ວັນທີ 28 ກໍລະກົດນີ້ໃນໂອກາດຕອບຄຳຖາມຂອງນັກຂ່າວກ່ຽວກັບຄະດີຕັດສິນບັນຫາທະເລຈີນໃຕ້ທີ່ຟີລິບປີນຍື່ນຟ້ອງແຕ່ຝ່າຍດຽວນັ້ນ, ທ່ານຢາງຢູຈຸ່ນ, ໂຄສົກກະຊວງປ້ອງກັນປະເທດຈີນກ່າວວ່າ, ກອງທັບຈີນຈະປົກປ້ອງຄວາມໝັ້ນຄົງແລະສິດອຳນາດອະທິປະໄຕກໍຄືຜົນປະໂຫຍດທາງທະເລຂອງປະເທດຕົນຢ່າງເດັດດ່ຽວ, ທັງຮັກສາສັນຕິພາບແລະສະຖຽນລະພາບຂອງພາກພື້ນຢ່າງເດັດດ່ຽວແລະຮັບມືກັບການຂົ່ມຂູ່ແລະການທ້າທາຍຕ່າງໆຢ່າງເດັດດ່ຽວ.
ທ່ານຢາງຢູຈຸ່ນຊີ້ໃຫ້ເຫັນວ່າ, ຈີນມີສິດອຳນາດອະທິປະໄຕຕໍ່ເກາະຕ່າງໆແລະເຂດທະເລຢູ່ໃກ້ເກາະດັ່ງກ່າວຢູ່ທະເລຈີນໃຕ້. ການຮັກສາອະທິປະໄຕແລະຜືນແຜ່ນດິນອັນຄົບຖ້ວນຂອງຊາດ, ຮັກສາສິດຜົນປະໂຫຍດທາງທະເລຂອງຊາດແມ່ນຄວາມຮັບຜິດຊອບຂອງກອງທັບຈີນທີ່ປະຕິເສດບໍ່ໄດ້. ຕໍ່ບັນຫາການຕັ້ງເຂດຈຳແນກປ້ອງກັນອາກາດຢູ່ທະເລຈີນໃຕ້ແລະກອງທັບອາກາດຈີນໄປລາດຕະເວນຢູ່ທະເລຈີນໃຕ້ເປັນປົກກະຕິນັ້ນ, ທ່ານກ່າວວ່າ, ການຕັ້ງເຂດຈຳແນກປ້ອງກັນອາກາດແມ່ນສິດຂອງປະເທດທີ່ມີອະທິປະໄຕ, ຈະຕັ້ງເຂດຈຳແນກປ້ອງກັນອາກາດຫຼືບໍ່ແລະຕັ້ງໃນເວລາໃດ, ກໍຂຶ້ນກັບວ່າຈີນໄດ້ຜະເຊີນການຂົ່ມຂູ່ທາງອາກາດຫຼືບໍ່ແລະລະດັບການຂົ່ມຂູ່ທາງອາກາດໜັກເບົາພຽງໃດ. ການນີ້ກອງທັບຈີນສົ່ງກຳປັ່ນແລະຍົນໄປລາດຕະເວນຢູ່ທະເລຈີນໃຕ້ເປັນປົກກະຕິນັ້ນ, ກໍເພື່ອຮັກສາຄວາມໝັ້ນຄົງສິດອຳນາດອະທິປະໄຕແລະສິດຜົນປະໂຫຍດທາງທະເລຂອງຊາດ.
 |
