ວັນທີ 24 ກໍລະກົດນີ້, ກອງປະຊຸມລັດຖະມົນຕີຕ່າງປະເທດອາຊຽນຄັ້ງທີ 49 ແລະກອງປະຊຸມຕ່າງໆທີ່ກ່ຽວຂ້ອງໄດ້ຈັດຂຶ້ນຢູ່ນະຄອນຫຼວງວຽງຈັນ ສປປ ລາວຢ່າງເປັນທາງການ. ແລະໃນວັນທີ 25 ກໍລະກົດນີ້ຢູ່ວຽງຈັນ, ເຈົ້າໜ້າທີ່ຈີນຂອງຄະນະຜູ້ແທນຈີນທີ່ບໍ່ປະສົງອອກນາມທ່ານໜຶ່ງກ່າວຕໍ່ນັກຂ່າວວ່າ, ປະເທດອາຊຽນທີ່ຮັກສາຍຸດຕິທຳແລະຄວາມເປັນທຳໃນບັນຫາທະເລຈີນໃຕ້ນັ້ນນັບມື້ມີຫຼາຍຂຶ້ນ, ໂດຍສະໜັບສະໜູນໃຫ້ສອງຝ່າຍແກ້ໄຂຄວາມຂັດແຍ້ງຢູ່ທະເລຈີນໃຕ້ໂດຍຜ່ານການປຶກສາຫາລືແລະການເຈລະຈາສອງຝ່າຍ.
ເຈົ້າໜ້າທີ່ທ່ານນີ້ກ່າວວ່າ, ຄວາມປາຖະໜາຂອງອາຊຽນແລະສະມາຊິກປະເທດອາຊຽນບໍ່ຢາກໃຫ້ບັນຫາທະເລຈີນໃຕ້ກະທົບເຖິງສາຍພົວພັນຮ່ວມມືມິດຕະພາບລະຫວ່າງຈີນກັບອາຊຽນ, ທັງບໍ່ຄວນໃຫ້ຄະຕີຕັດສິນກ່ຽວກັບທະເລຈີນໃຕ້ທີ່ຟີລິບປີນສະເໜີແຕ່ຝ່າຍດຽວສ້າງຜົນກະທົບ ຕໍ່ການຂະຫຍາຍຕົວຂອງສາຍພົວພັນລະຫວ່າງຈີນ-ອາຊຽນ.
ສຳລັບສື່ມວນຊົນຈຳນວນໜຶ່ງມີເຈດຕະນາເອົາຄະດີຕັດສິນກ່ຽວກັບທະເລຈີນໃຕ້ກາຍເປັນ "ຈຸດສຸມ" ຂອງກອງປະຊຸມເທື່ອນີ້, ເຈົ້າໜ້າທີ່ດັ່ງກ່າວກ່າວວ່າ, ຄວາມຈິງແລ້ວບໍ່ແມ່ນບັນຫານີ້, ເຊິ່ງຫົວຂໍ້ຕົ້ນຕໍຂອງກອງປະຊຸມແມ່ນການຮ່ວມມືຄື "ສຸມໃສ່ການຮ່ວມມື, ການພັດທະນາ, ຫາກບໍ່ແມ່ນສຸມໃສ່ບັນຫາທະເລຈີນໃຕ້ແລະຄະດີຕັດສິນທີ່ຟີລິບປີນສະເໜີແຕ່ຝ່າຍດຽວຫຼືຄວາມຂັດແຍ້ງກັນລະຫວ່າງຈີນກັບຟີລິບປີນ."