ພາຍຫຼັງອາເມລິກາແລະ ສ ເກົາຫຼີປະກາດຈະຕິດຕັ້ງລະບົບສະກັດລູກສອນໄຟນໍາວິຖີ THAAD ຢູ່ ສ ເກົາຫຼີເປັນຕົ້ນມາ, ປະຊາຊົນ ສ ເກົາຫຼີໄດ້ຄັດຄ້ານການຕັດສິນດັ່ງກ່າວຢ່າງບໍ່ຢຸດຢັ້ງ. ຂະນະທີ່ໃນໂອກາດໃຫ້ສຳພາດຕໍ່ນັກຂ່າວ, ທ່ານຢາງຊີຢີ, ນັກຄົ້ນຄວ້າຂອງສະຖາບັນຄົ້ນຄວ້າບັນຫາສາກົນຈີນກ່າວວ່າ, ການທີ່ລັດຖະບານ ສ ເກົາຫຼີຕິດຕັ້ງລະບົບ THAAD ຈະທຳລາຍຄວາມໄວ້ເນື້ອເຊື່ອໃຈທາງຍຸດທະສາດລະຫວ່າງຈີນກັບສ ເກົາຫຼີຢ່າງໜັກໜ່ວງ.
ທ່ານຢາງຊີຢີເຫັນວ່າ, ສາເຫດຕົ້ນຕໍທີ່ປະຊາຊົນ ສ ເກົາຫຼີປະຕິເສດລະບົບ THAAD ທີ່ລັດຖະບານປະເທດຕົນໂຄສະນາເຖິງຂີດຄວາມສາມາດປ້ອງກັນປະເທດນັ້ນຍ້ອນມີຈຸດປະສົງສຳຄັນກໍເພື່ອປ້ອງກັນຜົນປະໂຫຍດຂອງອາເມລິກາເທົ່ານັ້ນ, ໂດຍບໍ່ມີຜົນປະໂຫຍດໃດໆຕໍ່ການຮັກສາຄວາມໝັ້ນຄົງຂອງປະເທດ, ກົງກັນຂ້າມການຕິດຕັ້ງລະບົບດັ່ງກ່າວຈະເຮັດໃຫ້ ສ ເກົາຫຼີມີຄວາມສ່ຽງຫຼາຍກວ່າເກົ່າ.
ສຳລັບສາຍພົວພັນລະຫວ່າງຈີນກັບ ສ ເກົາຫຼີນັ້ນ, ທ່ານຢາງຊີຢີເຫັນວ່າ, ນອກຈາກການກະທຳຕາມລຳພັງແຕ່ຝ່າຍດຽວຂອງ ສ ເກົາຫຼີໄດ້ທຳລາຍຄວາມໄວ້ເນື້ອເຊື່ອໃຈທາງຍຸດທະສາດລະຫວ່າງສອງປະເທດຢ່າງໜັກໜ່ວງແລ້ວ, ຍັງຈະເຮັດໃຫ້ການຮ່ວມມືລະຫວ່າງສອງປະເທດທັງຂົງເຂດການເມືອງ, ເສດຖະກິດການຄ້າແລະວັດທະນະທຳບໍ່ສາມາດລົງເລິກແລະພັດທະນາຕື່ມອີກ, ລວມສາຍພົວພັນໄດ້ຮັບການພັດທະນາມາເປັນຢ່າງດີນັ້ນກໍອາດຈະຫຼອດໜ້ອຍຖອຍລົງ.
 |
