ໃນຕອນຄໍ່າວັນທີ 27 ກໍລະກົດນີ້, ໃນງານລ້ຽງສະເຫຼີມສະຫຼອງວັນສ້າງຕັ້ງກອງທັບປົດປ່ອຍປະຊາຊົນຈີນຄົບຮອບ 89 ປີ, ທ່ານພັນເອກພິເສດ ຫວາງຊຽນຢູນ ທູດທະຫານຈີນປະຈໍາຟິລິບປິນໄດ້ຢໍ້າຄືນວ່າ, ປະເທດຈີນຈະແກ້ໄຂບັນຫາທະເລຈີນໃຕ້ດ້ວຍການເຈລະຈາ.
ໃນງານລ້ຽງທີ່ຈັດຂຶ້ນຢູ່ນະຄອນຫຼວງມານິລາ, ທ່ານພັນເອກພິເສດ ຫວາງຊຽນຢູນ ກ່າວວ່າ: ປະເທດຈີນສຸມໃສ່ປົກປັກຮັກສາສັນຕິພາບ ແລະ ສະຖຽນລະພາບຂອງພາກພື້ນ ກໍຄືແກ້ໄຂຂໍ້ຂັດແຍ້ງກ່ຽວກັບອະທິປະໄຕດ້ານດິນແດນ ແລະ ສິດຜົນປະໂຫຍດທາງທະເລດ້ວຍສັນຕິວິທີ. ໃນເວລາຍາວນານມານີ້, ຈາກການຮ່ວມມືລະຫວ່າງຈີນ ກັບ ບັນດາປະເທດບ້ານໃກ້ເຮືອນຄຽງ, ສະພາບລວມຂອງທະເລຈີນໃຕ້ ມີຄວາມໝັ້ນທ່ຽງ. ການເດີນທະເລເສລີຢູ່ທະເລຈີນໃຕ້ບໍ່ຖືກກະທົບແຕ່ຢ່າງໃດ. ການແກ້ໄຂຂໍ້ຂັດແຍ້ງດ້ວຍການເຈລະຈາສອງຝ່າຍແມ່ນຄວາມເຫັນທີ່ເປັນເອກະພາບຂອງຈີນ ກັບ ບັນດາປະເທດໃນອາຊຽນ.
ທ່ານພັນເອກພິເສດ ຫວາງຊຽນຢູນກ່າວຕື່ມວ່າ: ເຊື່ອໝັ້ນວ່າ ຈີນ ແລະ ບັນດາປະເທດໃນອາຊຽນມີຄວາມສາມາດປົກປັກຮັກສາສັນຕິພາບ ແລະ ສະຖຽນລະພາບຂອງພາກພື້ນທະເລຈີນໃຕ້ດ້ວຍການຮ່ວມມື. ສໍາລັບປະເທດຢູ່ນອກພາກພື້ນ, ຄວນເສີມຂະຫຍາຍບົດບາດສ້າງສັນໃນກິດຈະການດັ່ງກ່າວ ແລະ ພວກຂ້າພະເຈົ້າບໍ່ອະນຸຍາດໃຫ້ມີເຫດການກໍ່ຄວາມວຸ້ນວາຍເກີດຂຶ້ນຢູ່ພາກພື້ນນີ້.
 |
