ເວັບໄຊ Voice of Vietnam ລາຍງານວ່າ: ໃນອາທິດແລ້ວນີ້ຢູ່ເມືອງວິງຂອງຫວຽດນາມ, ກະຊວງໂຍທາທິການແລະຂົນສົ່ງລາວແລະກະຊວງຄົມມະນາຄົມຂົນສົ່ງຫວຽດນາມໄດ້ເປັນເອກະສັນກັນກ່ຽວກັບແຜນການກໍ່ສ້າງທາງດ່ວນແຕ່ນະຄອນຫຼວງວຽງຈັນຫານະຄອນຫຼວງຮາໂນ້ຍ.
ຂ່າວແຈ້ງວ່າ, ຕາມແຜນການກໍ່ສ້າງ, ທາງດ່ວນດັ່ງກ່າວຍາວ 750 ກິໂລແມັດ, ໂດຍລົດສາມາດແລ່ນດ້ວຍຄວາມໄວ 80-120 ກິໂລແມັດຕໍ່ຊົ່ວໂມງ. ແລະຄາດວ່າຈະລົງທຶນຫຼາຍກວ່າ 9 ຕື້ 700 ລ້ານໂດລາສະຫະລັດ.
ທ່ານເລດິງທໍ ຮອງລັດຖະມົນຕີກະຊວງຄົມມະນາຄົມຂົນສົ່ງຫວຽດນາມກ່າວວ່າ, ການກໍ່ສ້າງທາງດ່ວນດັ່ງກ່າວມີຄວາມໝາຍສຳຄັນທີ່ສຸດຕໍ່ການປະຕິບັດສັນຍາຮ່ວມມືສອງຝ່າຍແລະສັນຍາເຊື່ອມຈອດກັນລະຫວ່າງລັດຖະບານສອງປະເທດ. ສະນັ້ນ, ສອງຝ່າຍຄວນພິຈາລະນາຢ່າງລະອຽດເຊັ່ນຈຸດຜ່ານ, ຂະໜາດ, ມູນຄ່າການລົງທຶນແລະອື່ນໆ, ເພື່ອປັບປຸງແຜນການໃຫ້ສົມບູນໂດຍໄວ. ແລະສະເໜີແຜນການກໍ່ສ້າງທາງດ່ວນດັ່ງກ່າວໃຫ້ລັດຖະບານສອງປະເທດພິຈາລະນາໃນຕົ້ນເດືອນໜ້າ.