ວັນທີ 9 ສິງຫານີ້, ທ່ານນາງ ຮວ້າຊຸ່ນຢີງ ໂຄສົກກະຊວງການຕ່າງປະເທດຈີນກ່າວວ່າ: ທ່ານ ຫວາງຢີ້ ລັດຖະມົນຕີກະຊວງການຕ່າງປະເທດຈີນຈະຢ້ຽມຢາມອິນເດຍຢ່າງເປັນທາງການໃນອາທິດນີ້ ເພື່ອແລກປ່ຽນຄວາມຄິດຄວາມເຫັນກ່ຽວກັບການຈະຮ່ວມກັນຈັດກອງປະຊຸມສຸດຍອດຫັງໂຈ່ວ G20 ແລະ ກອງປະຊຸມເຈລະຈາຜູ້ນຳປະເທດບຣິກສ໌ໃຫ້ດີ ລວມທັງການເຕົ້າໂຮມສະຕິປັນຍາແລະຊຸກຍູ້ກອງປະຊຸມສຸດຍອດໃຫ້ປະສົບຜົນສຳເລັດ.
ທ່ານນາງ ຮວ້າຊຸ່ນຢີງ ກ່າວວ່າ: ຈີນແລະອິນເດຍໃນຖານະເປັນປະເທດທີ່ພວມພັດທະນາແລະປະເທດທີ່ຈະເລີນໃໝ່ໃຫຍ່ທີ່ສຸດ ແລະຈີນຈະຈັດກອງປະຊຸມສຸດຍອດຫັງໂຈ່ວກຸ່ມ G20 ໃນເດືອນໜ້າ, ຂະນະທີ່ອິນເດຍກໍຈະຈັດກອງປະຊຸມເຈລະຈາຜູ້ນຳປະເທດບຣິກສ໌ໃນເດືອນຕຸລາປີນີ້. ຈຸດປະສົງສຳຄັນຂອງການຢ້ຽມຢາມຂອງທ່ານຫວາງຢີ້ໃນຄັ້ງນີ້ກໍເພື່ອແລກປ່ຽນຄວາມຄິດຄວາມເຫັນກັບອິນເດຍກ່ຽວກັບການຮ່ວມກັນຈັດກອງປະຊຸມສຸດຍອດທີ່ສຳຄັນສອງຄັ້ງດັ່ງກ່າວໃຫ້ດີ, ເຕົ້າໂຮມສະຕິປັນຍາ,ຊຸກຍູ້ກອງປະຊຸມສຸດຍອດໃຫ້ປະສົບຜົນສຳເລັດ.
ທ່ານນາງ ຮວ້າຊຸ່ນຢີງ ກ່າວຕື່ມວ່າ: ນອກນີ້ຍັງຈະປະສານງານກັບອິນເດຍຢ່າງເລິກເຊິ່ງກ່ຽວກັບການຈະຈັດຕັ້ງປະຕິບັດຄວາມເປັນເອກະພາບລະຫວ່າງຜູ້ນຳຂອງສອງປະເທດແລະເພີ່ມທະວີການຮ່ວມມືແບບຕ່າງຝ່າຍຕ່າງມີຜົນປະໂຫຍດລະຫວ່າງສອງຝ່າຍໃນຂົງເຂດຕ່າງໆແນວໃດ ເພື່ອຊຸກຍູ້ສາຍພົວພັນລະຫວ່າງສອງປະເທດໃຫ້ສືບຕໍ່ພັດທະນາໄປຕາມທິດທາງທີ່ຄາດໄວ້.
 |
