ຕາມຂ່າວCRI: ວັນທີ 5 ສິງຫານີ້, ທ່ານ ກ່າວຫູເສີງ ລັດຖະມົນຕີກະຊວງການຄ້າຈີນໄດ້ພົບປະກັບທ່ານ ຣາມອນ ໂລເປສ໌ ລັດຖະມົນຕີກະຊວງອຸດສາຫະກຳການຄ້າຟີລິບປິນໃນໂອກາດເຂົ້າຮ່ວມກອງປະຊຸມລັດຖະມົນຕີເສດຖະກິດການຄ້າອາຊີຕາເວັນອອກທີ່ຈັດຂຶ້ນຢູ່ນະຄອນຫຼວງວຽງຈັນ ສປປ ລາວ. ຫຼັງສຳເລັດການພົບປະ, ທ່ານ ກ່າວຫູເສີງ ກ່າວໃນເວລາໃຫ້ສຳພາດຕໍ່ນັກຂ່າວວ່າ: ສອງຝ່າຍເປັນເອກະພາບກັນຈະຟື້ນຟູກົນໄກປະສານງານຂອງຄະນະກຳມະການຮ່ວມເສດຖະກິດການຄ້າສອງຝ່າຍຄືນໃໝ່ໂດຍໄວ ແລະ ໄດ້ຕົກລົງຈະຟື້ນຟູການດຳເນີນກອງປະຊຸມຄະນະກຳມະການຮ່ວມເສດຖະກິດການຄ້າສອງຝ່າຍຄັ້ງທີ 28 ຄືນໃໝ່ກ່ອນທ້າຍປີນີ້.
ທ່ານ ກ່າວຫູເສີງ ກ່າວຕື່ມວ່າ: ບັນຫາທະເລຈີນໃຕ້ແມ່ນບັນຫາ ຕົກຄ້າງລະຫວ່າງຈີນ-ຟີລິບປິນມາໂດຍຕະຫຼອດ, ແຕ່ບໍ່ແມ່ນສິ່ງທັງໝົດໃນສາຍພົວພັນລະຫວ່າງສອງປະເທດ. ພວກເຮົາມີຄວາມສາມາດ,ມີສະຕິປັນຍາແກ້ໄຂບັນຫາດັ່ງກ່າວຢ່າງເໝາະສົມໂດຍຜ່ານການປຶກສາຫາລືສອງຝ່າຍກໍຄືກົນໄກປຶກສາຫາລືລະຫວ່າງຈີນ-ອາຊຽນທີ່ມີຢູ່ໃນປັດຈຸບັນ,ຮູບການແກ້ໄຂແບບນີ້ຈະບໍ່ກະທົບເຖິງການຮ່ວມມືດ້ານເສດຖະກິດການຄ້າລະຫວ່າງຈີນ-ຟີລິບປິນ. ແນວໃດກໍດີ, ລັດຖະບານຊຸດໃໝ່ຂອງຟີລິບປິນເຄີຍໄດ້ກ່າວມາຫຼາຍເທື່ອແລ້ວວ່າຈະປັບປຸງສາຍພົວພັນລະຫວ່າງສອງປະເທດໃຫ້ດີຂຶ້ນໂດຍຜ່ານການສົນທະນາໂດຍກົງ ເຊິ່ງນີ້ໄດ້ສ້າງເງື່ອນໄຂທີ່ດີໃຫ້ແກ່ການຮ່ວມມືລະຫວ່າງສອງຝ່າຍໃນຂົງເຂດຕ່າງໆ.