ວັນທີ 26 ກໍລະກົດນີ້ພາຍຫຼັງເຂົ້າຮ່ວມກອງປະຊຸມລັດຖະມົນຕີຕ່າງປະເທດຕ່າງໆຂອງການຮ່ວມມືອາຊີຕາເວັນອອກທີ່ຈັດຂຶ້ນຢູ່ນະຄອນຫຼວງວຽງຈັນ ສປປ ລາວ, ທ່ານຫວາງຢີ້ ລັດ ຖະມົນຕີກະຊວງການຕ່າງປະເທດຈີນໄດ້ແຈ້ງສະພາບການແລະໝາກຜົນຂອງກອງປະຊຸມຕໍ່ສື່ມວນຊົນ.
ທ່ານຫວາງຢີ້ກ່າວວ່າ, ຈາກຄວາມພະຍາຍາມຮ່ວມກັນລະຫວ່າງຈີນກັບປະເທດຕ່າງໆໂດຍສະເພາະປະເທດໃນອາຊຽນ, ກອງປະຊຸມລັດຖະມົນຕີຕ່າງປະເທດຕ່າງໆໄດ້ຮັກສາບັນຍາກາດແຫ່ງການສົນທະນາແລະຮ່ວມມືໂດຍຕະຫຼອດ, ກອງປະຊຸມເທື່ອນີ້ປະສົບຜົນສຳເລັດເປັນຢ່າງດີ.
ທ່ານຫວາງຢີ້ກ່າວຕື່ມວ່າ, ຂ້າພະເຈົ້າແລະລັດຖະມົນຕີຕ່າງປະເທດຂອງປະເທດອາຊຽນໄດ້ທົບຄວນຜົນງານອັນໃຫຍ່ຫຼວງຂອງສາຍພົວພັນລະຫວ່າງສອງຝ່າຍຕະຫຼອດ 25 ປີຜ່ານມາ, ທັງໄດ້ຖອດຖອນບົດຮຽນທີ່ມີຜົນດີ, ຮ່ວມກັນອອກແບບແລະວາງແຜນອະນາຄົດການພັດທະນາໃນຕໍ່ໜ້າ. ຈີນແລະປະເທດອາຊຽນລ້ວນແຕ່ເຫັນດີວ່າເປົ້າໝາຍສະຄັນຄືກັນສ້າງປະຊາຄົມຮ່ວມຊາຕາກຳທີ່ແໜ້ນແຟ້ນກວ່າເກົ່າ. ມາຮອດປັດຈຸບັນການຮ່ວມມືລະຫວ່າງຈີນ-ອາຊຽນໄດ້ມີ 2 ເສົາຄ້ຳທັງໃນຄວາມໝັ້ນຄົງທາງການເມືອງແລະການຮ່ວມມືດ້ານເສດຖະກິດການຄ້າ, ຂະນະທີ່ໃນຕໍ່ໜ້າສອງຝ່າຍຈະສ້າງເສົາຄ້ຳທີສາມຄືການແລກປ່ຽນວັດທະນະທຳ, ໂດຍຜ່ານການໄປມາຫາສູ່ກັນລະຫວ່າງປະຊາຊົນໃຫ້ກວ້າງຂວາງກວ່າເກົ່າ, ເຮັດໃຫ້ພື້ນຖານຂອງສັງຄົມມິດຕະພາບຈີນອາຊຽນໝັ້ນແກ່ນ.
ທ່ານ ຫວາງຢີ້ ກ່າວວ່າ: ກ່ຽວກັບບັນຫາທະເລຈີນໃຕ້ທີ່ສື່ມວນຊົນສົນໃຈໂດຍລວມໄປນັ້ນ, ບັນດາລັດຖະມົນຕີຕ່າງປະເທດຂອງປະເທດອາຊຽນກ່າວວ່າ: ອາຊຽນບໍ່ເຂົ້າຂ້າງຝ່າຍໃດໆຕໍ່ຄະດີການຕັດສິນບັນຫາທະເລຈີນໃຕ້ທີ່ຟີລິບປິນຍື່ນຟ້ອງທັງບໍ່ວິຈານ ແລະ ເຫັນວ່ານີ້ແມ່ນບັນຫາລະຫວ່າງຟີລິບປິນແລະຈີນ.
ກ່ຽວກັບເລື່ອງນີ້, ຈີນກັບປະເທດໃນອາຊຽນໄດ້ອອກຖະແຫຼງການຮ່ວມສະເພາະກ່ຽວກັບການຈັດຕັ້ງປະຕິບັດ "ຖະແຫຼງການແຫ່ງການປະພຶດຂອງບັນດາຝ່າຍໃນທະເລຈີນໃຕ້" ຢ່າງຮອບດ້ານແລະມີປະສິດທິຜົນ. ບົນພື້ນຖານແລະທິດທາງຮ່ວມກັນດັ່ງກ່າວ, ຂະນະທີ່ຈີນເນັ້ນປົກປັກຮັກສາອະທິປະໄຕເໜືອດິນແດນຂອງຕົນຢ່າງເດັດດ່ຽວໜຽວແໜ້ນນັ້ນ ຈະຮ່ວມກັບອາຊຽນຮັກສາສັນຕິພາບແລະສະຖຽນລະພາບຂອງພາກພື້ນໃຫ້ດີ, ຄວບຄຸມແລະຄຸ້ມຄອງຄວາມຂັດແຍ້ງກັນໃນບັນຫາທີ່ກ່ຽວຂ້ອງ, ຊຸກຍູ້ສາຍພົວພັນລະຫວ່າງຈີນ-ອາຊຽນໃຫ້ຂະຫຍາຍຕົວຢ່າງຕໍ່ເນື່ອງ.
ທ່ານ ຫວາງຢີ້ ກ່າວຕື່ມວ່າ: ກອງປະຊຸມລັດຖະມົນຕີຕ່າງປະເທດຄັ້ງນີ້ໂດຍສະເພາະກອງປະຊຸມລັດຖະມົນຕີຕ່າງປະເທດຈີນ-ອາຊຽນຫຼື 10+1 ໄດ້ສ້າງພື້ນຖານທີ່ດີໃນການກະກຽມໃຫ້ແກ່ກອງປະຊຸມສຸດຍອດລະນຶກການສ້າງສາຍພົວພັນຄູ່ເຈລະຈາລະຫວ່າງຈີນ-ອາຊຽນຄົບຮອບ 25 ປີທີ່ຈະຈັດຂຶ້ນໃນເດືອນກັນຍາປີນີ້. ເຊື່ອວ່າກອງປະຊຸມສຸດຍອດດັ່ງກ່າວ ຈະປະສົບຜົນສຳເລັດຢ່າງຈົບງາມ ແລະ ສ້າງອະນາຄົດທີ່ດີງາມຕໍ່ການເສີມຂະຫຍາຍສາຍພົວພັນລະຫວ່າງຈີນ-ອາຊຽນ.