ຕອນຄ່ຳວັນທີ 24 ກໍລະກົດນີ້ຢູ່ນະຄອນຫຼວງວຽງຈັນ ສປປ ລາວ, ທ່ານ ຫວາງຢີ້ ລັດຖະມົນຕີກະຊວງການຕ່າງປະເທດຈີນໄດ້ພົບປະກັບທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດລາວ.
ໂອກາດດັ່ງກ່າວ, ທ່ານ ສະເຫຼີມໄຊ ກ່າວວ່າ, ລາວແລະຈີນເປັນຄູ່ຮ່ວມມືຍຸດທະສາດຮອບດ້ານໂດຍລາວຍິນດີຕັ້ງໜ້າຊຸກຍູ້ການຮ່ວມມືກັບຈີນກໍຄືສາຍພົວພັນລະຫວ່າງອາຊຽນ-ຈີນໃຫ້ໄດ້ຮັບການພັດທະນາກ້າວໜ້າ. ຂະນະທີ່ຄະດີຕັດສິນບັນຫາທະເລຈີນໃຕ້ໄດ້ສົ່ງຜົນກະທົບຕໍ່ສະຖຽນລະພາບໃນອາຊຽນແລະພາກພື້ນແລ້ວເຊິ່ງປະເທດສະມາຊິກໃນອາຊຽນບໍ່ຕ້ອງການໃຫ້ສະຖານະການເຄັ່ງຕຶງຂຶ້ນ. ແນວໃດກໍດີ, ລາວໃນຖານະເປັນປະທານອາຊຽນ, ຍິນດີປະສານງານກັບຝ່າຍຕ່າງໆ, ຮັກສາຄວາມສາມັກຄີໃນອາຊຽນແລະພາບລວມແຫ່ງສາຍພົວພັນລະຫວ່າງອາຊຽນ-ຈີນ.
ທ່ານ ຫວາງຢີ້ ກ່າວວ່າ, ລາວເປັນປະເທດໃກ້ຄຽງທີ່ສະໜິດແໜ້ນແລະຄູ່ຮ່ວມມືຍຸດທະສາດຂອງຈີນ. ນັບແຕ່ລາວໄດ້ຮັບໜ້າທີ່ເປັນປະທານອາຊຽນເປັນຕົ້ນມາ, ສາຍພົວພັນລະຫວ່າງຈີນ-ອາຊຽນໄດ້ຮັບຄວາມຄືບໜ້າໃໝ່ຕື່ມອີກໂດຍຈີນສະແດງຄວາມຊົມເຊີຍຕໍ່ລາວທີ່ຍຶດໝັ້ນຈຸດຢືນທີ່ຍຸຕິທຳແລະພາວະວິໄສຕໍ່ບັນຫາທະເລຈີນໃຕ້. ພາຍຫຼັງສານອະນຸຍາໂຕຕຸລາການຊົ່ວຄາວປະກາດຄຳຕັດສິນກ່ຽວກັບບັນຫາທະເລຈີນໃຕ້, ມີຫຼາຍປະເທດໄດ້ເຂົ້າໃຈແລະສະໜັບສະໜູນຈຸດຢືນຂອງຈີນນັບມື້ຫຼາຍຂຶ້ນ, ຂະນະດຽວກັນ, ຫາງສຽງທີ່ສົງໄສຄວາມຊອບທຳດ້ວຍກົດໝາຍຂອງຜົນການຕັດສິນດັ່ງກ່າວກໍນັບມື້ຫຼາຍຂຶ້ນໂດຍຫຼາຍປະເທດສະມາຊິກໃນອາຊຽນເຫັນວ່າ, ຄະດີຕັດສິນບັນຫາທະເລຈີນໃຕ້ບໍ່ແມ່ນບັນຫາລະຫວ່າງຈີນ-ອາຊຽນເຊິ່ງບໍ່ຄວນກະທົບຕໍ່ການເສີມຂະຫຍາຍສາຍພົວພັນລະຫວ່າງສອງຝ່າຍ. ແນວໃດກໍດີ, ຈີນຍິນດີສະໜັບສະໜູນລາວໃນຖານະເປັນປະທານກອງປະຊຸມລະດັບລັດຖະມົນຕີອາຊຽນແລະກອງປະຊຸມຕ່າງໆໂດຍການປະສານງານກັບຝ່າຍຕ່າງໆ ສຸມໃສ່ການຮ່ວມມືເພື່ອຮັບປະກັນໃຫ້ກອງປະຊຸມເທື່ອນີ້ປະສົບຜົນສຳເລັດ.