ກອງປະຊຸມສຸດຍອດອາຊີ-ເອີຣົບຄັ້ງທີ 11 ທີ່ໄດ້ຈັດຂຶ້ນຢູ່ນະຄອນຫຼວງອູລານບາຕໍຂອງມົງໂກລີໄດ້ອັດລົງໃນວັນທີ 16 ກໍລະກົດນີ້. ຜູ້ນຳທີ່ເຂົ້າຮ່ວມກອງປະຊຸມໄດ້ຮ່ວມກັນອອກ "ຖະແຫຼງການອູລານບາຕໍ" ແລະຖະແຫຼງການປະທານ ໂດຍໄດ້ໃຫ້ຄຳໝັ້ນສັນຍາຈະສືບຕໍ່ຊຸກຍູ້ກົນໄກກອງປະຊຸມອາຊີ-ເອີຣົບດ້ວຍວິທີເປີດກວ້າງແລະຄ່ອຍເປັນຄ່ອຍໄປ, ເພີ່ມທະວີການເຊື່ອມຈອດກັນແລະຊຸກຍູ້ການຮ່ວມມືໃຫ້ກ້າວເຂົ້າສູ່ລວງເລິກ ບົນພື້ນຖານຖອດຖອນບົດຮຽນໃນເມື່ອກ່ອນຢ່າງເຕັມສ່ວນ.
ຂ່າວແຈ້ງວ່າ: ເພື່ອຊຸກຍູ້ການຮ່ວມມືລະຫວ່າງອາຊີ-ເອີຣົບໃນອະນາຄົດຕື່ມອີກ, ຖະແຫຼງການໄດ້ສະເໜີຂໍ້ລິເລີ່ມຕ່າງໆເປັນຕົ້ນເພີ່ມທະວີການພົວພັນຄູ່ຮ່ວມມືອາຊີ-ເອີຣົບ, ສຸມໃສ່ການຮ່ວມມືທີ່ແທ້ຈິງ, ຊຸກຍູ້ການເຊື່ອມຈອດກັນໃນຂົງເຂດຕ່າງໆ,ຊຸກຍູ້ການເພີ່ມຕື່ມເນື້ອໃນຂອງກອງປະຊຸມ ແລະອື່ນໆ.
ຖະແຫຼງການຍັງໄດ້ກ່າວປະນາມຢ່າງຮຸນແຮງຕໍ່ການໂຈມຕີແບບກໍ່ການຮ້າຍທີ່ເກີດຂຶ້ນໃນມໍ່ໆນີ້ ໂດຍເນັ້ນວ່າຈະຮ່ວມກັນໂຈມຕີລັດທິກໍການຮ້າຍ, ກຳຈັດສະພາບແວດລ້ອມຂອງການແຜ່ຂະຫຍາຍລັດທິຫົວຮຸນແຮງແລະລັດທິກໍ່ການຮ້າຍ.
ກອງປະຊຸມສຸດຍອດອາຊີ-ເອີຣົບຄັ້ງນີ້ໄດ້ດຳເນີນເປັນເວລາສອງວັນ ໂດຍມີຜູ້ນຳຂອງ 53 ສະມາຊິກຈາກອາຊີແລະເອີຣົບເຂົ້າຮ່ວມ. ນອກນີ້,ກອງປະຊຸມຍັງໄດ້ປະກາດວ່າກອງປະຊຸມສຸດຍອດຄັ້ງຕໍ່ໄປຈະຈັດຂຶ້ນຢູ່ນະຄອນຫຼວງບຣຸກແຊນປະເທດແບນຊິກໃນປີ 2018.
 |
