃນຄະດີຕັດສິນບັນຫາທະເລຈີນໃຕ້ທີ່ຮ້ອງຟ້ອງໂດຍຟິລິບປິນແຕ່ຝ່າຍດຽວ ແລະ ຍິນດີພະຍາຍາມຮ່ວມກັບຈີນ ເພື່ອປົກປັກຮັກສາສັນຕິພາບແລະສະຖຽນລະພາບໃນເຂດທະເລຈີນໃຕ້.
ທ່ານທອງລຸນ ສີສຸລິດ ກ່າວວ່າ: ການພົວພັນລະຫວ່າງລາວ-ຈີນໄດ້ຮັບການພັດທະນາເປັນຢ່າງດີ ແລະກໍຍິນດີເພີ່ມທະວີການໄປມາຫາສູ່ຢ້ຽມຢາມກັນລະຫວ່າງການນຳຂັ້ນສູງກັບຈີນຕື່ມອີກ, ເພີ່ມທະວີການເຊື່ອມຕໍ່ຍຸດທະສາດການພັດທະນາ ແລະເລັ່ງຈັດຕັ້ງປະຕິບັດໂຄງການທາງລົດໄຟລາວ-ຈີນຢ່າງຮອບດ້ານໃນປີນີ້. ຂະນະດຽວກັນ, ລາວຈະພະຍາຍາມຮ່ວມກັບຝ່າຍຕ່າງໆ ເພື່ອຊຸກຍູ້ການພົວພັນອາຊຽນ-ຈີນໃຫ້ຂະຫຍາຍຕົວ.
ທ່ານຫຼີເຄີ້ສຽງ ກ່າວວ່າ: ຈີນຍິນດີຮ່ວມກັບລາວຖືເອົາການສ້າງຕັ້ງສາຍພົວພັນທາງການທູດລະຫວ່າງສອງປະເທດຄົບຮອບ 55 ປີນັ້ນເປັນຈຸດເລີ່ມຕົ້ນໃໝ່ ເສີມສ້າງສາຍພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດໃຫ້ດີຍິ່ງຂຶ້ນ ແລະຍາດໄດ້ໝາກຜົນຮ່ວມມືອັນໃໝ່.
ທ່ານຫຼີເຄີ້ສຽງ ກ່າວຕື່ມວ່າ: ຈີນຊົມເຊີຍລາວໃນຖານະເປັນປະທານອາຊຽນໃນປີນີ້ ທີ່ໄດ້ສຸມທຸກຄວາມພະຍາຍາມຊຸກຍູ້ການພັດທະນາອາຊຽນ ລວມທັງການປົກປັກຮັກສາສັນຕິພາບ ແລະ ຊຸກຍູ້ການຮ່ວມມືໃນພາກພື້ນ.