ເມື່ອມໍ່ໆມານີ້, ທ່ານຊາສຟຣີແມນ ເຈົ້າໜ້າທີ່ການທູດອາວຸໂສອາເມລິກາໄດ້ໃຫ້ສຳພາດຕໍ່ນັກຂ່າວຢູ່ນະຄອນຫຼວງວໍຊິງຕັນວ່າ: ຈະບໍ່ມີປະເທດໃດຮຽນແບບຟີລິບປິນເດັດຂາດໂດຍການສະແຫວງຫາການຕັດສິນຈາກສານອະນຸຍາໂຕຕຸລາການນັ້ນຈະບໍ່ສາມາດໂນ້ມນ້ຽວປະເທດອື່ນໄດ້ແລະຄຳຕັດສິນຂອງສານອະນຸຍາໂຕຕຸລາການຊົ່ວຄາວກໍບໍ່ສາມາດເຂົ້າມາແທນທີ່ການເຈລະຈາໄດ້.
ທ່ານຊາສ ຟຣີແມນ ອະດີດອັກຄະລັດຖະທູດອາເມລິກາປະຈຳຈີນແລະເປັນເອກອັກຄະລັດຖະທູດອາເມລິກາປະຈຳອາຣັບບີຊາອຸດິດເຫັນວ່າ: ຟີລິບປິນຕົກລົງຫັນໜ້າໄປຫາອະນຸຍາໂຕຕຸລາການສາກົນພຽງຝ່າຍດຽວເປັນຜົນມາຈາກບັນຫາການເມືອງພາຍໃນປະເທດໂດຍມີເຈດຕະນາຫຼີກເວັ້ນການຕຳໜິຂອງປະຊາຊົນຕໍ່ຄວາມຫຼົ້ມແຫຼວໃນການປະຕິບັດນະໂຍບາຍການຕ່າງປະເທດຂອງລັດຖະບານຕົນ. ການທີ່ລັດຖະບານຟີລິບປິນເຊິ່ງນຳໂດຍທ່ານເບນິກໂນອາກີໂນⅢໃນໄລຍະນັ້ນໄດ້ສະເໜີໃຫ້ສານອະນຸຍາໂຕຕຸລາການຕັດສິນບັນຫາທະເລຈີນໃຕ້ນັ້ນກໍພຽງແຕ່ເພື່ອເພີ່ມຜົນງານທາງການເມືອງເທົ່ານັ້ນ.
ທ່ານຟຣີແມນກ່າວຕື່ມວ່າ: ສຳລັບບັນດາຝ່າຍທີ່ກ່ຽວຂ້ອງແລ້ວ, ການເຈລະຈາແລະປຶກສາຫາລືກັນເພື່ອແກ້ໄຂຂໍ້ຂັດແຍ້ງດ້ານອະທິປະໄຕແລະການຂີດແບ່ງເສັ້ນຊາຍແດນຢູ່ທະເລຈີນໃຕ້ນັ້ນເປັນວິທີດີທີ່ສຸດຕະຫຼອດມາເຊິ່ງຈີນມີຈຸດຢືນໃຫ້ດຳເນີນການເຈລະຈາສອງຝ່າຍເພື່ອແກ້ໄຂຂໍ້ຂັດແຍ້ງດ້ວຍສັນຕິວິທີນັ້ນ,ຂ້າພະເຈົ້າເຫັນວ່າເປັນວິທີດຽວທີ່ສາມາດປະຕິບັດໄດ້.