ຕາມຂ່າວ CRI: ວັນທີ 26 ກໍລະກົດນີ້ຢູ່ນະຄອນຫຼວງວຽງຈັນ ສປປ ລາວ, ທ່ານຫວາງຢີ້ ລັດຖະມົນຕີກະຊວງການຕ່າງປະເທດຈີນໄດ້ເຂົ້າຮ່ວມກອງປະຊຸມລັດຖະມົນຕີການຕ່າງປະເທດອາຊຽນແລະຈີນ ຍີ່ປຸ່ນແລະສ ເກົາຫຼີຫຼື 10+3.
ທ່ານຫວາງຢີ້ກ່າວວ່າ, ການຮ່ວມມືລະຫວ່າງອາຊຽນກັບຈີນ ຍີ່ປຸ່ນແລະ ສ ເກົາຫຼີໄດ້ກາຍເປັນກົນໄກໜຶ່ງຂອງການຮ່ວມມືໃນພາກພື້ນອາຊີຕາເວັນອອກທີ່ສຸກງອມທີ່ສຸດ, ມີຖານະສຳຄັນໃນອາຊີກໍຄືເສດຖະກິດແລະການເມືອງຂອງໂລກ. ພາຍໃຕ້ສະຖານະການສາກົນໃນປັດຈຸບັນ, ການຮັກສາທ່ວງທ່າພັດທະນາແລະການຮ່ວມມືຂອງອາຊີຕາເວັນອອກມີຄວາມໝາຍສຳຄັນທີ່ສຸດ. ເຊິ່ງຝ່າຍຕ່າງໆຄວນຍຶດໝັ້ນເສັ້ນທາງເຊື່ອມໂຍງພາກພື້ນເຂົ້າກັນ, ທັງເອົາໃຈໃສ່ຕໍ່ຄວາມສະບາຍໃຈຂອງຝ່າຍຕ່າງໆ, ຍຶດໝັ້ນໃຫ້ຂະບວນການເຊື່ອມໂຍງເຂົ້າກັນສ້າງຜົນປະໂຫຍດໃຫ້ແກ່ຝ່າຍຕ່າງໆ, ຮັບປະກັນໃຫ້ການກໍ່ສ້າງປະຊາຄົມເສດຖະກິດອາຊີຕາເວັນອອກໄປຕາມເສັ້ນທາງຢ່າງປອດໃສ, ໝັ້ນທ່ຽງແລະແບບຍືນຍົງແຕ່ຕົ້ນຕະຫຼອດປາຍ.
ແນວໃດກໍດີ, ທ່ານຫວາງຢີ້ເຫັນວ່າ, ປັດຈຸບັນຄວນແກ້ໄຂການພົວພັນລະຫວ່າງ 10+3ກັບກົນໄກຮ່ວມມືຂອງພາກພື້ນອື່ນໆໃຫ້ດີ, ລວມທັງການແກ້ໄຂການພົວພັນສະເພາະ 10 ກັບ 3 ໃຫ້ດີ, ການຮ່ວມມື 10+3 ຄວນຍຶດໝັ້ນອາຊຽນເປັນແກນນຳ, ສະໜັບສະໜູນການກໍ່ສ້າງປະຊາຄົມອາຊຽນ, ແກ້ໄຂການພົວພັນລະຫວ່າງອັນເກົ່າທີ່ມີທ່າແຮງກັບອັນໃໝ່ໃຫ້ດີ.
ທ່ານ ຫວາງຢີ້ ກ່າວວ່າ: ຕໍ່ໄປ, ອາຊຽນ +3 ຄວນສຸມໃສ່ເພີ່ມທະວີການຮ່ວມມືຄວາມປອດໄພດ້ານການເງິນ, ລົງເລິກການຮ່ວມມືດ້ານການຄ້າແລະການລົງທຶນ, ຊຸກຍູ້ການຮ່ວມມືເພື່ອຫຼຸດຜ່ອນຄວາມທຸກຍາກຈາກການຜະລິດກະສິກຳ, ຊຸກຍູ້ການກໍ່ສ້າງການເຊື່ອມຈອດກັນ, ສຸມໃສ່ຮ່ວມມືເພື່ອຍົກສູງຄວາມສາມາດການຜະລິດຂອງສາກົນ ແລະ ເພີ່ມທະວີການແລກປ່ຽນ ວັດທະນະທຳ-ສັງຄົມ.
ລັດຖະມົນຕີຕ່າງປະເທດຂອງບັນດາປະເທດອາຊຽນລ້ວນແຕ່ໄດ້ຕັ້ງໜ້າຕີລາຄາຕໍ່ຜົນສຳເລັດຂອງການຮ່ວມມື 10+3, ຢືນຢັນຄວາມສຳຄັນຂອງກົນໄກ 10+3 ໃນການຊຸກຍູ້ຂະບວນການເຊື່ອມໂຍງອາຊີຕາເວັນອອກເຂົ້າກັນ. ແນວໃດກໍດີ, ຫວັງວ່າຈີນ,ຍີ່ປຸ່ນແລະ ສ.ເກົາຫຼີ ຈະສືບຕໍ່ເພີ່ມພະລັງແຮງໃຫ້ຫຼາຍກວ່າເກົ່າ, ແບ່ງປັນບົດຮຽນນຳກັນ,ຊ່ວຍບັນດາປະເທດອາຊຽນຫຼຸດຜ່ອນຄວາມແຕກໂຕນກັນດ້ານການພັດທະນາ ແລະ ບັນລຸຄວາມຈະເລີນຮຸ່ງເຮືອງຮ່ວມກັນ. ຂະນະດຽວກັນກໍຫວັງວ່າກອງປະຊຸມຜູ້ນຳ 10+3 ທີ່ວຽງຈັນໃນເດືອນກັນຍາປີນີ້ຈະໄດ້ຮັບໝາກຜົນທີ່ແທ້ຈິງຫຼາຍກວ່າເກົ່າ, ລົງເລິກການຮ່ວມມືໃນຫຼາຍຂົງເຂດເປັນຕົ້ນເສດຖະກິດ, ວັດທະນະທຳ,ການສຶກສາແລະອື່ນໆຕື່ມອີກ ເພື່ອຮັບມືກັບໄພຄຸກຄາມຄວາມໝັ້ນຄົງແບບໃໝ່ເຊັ່ນລັດທິກໍ່ການຮ້າຍເປັນຕົ້ນຢ່າງມີປະສິດທິຜົນ. ລັດຖະມົນຕີຕ່າງປະເທດຍີ່ປຸ່ນ, ສ.ເກົາຫຼີ ລ້ວນແຕ່ກ່າວວ່າຈະສະໜັບສະໜູນການສ້າງປະຊາຄົມອາຊຽນ,ກໍຄືຖານະເປັນແກນນຳຂອງອາຊຽນໃນການຮ່ວມມືຂອງພາກພື້ນ ທັງຫວັງວ່າຈະບັນລຸການພົບປະລະຫວ່າງຜູ້ນຳຈີນ,ຍີ່ປຸ່ນແລະສ.ເກົາຫຼີ ໃນປີນີ້.