ໜັງສືພິມເຢີນມິນຢື້ປ້າວຂອງຈີນໃຫ້ຮູ້ວ່າ: ການຖະແຫຼງຂ່າວງານວາງສະແດງສິນຄ້າຈີນ-ອາຊຽນຄັ້ງທີ 13 ໄດ້ຈັດຂຶ້ນຢູ່ນະຄອນຫຼວງບາງກອກປະເທດໄທໃນວັນທີ 9 ສິງຫານີ້ ໂດຍທ່ານ ຈ່າງ ເພີ້ຍຕຸ່ງ ທີ່ປຶກສາດ້ານເສດຖະກິດການຄ້າຂອງສະຖານທູດຈີນປະຈຳໄທ, ເຈົ້າໜ້າທີ່ຮັບຜິດຊອບງານວາງສະແດງກົມສົ່ງເສີມການຄ້າສາກົນຂອງກະຊວງການຄ້າໄທແລະເຈົ້າໜ້າທີ່ກ່ຽວຂ້ອງໄດ້ເຂົ້າຮ່ວມລວມທັງຜູ້ຕາງໜ້າສະມາຄົມການຄ້າທີ່ສຳຄັນຂອງໄທ, ນັກວິສາຫະກິດທີ່ມີຊື່ສຽງຈຳນວນໜຶ່ງກໍໄດ້ເຂົ້າຮ່ວມເຊັ່ນດຽວກັນ.
ງານວາງສະແດງສິນຄ້າຈີນ-ອາຊຽນຄັ້ງທີ 13 ຈະຈັດຂຶ້ນຢູ່ເມືອງນານນິງເຂດປົກຄອງຕົນເອງເຜົ່າຈວ້າງກວາງຊີ ສປ ຈີນແຕ່ວັນທີ 11 ຫາວັນທີ 14 ກັນຍາປີນີ້. ປັດຈຸບັນມີ 65 ຄະນະແລະອົງການຈັດຕັ້ງຈາກປະເທດໃນອາຊຽນແຈ້ງເຈດຈຳນົງເຂົ້າຮ່ວມແລະຄາດວ່າຈະມີປະເທດນອກພາກພື້ນ 31 ປະເທດເຂົ້າຮ່ວມງານວາງສະແດງ. ຂະນະທີ່ມາຮອດທ້າຍເດືອນພຶດສະພາປີນີ້, ການລົງທຶນລະຫວ່າງຈີນ-ອາຊຽນໄດ້ມີມູນຄ່າຫຼາຍກວ່າ 160 ຕື້ໂດລາສະຫະລັດ ເຊິ່ງອາຊຽນໄດ້ກາຍເປັນຈຸດໝາຍປາຍທາງທີ່ສຳຄັນຂອງນັກທຸລະກິດຈີນໃນການໄປລົງທຶນຢູ່ຕ່າງປະເທດ.