ວັນທີ23ກໍລະກົດນີ້,ກອງປະຊຸມເຈົ້າໜ້າທີ່ອາວຸໂສອາຊຽນ+3ແລະກອງປະຊຸມເຈົ້າໜ້າທີ່ອາວຸໂສຂອງກອງປະຊຸມສຸດຍອດອາຊີຕາເວັນອອກໄດ້ຈັດຂຶ້ນຢູ່ນະຄອນຫຼວງວຽງຈັນ. ທ່ານລິວເຈີ້ນມິນ, ຮອງລັດຖະມົນຕີກະຊວງການຕ່າງປະເທດຈີນໄດ້ໃຫ້ສຳພາດຕໍ່ນັກຂ່າວວ່າ,ກອງປະຊຸມຕ່າງໆຂອງການຮ່ວມມືພາກພື້ນອາຊີຕາເວັນອອກຄວນສຸມໃສ່ການຮ່ວມມື, ຫາກບໍ່ຄວນປຸກປັ່ນຄວາມຂັດແຍ້ງລະຫວ່າງປະເທດຕ່າງໆ, ແລະຄວນຊຸກຍູ້ການແກ້ໄຂຄວາມຂັດແຍ້ງກັນໂດຍຜ່ານການເຈລະຈາ.
ທ່ານລິວເຈີ້ນມິນກ່າວວ່າ, ປັດຈຸບັນນີ້, ອາຊີເປັນພາກພື້ນທີ່ເສດຖະກິດເຕີບໂຕຢ່າງວ່ອງໄວໃນໂລກ,ຕ້ອງຮັກສາສັນຕິພາບແລະສະເຖຍລະພາບຂອງພາກພື້ນ,ຫຼີກລ່ຽງບໍ່ໃຫ້ຄວາມຂັດແຍ້ງລະຫວ່າງປະເທດກະທົບເຖິງການຮ່ວມມື; ຕ້ອງລະວັງເປັນພິເສດຕໍ່ການແຊກແຊງຂອງປະເທດໃຫຍ່ຢູ່ນອກພາກພື້ນ,ເຊິ່ງຈະກະທົບເຖິງການຮ່ວມມື, ຄວາມສາມັກຄີແລະການເຊື່ອມໂຍງໃນພາກພື້ນ. ນອກນີ້,ຕ້ອງເອົາໃຈໃສ່ເປັນພິເສດກ່ຽວກັບການປ້ອງກັນຄວາມປອດໄພຂອງພາກພື້ນ,ໃນນັ້ນຕົ້ນຕໍແມ່ນປ້ອງກັນລັດທິກໍ່ການຮ້າຍ, ລັດທິຫົວຮຸນແຮງທີ່ຈະສ້າງຜົນກະທົບເຖິງຄວາມປອດໄພຂອງພາກພື້ນ.
ໃນເວລາກ່າວເຖິງຄະດີຕັດສິນບັນຫາທະເລຈີນໃຕ້,ທ່ານລິວເຈີ້ນມິນກ່າວວ່າ,ຈີນແລະປະເທດອາຊຽນຫວັງວ່າສືບຕໍ່ຈັດຕັ້ງປະຕິບັດ "ຖະແຫຼງການແຫ່ງການປະພຶດຂອງບັນດາຝ່າຍໃນທະເລຈີນໃຕ້", ຕັ້ງໜ້າຊຸກຍູ້ການເຈລະຈາກ່ຽວກັບລະບຽບແຫ່ງການປະພຶດໃນທະເລຈີນໃຕ້ຫຼື COC. ປະເທດອາຊຽນກໍຮັບຮູ້ຢ່າງຈະແຈ້ງວ່າ, ບັນຫາທະເລຈີນໃຕ້ຕ້ອງກັບຄືນສູ່ຊ່ອງທາງ"ຖະແຫຼງການແຫ່ງການປະພຶດຂອງບັນດາຝ່າຍໃນທະເລຈີນໃຕ້", ເພື່ອແກ້ໄຂບັນຫາດັ່ງກ່າວໂດຍຜ່ານການຮ່ວມມືແລະການປຶກສາຫາລືກັນລະຫວ່າງຈີນກັບປະເທດໃນອາຊຽນ. ໃນຕໍ່ໜ້າ,ຈີນແລະປະເທດອາຊຽນຈະປຶກສາຫາລືກັນຢ່າງແໜ້ນແຟ້ນກວ່າເກົ່າໂດຍປິ່ນອ້ອມລະບຽບແຫ່ງການປະພຶດໃນທະເລຈີນໃຕ້.