ແຕ່ວັນທີ 13 ຫາວັນທີ 16 ກໍລະກົດນີ້, ທ່ານ ຫຼີເຄີ້ສຽງ ນາຍົກລັດຖະມົນຕີຈີນໄດ້ຢ້ຽມຢາມມົງໂກລີຢ່າງເປັນທາງການຕາມຄຳເຊີນ ພ້ອມທັງເຂົ້າຮ່ວມກອງປະຊຸມສຸດຍອດອາຊີ-ເອີຣົບຄັ້ງທີ 11. ຜູ້ຊ່ຽວຊານຕ່າງປະເທດໄດ້ຕີລາຄາຢ່າງຕັ້ງໜ້າຕໍ່ການຢ້ຽມຢາມຂອງທ່ານຄັ້ງນີ້ ພ້ອມທັງເຫັນວ່າການຢ້ຽມຢາມຂອງທ່ານຈະເປັນປະໂຫຍດຕໍ່ການຊຸກຍູ້ການເຊື່ອມຕໍ່ກັນທາງດ້ານຍຸດທະສາດການພັດທະນາລະຫວ່າງຈີນ-ມົງໂກລີ,ຊຸກຍູ້ການພັດທະນາດ້ານການເຊື່ອມຈອດກັນລະຫວ່າງອາຊີ-ເອີຣົບ.
ທ່ານສະມາຊິກສະພາ ອະດີດຮອງລັດຖະມົນຕີກະຊວງການຕ່າງປະເທດມົງໂກລີກ່າວວ່າ: ການຢ້ຽມຢາມຂອງທ່ານ ຫຼີເຄີ້ສຽງ ຄັ້ງນີ້ເປັນການຢ້ຽມຢາມອີກຄັ້ງໜຶ່ງຂອງນາຍົກລັດຖະມົນຕີຈີນໃນຮອບ 6 ປີຜ່ານມາ, ມີຄວາມໝາຍສຳຄັນຫຼາຍ. ສອງປະເທດໄດ້ເຊັນສັນຍາຮ່ວມມືຫຼາຍສະບັບເຊິ່ງບໍ່ພຽງແຕ່ຈະຊຸກຍູ້ການຂະຫຍາຍການພົວພັນທາງການເມືອງລະຫວ່າງສອງປະເທດເທົ່ານັ້ນ ແຕ່ຍັງຈະຊຸກຍູ້ການແລກປ່ຽນດ້ານເສດຖະກິດສັງຄົມອີກດ້ວຍ.
ທ່ານ ບຳບາງ ເຊີໂຢໂນ ນັກວິເຄາະທາງການເມືອງຂອງອິນໂດເນເຊຍກ່າວວ່າ: ຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ທີ່ຈີນສະເໜີ ມີຈຸດປະສົງເພື່ອໃຫ້ແຜ່ນດິນໃຫຍ່ອາຊີ-ເອີຣົບເຊື່ອມຕໍ່ກັນ, ເພີ່ມທະວີການຮ່ວມມືລະຫວ່າງປະເທດອາຊີແລະເອີຣົບທີ່ຢູ່ລຽບຕາມ "ໜຶ່ງແລວທາງໜຶ່ງເສັ້ນທາງ". ບັນດາປະເທດອາຊີແລະເອີຣົບຈະເພີ່ມທະວີການເຊື່ອມຈອດກັນ ແລະ ເສີມສ້າງຄວາມຊີວິດຊີວາທາງເສດຖະກິດລະຫວ່າງສອງຝ່າຍພາຍໃຕ້ຂອບຂໍ້ລິເລີ່ມດັ່ງກ່າວ.