ວັນທີ 12 ສິງຫານີ້,ທ່ານຈັກທິບ ໄຊຈິນດາ ຜູ້ບັນຊາການຕຳຫຼວດແຫ່ງຊາດໄທກ່າວວ່າ: ເຫດການໂຈມຕີດ້ວຍການລະເບີດທີ່ເກີດຂຶ້ນຢ່າງລຽນຕິດອາດຈະມີສ່ວນກ່ຽວພັນເຖິງການປ່ອນບັດທົ່ວປວງຊົນກ່ຽວກັບຮ່າງລັດຖະທຳມະນູນສະບັບໃໝ່, ເພາະວ່າຈັງຫວັດທີ່ໄດ້ເກີດເຫດການລະເບີດລ້ວນແຕ່ໄດ້ສະໜັບສະໜູນການຮັບຮອງຮ່າງລັດຖະທຳມະນູນສະບັບໃໝ່ໃນການປ່ອນບັດ.
ແຕ່ວັນທີ 11 ຫາວັນທີ 12 ສິງຫານີ້,ໄດ້ເກີດເຫດການລະເບີດຢູ່ຫຼາຍຈັງຫວັດທາງພາກໃຕ້ໄທ,ເຮັດໃຫ້ເສຍຊີວິດຢ່າງໜ້ອຍ 4 ຄົນ,ຫຼາຍສິບຄົນໄດ້ຮັບບາດເຈັບ. ເຈົ້າໜ້າທີ່ຕຳຫຼວດໄທໄດ້ຢືນຢັນວ່າເຫດການລະເບີດເຫຼົ່ານີ້ບໍ່ແມ່ນການໂຈມຕີແບບກໍ່ການຮ້າຍ,ແລະກ່າວວ່າ ຜູ້ຕ້ອງຫາສອງຄົນທີ່ໄດ້ຖືກຈັບຕົວນັ້ນບໍ່ມີສ່ວນກ່ຽວພັນເຖິງອິດທິກຳລັງແບ່ງແຍກທີ່ຢູ່ພາກໃຕ້ໄທ.
ວັນທີ 7 ສິງຫານີ້,ໄທໄດ້ຈັດການປ່ອນບັດທົ່ວປວງຊົນກ່ຽວກັບຮ່າງລັດຖະທຳມະນູນສະບັບໃໝ່. ຮ່າງລັດຖະທຳມະນູນສະບັບດັ່ງກ່າວໄດ້ຮັບການຮັບຮອງ,ແລະຈະໃຊ້ແທນລັດຖະທຳມະນູນຊົ່ວຄາວທີ່ໄດ້ຮັບການນຳໃຊ້ພາຍຫຼັງລັດຖະປະຫານປີ 2014, ເນື້ອໃນໃຈກາງແລະຈິດໃຈຂອງຮ່າງລັດຖະທຳມະນູນສະບັບໃໝ່ໄດ້ສ່ອງແສງໃຫ້ເຫັນການອອກແບບຂອງລັດຖະບານປຣະຍຸດ ຈັນໂອຊາທີ່ມີຕໍ່ລະບົບການເລືອກຕັ້ງແລະໂຄງປະກອບການເມືອງຂອງໄທໃນອະນາຄົດ.
ວັນທີ 12 ສິງຫານີ້, ທ່ານບັນກີມູນ ເລຂາທິການໃຫຍ່ອົງການສະຫະປະຊາຊາດໄດ້ອອກຖະແຫຼງການໂດຍຜ່ານໂຄສົກ ໂດຍໄດ້ກ່າວປະນາມເຫດການລະເບີດທີ່ເກີດຂຶ້ນຢູ່ຫຼາຍແຫ່ງຂອງໄທ, ແລະຫວັງວ່າຈະລົງໂທດຜູ້ກໍ່ເຫດການໂດຍໄວເທົ່າທີ່ຈະໄວໄດ້.