ກອງປະຊຸມສະພາມົນຕີຄັ້ງທຳອິດຂອງສູນຄົ້ນຄວ້າທະເລຈີນໃຕ້ຈີນ-ອາຊີຕາເວັນອອກສຽງໃຕ້ໄດ້ໄຂຂຶ້ນໃນວັນທີ 22 ກໍລະກົດນີ້ຢູ່ສິກະໂປໂດຍສະພາມົນຕີດັ່ງກ່າວໄດ້ປຶກສາຫາລືບັນຫາກ່ຽວກັບການສ້າງກົນໄກ, ທິດທາງການຄົ້ນຄວ້າແລະຂົງເຂດການຮ່ວມມືຂອງສູນຄົ້ນຄວ້າທະເລຈີນໃຕ້ຈີນ-ອາຊີຕາເວັນອອກສຽງໃຕ້. ການໄຂກອງປະຊຸມດັ່ງກ່າວເປັນຂີດໝາຍສະແດງໃຫ້ເຫັນວ່າສູນດັ່ງກ່າວໄດ້ປະຕິບັດການຢ່າງເປັນທາງການ.
ຫົວໜ້າສະມາຄົມຜູ້ຊົງຄຸນວຸດທິ, ນັກຄົ້ນຄວ້າຂັ້ນສູງຂອງ 8 ປະເທດຄື ຈີນ ອັນໂດເນເຊຍ,ກຳປູເຈຍ, ໄທ, ມາເລເຊຍ, ສິງກະໂປ, ຟີລິບປິນແລະຫວຽດນາມໄດ້ເຂົ້າຮ່ວມກອງປະຊຸມຄັ້ງນີ້ໃນຖານະເປັນສະມາຊິກສະພາມົນຕີ.
ສູນຄົ້ນຄວ້າທະເລຈີນໃຕ້ຈີນ-ອາຊີຕາເວັນອອກສຽງໃຕ້ເປັນອົງການຈັດຕັ້ງລະຫວ່າງຊາດທີ່ບໍ່ຂຶ້ນກັບລັດຖະບານແລະບໍ່ຫວັງຜົນກຳໄລໂດຍແມ່ນສະຖາບັນຄົ້ນຄວ້າທະເລຈີນໃຕ້ສປຈີນເປັນຜູ້ລິເລີ່ມແລະສະມາຄົມຜູ້ຊົງຄຸນວຸດທິຫຼາຍແຫ່ງທີ່ມີຊື່ສຽງໃນອາຊີຕາເວັນອອກສຽງໃຕ້ເຊັ່ນສູນຄົ້ນຄວ້າຍຸດທະສາດແລະບັນຫາສາກົນອິນໂດເນເຊຍໄດ້ຮ່ວມກັນສ້າງຕັ້ງຂຶ້ນ. ສູນດັ່ງກ່າວໄດ້ສ້າງຕັ້ງຂຶ້ນຢ່າງເປັນທາງການໃນເດືອນມິນາຜ່ານມາຢູ່ແຂວງໄຫຫຼຳສປຈີນ,ຈະໃຊ້ຫຼາຍຮູບແບບໃນການສຸມໃສ່ບັນຫາໃນເຂດທະເລຈີນໃຕ້ເຊັ່ນການອະນຸລັກທະເລ, ຄວາມປອດໄພດ້ານການເດີນເຮືອ, ການຄຸ້ມຄອງວິກິດການແລະການພັດທະນາຮ່ວມກັນ ເພື່ອສ້າງສະພາບແວດລ້ອມສາກົນທີ່ດີແລະກົມກຽວກັນໃຫ້ແກ່ການສົ່ງເສີມການຮ່ວມມືທາງທະເລລະຫວ່າງຈີນກັບບັນດາປະເທດອາຊີຕາເວັນອອກສຽງໃຕ້.