ວັນທີ 3 ສິງຫານີ້, ທ່ານ ຫວາງຢີ້ ລັດຖະມົນຕີກະຊວງການຕ່າງປະເທດຈີນໄດ້ຍົກໃຫ້ເຫັນສາຍພົວພັນລະຫວ່າງຈີນ-ອາຊຽນພາຍຫຼັງພົບປະກັບທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດລາວແລະຮ່ວມກັນຖະແຫຼງຂ່າວວ່າ, ຈີນຈະພະຍາຍາມຮ່ວມກັບບັນດາປະເທດໃນອາຊຽນ ເພື່ອຊຸກຍູ້ສາຍພົວພັນລະຫວ່າງຈີນ-ອາຊຽນໃຫ້ກ້າວຂຶນສູ່ລະດັບໃໝ່.
ທ່ານ ຫວາງຢີ້ ກ່າວວ່າ, ຈີນຖືອາຊຽນເປັນບູລິມະສິດໃນນະໂຍບາຍການຕ່າງປະເທດກັບປະເທດອ້ອມຂ້າງຂອງຕົນຢ່າງສະເໝີຕົ້ນສະເໝີປາຍ ທັງເດັດດ່ຽວສະໜັບສະໜູນການສ້າງປະຊາຄົມອາຊຽນ, ສະໜັບສະໜູນຖານະບົດບາດເປັນໃຈກາງຂອງອາຊຽນໃນການຮ່ວມມືຂອງພາກພື້ນແລະສະໜັບສະໜູນອາຊຽນເສີມຂະຫຍາຍບົດບາດໃນວຽກງານພາກພື້ນແລະສາກົນໃຫ້ຫຼາຍກວ່າເກົ່າ. ປັດຈຸບັນ, ຈີນແລະບັນດາປະເທດໃນອາຊຽນລວມທັງລາວພວມເລັ່ງກະກຽມກອງປະຊຸມສຸດຍອດເພື່ອລະນຶກຈີນ-ອາຊຽນສ້າງຕັ້ງສາຍພົວພັນຄູ່ເຈລະຈາຄົບຮອບ 25 ປີທີ່ຈະຈັດຂຶ້ນໃນເດືອນກັນຍາປີນີ້ ແລະເພື່ອພະຍາຍາມອອກຖະແຫຼງການຮ່ວມຂອງກອງປະຊຸມດັ່ງກ່າວກໍຄື "ຖະແຫຼງການຮ່ວມວ່າດ້ວຍການຮ່ວມມືເພີ່ມຂີດຄວາມສາມາດການຜະລິດລະຫວ່າງຈີນ-ອາຊຽນ" ລວມທັງຮັບຮອງແຜນການແລກປ່ຽນການສຶກສາ 5 ປີລະຫວ່າງຈີນ-ອາຊຽນ. ແນວໃດກໍດີ, ຈີນໄດ້ລິເລີ່ມເອົາປີ 2017 ເປັນ "ປີແຫ່ງການຮ່ວມມືການທ່ອງທ່ຽວຈີນ-ອາຊຽນ" ຫວັງເສີມຂະຫຍາຍການແລກປ່ຽນແລະຮ່ວມມືດ້ານວັດທະນະທຳ ເພື່ອສ້າງເສົາຄ້ຳໃໝ່ໃນການຮ່ວມມືລະຫວ່າງສອງຝ່າຍຕື່ມອີກ. ນອກນີ້, ຈີນຈະສະໜັບສະໜູນລາວຈັດກອງປະຊຸມ ຜູ້ນຳການຮ່ວມມືອາຊີຕາເວັນອອກແລະກອງປະຊຸມທີ່ກ່ຽວຂ້ອງອື່ນໆໃຫ້ດີຈົນສຸດຄວາມສາມາດຂອງຕົນ.