ຕາມຂ່າວ CRI: ວັນທີ 5 ສິງຫານີ້, ກອງປະຊຸມລະດັບລັດຖະມົນຕີຄັ້ງທີ 4 ກ່ຽວກັບ "ສັນຍາການພົວພັນຄູ່ຮ່ວມເສດຖະກິດຮອບດ້ານຂອງພາກພື້ນ" ຫຼື RCEP ໄດ້ຈັດຂຶ້ນຢູ່ນະຄອນຫຼວງວຽງຈັນ ສປປ ລາວ ໂດຍລັດຖະມົນຕີເສດຖະກິດ-ການຄ້າຈາກ 10 ປະເທດອາຊຽນ, ຈີນ, ອົສຕຣາລີ, ອິນເດຍ, ຍີ່ປຸ່ນ, ສ.ເກົາຫຼີແລະນູແວນເຊລັງເຂົ້າຮ່ວມ. ຂະນະທີ່ທ່ານ ກ່າວຫູເສິງ ລັດຖະມົນຕີກະຊວງການຄ້າຈີນກ່າວວ່າ, ຈີນສະໜັບສະໜູນອາຊຽນນຳພາຂະບວນການເຈລະຈາ RCEP.
ທ່ານ ກ່າວຫູເສິງ ກ່າວວ່າ, ພາຍຫຼັງບັນລຸສັນຍາ RCEP ແລ້ວຈະເປັນຜົນດີຕໍ່ການຊຸກຍູ້ການເຕີບໂຕດ້ານການຄ້າແລະການລົງທຶນລະຫວ່າງບັນດາປະເທດສະມາຊິກທັງຈະເປັນການເພີ່ມພະລັງແຮງໃໝ່ເພື່ອການເຕີບໂຕຂອງເສດຖະກິດໂລກກໍຄືຍົກສູງຖານະບົດບາດຂອງອາຊີຕາເວັນອອກໃນເສດຖະກິດໂລກ. ຈາກນີ້ຈີນຈຶ່ງມີຂໍ້ສະເໜີ 4 ຂໍ້ຄື: ພະຍາຍາມສຳເລັດການເຈລະຈາ RCEP ໂດຍໄວ; ຄຳນຶງເຖິງຄວາມເປັນຫ່ວງຂອງກັນແລະກັນ; ຊຸກຍູ້ການເຈລະຈາໂດຍລວມແລະດຸນດ່ຽງແລະສະໜັບສະໜູນອາຊຽນນຳພາການເຈລະຈາ. ນອກນີ້, ທ່ານ ກ່າວຫູເສິງ ຊີ້ໃຫ້ເຫັນວ່າ, ຈີນເດັດດ່ຽວສະໜັບສະໜູນແລະຊຸກຍູ້ RCEP ໂດຍຍິນດີພະຍາຍາມຮ່ວມກັບຝ່າຍຕ່າງໆໃຊ້ທ່າທີທີ່ເປັນການສ້າງສັນແລະຄ່ອງແຄ້ວເພື່ອບັນລຸສັນຍາແບບຕ່າງຝ່າຍຕ່າງມີຜົນປະໂຫຍດໂດຍໄວ.
ການເຈລະຈາ RCEP ໄດ້ເລີ່ມຕົ້ນຢ່າງເປັນທາງການເມື່ອເດືອນພະຈິກປີ 2012 ໂດຍມີເປົ້າໝາຍບັນລຸສັນຍາການພົວພັນຄູ່ຮ່ວມເສດຖະກິດທີ່ທັນສະໄໝ, ຮອບດ້ານ, ມີຄຸນນະພາບແລະຕ່າງຝ່າຍຕ່າງມີຜົນປະໂຫຍດ ແລະຫວັງຈະສ້າງເຂດການຄ້າເສລີທີ່ກວມປະຊາກອນຫຼາຍກວ່າໝູ່, ພາກພື້ນກວ້າງກວ່າໝູ່, ມີປະເທດສະມາຊິກຫຼາຍກວ່າໝູ່ແລະພັດທະນາຄຶກຄັກກວ່າໝູ່ຂອງໂລກ. ຂະນະທີ່ປີ 2015, ຈີນແລະປະເທດສະມາຊິກ RCEP ບັນລຸຍອດມູນຄ່າການຄ້າດ້ານສິນຄ້າເຖິງ 1 ພັນ 200 ຕື້ໂດລາສະຫະລັດກວມ 30.8% ຂອງຈີນ, ການຄ້າດ້ານການບໍລິການກໍບັນລຸ 162 ຕື້ 640 ລ້ານໂດລາສະຫະລັດ, ກວມ 22.8% ແລະການລົງທຶນຕໍ່ຕ່າງປະເທດ 13 ຕື້ໂດລາສະຫະລັດ, ກວມ 11%.
ພາຍໃຕ້ສະພາບທີ່ເສດຖະກິດໃນປັດຈຸບັນຜະເຊີນກັບຄວາມສ່ຽງ, RCEP ມີຄວາມສາມາດບົ່ມຊ້ອນທີ່ເປັນກຳລັງຊຸກຍູ້ການເຕີບໂຕຂອງເສດຖະກິດ, ລັດຖະມົນຕີບັນດາທ່ານໄດ້ຢ້ຳຄວາມສຳຄັນຂອງສັນຍາ RCEP ທີ່ມີຕໍ່ເສດຖະກິດໂລກ ຂະນະທີ່ໄດ້ສັງເກດເຫັນວ່າພາຍໃຕ້ສະພາບທີ່ເສດຖະກິດໂລກໃນປີ 2015 ມີຄວາມບໍ່ໝັ້ນທ່ຽງ, ການພັດທະນາເສດຖະກິດຂອງປະເທດສະມາຊິກ RCEP ກໍສາມາດຮັກສາຄວາມໝັ້ນທ່ຽງ ແລະຍອດມູນຄ່າການຜະລິດມີເຖິງ 22.400 ຕື້ໂດລາສະຫະລັດ, ກວມ 30,6% ຂອງຍອດມູນຄ່າການຜະລິດຂອງໂລກ. ຍອດມູນຄ່າການຄ້າຂອງບັນດາປະເທດ RCEP ມີເຖິງ 11.900 ຕື້ໂດລາສະຫະລັດ ແລະສາມາດດຶງດູດທຶນຕ່າງປະເທດ 329 ຕື້ 600 ລ້ານໂດລາສະຫະລັດ. ໃນຊຸມປີຜ່ານມາ, ຈັງຫວະການເຕີບໂຕສະເລ່ຍຂອງລວມຍອດຜະລິດຕະພັນພາຍໃນປະເທດຫຼື GDP ຂອງປະເທດສະມາຊິກ RCEP ຫຼາຍກວ່າຈັງຫວະການເຕີບໂຕຂອງໂລກ 30% . ໂດຍພິຈາລະນາເຖິງຄວາມສາມາດບົ່ມຊ້ອນຂອງ RCEP ໃນການປັບປຸງສະພາບເສດຖະກິດຂອງປະເທດສະມາຊິກໃນອະນາຄົດໃຫ້ດີຂຶ້ນ,ຊຸກຍູ້ເສດຖະກິດພາກພື້ນໃຫ້ເຊື່ອມໂຍງເຂົ້າກັນ,ຍົກລະດັບຊີວິດການເປັນຢູ່ຂອງປະຊາຊົນໃນໂລກເກືອບເຄິ່ງໜຶ່ງໃຫ້ສູງຂຶ້ນແລະອື່ນໆ, ລັດຖະມົນຕີບັນດາທ່ານໄດ້ຢ້ຳຄືນຄຳໝັ້ນສັນຍາຂອງຕົນທີ່ຈະສຳເລັດການເຈລະຈາໂດຍໄວເພື່ອບັນລຸສັນຍາການຄ້າເສລີໃນພາກພື້ນທີ່ມີຄຸນນະພາບ,ຕ່າງຝ່າຍຕ່າງມີຜົນປະໂຫຍດແລະມີຄວາມໝາຍດ້ານການຄ້າ.
ປັດຈຸບັນ, ຝ່າຍຕ່າງໆໄດ້ດຳເນີນການເຈລະຈາ 13 ຮອບແລ້ວ. ແລະຈະດຳເນີນການເຈລະຈາຮອບທີ 14 ຢູ່ນະຄອນໂຮຈິມິນປະເທດຫວຽດນາມແຕ່ວັນທີ 10 ຫາວັນທີ 19 ສິງຫານີ້ ແລະຮອບທີ 15 ຈະຈັດຂຶ້ນຢູ່ນະຄອນທຽນສິນ ສປ ຈີນແຕ່ວັນທີ 16 ຫາວັນທີ 22 ຕຸລາປີນີ້.