ວັນທີ 4 ສິງຫານີ້, ທ່ານກ່າວຫູເສິງ ລັດຖະມົນຕີກະຊວງການຄ້າຈີນພ້ອມຄະນະຜູ້ແທນເສດຖະກິດການຄ້າຂອງລັດຖະບານຈີນໄດ້ພົບປະຫາລືກັບທ່ານນາງເຂັມມະນີ ພົນເສນາ ລັດຖະມົນຕີກະຊວງອຸດສາຫະກຳແລະການຄ້າທັງເປັນປະທານຄະນະກຳມະການຮ່ວມມືລາວ-ຈີນ, ແລະທ່ານສຸພັນ ແກ້ວມີໄຊ, ລັດຖະມົນຕີກະຊວງແຜນການແລະການລົງທຶນລາວໃນໂອກາດເດີນທາງຢ້ຽມຢາມລາວ.
ໃນໂອກາດພົບປະຫາລືກັບທ່ານນາງເຂັມມະນີນັ້ນ, ທ່ານກ່າວຫູເສິງກ່າວວ່າ, ການຮ່ວມມືເສດຖະກິດການຄ້າລະຫວ່າງຈີນກັບລາວມີຄວາມຄືບໜ້າຫຼາຍໃນຫຼາຍປີຜ່ານມາ, ຂະນະທີ່ປັດຈຸບັນຈີນແມ່ນປະເທດທີ່ລົງທຶນເປັນອັນດັບທີໜຶ່ງແລະຄູ່ການຄ້າໃຫຍ່ອັນດັບທີສອງຂອງລາວ. ແນວໃດກໍດີໃນຫຼາຍປີຜ່ານມາ, ຈີນໄດ້ນຳເຂົ້າຜະລິດຕະພັນກະສິກຳຈາກລາວເພີ່ມຂຶ້ນຢ່າງຕໍ່ເນື່ອງ, ການລົງທຶນຢູ່ລາວກໍເພີ່ມຂຶ້ນຢ່າງວ່ອງໄວ, ເຊິ່ງບັນລຸຍອດມູນຄ່າການລົງທຶນ ປະມານ 7 ຕື້ໂດລາສະຫະລັດ. ເຂດຮ່ວມມືເສດຖະກິດບໍ່ຫານ-ບໍ່ເຕັນໄດ້ລົງນາມໃນແຜນການລວມຮ່ວມກັນແລ້ວ, ແລະໄດ້ກາຍເປັນຈຸດຮຸ່ງໃສໃໝ່ຂອງການຮ່ວມມືລະຫວ່າງຈີນລາວ. ທ່ານກ່າວຫູເສິງຍັງໄດ້ສະເໜີຂໍ້ລິເລີ່ມກ່ຽວກັບການເພີ່ມທະວີການຮ່ວມມືເສດຖະກິດການຄ້າລະຫວ່າງສອງປະເທດ.
ທ່ານນາງເຂັມມະນີໄດ້ກ່າວຂອບໃຈຕໍ່ການສະໜັບສະໜູນຂອງຈີນໃນໄລຍະຍາວ, ຍິນດີສືບຕໍ່ປະສານສົມທົບກັບຈີນຢ່າງໃກ້ຊິດ, ເພີ່ມທະວີການຮ່ວມມືລະຫວ່າງສອງຝ່າຍໃນຂົງເຂດການຄ້າ, ການລົງທຶນແລະປັບປຸງກົນໄກປະສານງານຂອງຄະນະການມະການຮ່ວມມືເສດຖະກິດການຄ້າລາວ-ຈີນ. ລາວຈະເສີມຂະຫຍາຍບົດບາດເປັນປະເທດປະທານອາຊຽນຢ່າງແຂງແຮງ, ຕັ້ງໜ້າຊຸກຍູ້ການຮ່ວມມືເສດຖະກິດການຄ້າລະຫວ່າງອາຊຽນກັບຈີນພາຍໃຕ້ຂອບພາກພື້ນແລະອະນຸພາກພື້ນ. ພາຍຫຼັງການຫາລື, ສອງຝ່າຍໄດ້ລົງນາມໃນເອກະສານຮ່ວມມື 3 ສະບັບ.
ຂະນະທີ່ການຫາລືກັບທ່ານສຸພັນນັ້ນ, ສອງຝ່າຍໄດ້ແລກປ່ຽນຄວາມເຫັນຢ່າງເລິກເຊິ່ງກ່ຽວກັບບັນຫາທີ່ສົນໃຈຮ່ວມກັນເຊັ່ນການຮ່ວມມືເສດຖະກິດເຕັກນິກລະຫວ່າງສອງປະເທດ, ການກໍ່ສ້າງເຂດຮ່ວມມືເສດຖະກິດຂ້າມຊາດແລະອື່ນໆ.