ວັນທີ 11 ສິງຫານີ້, ຢູ່ນະຄອນຫຼວງເນບີດໍ, ທ່ານນາງອອງຊານຊູຈີ, ປະທານສະຫະພັນປະຊາທິປະໄຕແຫ່ງຊາດມຽນມາ, ທີ່ປຶກສາວຽກງານແຫ່ງລັດມຽນມາ ໄດ້ພົບປະກັບທ່ານຊົ້ງທ່າວ ຫົວໜ້າຄະນະພົວພັນຕ່າງປະເທດສູນກາງພັກກອມມູນິດຈີນ.
ທ່ານຊົ້ງທ່າວກ່າວວ່າ, ປະຊາຊົນຈີນກັບປະຊາຊົນມຽນມາມີໄມຕີຈິດມິດຕະພາບທີ່ເລິກເຊິ່ງປານອ້າຍກັບນ້ອງ, ການຂະຫຍາຍການພົວພັນມິດຕະພາບລະຫວ່າງຈີນກັບມຽນມາສອດຄ່ອງກັບຜົນປະໂຫຍດພື້ນຖານຂອງສອງປະເທດ. ຈີນສະໜັບສະໜູນມຽນມາເດີນຕາມເສັ້ນທາງພັດທະນາທີ່ສອດຄ່ອງກັບສະພາບແຫ່ງຊາດຂອງປະເທດຕົນ, ຍິນດີອຳນວຍຄວາມຊ່ວຍເຫຼືອໃຫ້ແກ່ມຽນມາໃນການພັດທະນາແລະການຮັກສາຄວາມໝັ້ນຄົງ. ຫວັງວ່າ, ພັກກຳອຳນາດຂອງສອງປະເທດຈະເພີ່ມທະວີການແລກປ່ຽນແລະການຮ່ວມມື, ຊຸກຍູ້ໃຫ້ການພົວພັນລະຫວ່າງສອງປະເທດຂະຫຍາຍຕົວດີກວ່າເກົ່າ.
ທ່ານນາງອອງຊານຊູຈີກ່າວວ່າ, ມຽນມາເອົາໃຈໃສ່ໃນລະດັບສູງນຳການຂະຫຍາຍການພົວພັນລະຫວ່າງມຽນມາກັບຈີນ, ຄອງຄອຍຈະເດີນທາງໄປຢ້ຽມຢາມຈີນໃນໄວໆນີ້ ແລະຈະຍົກສູງລະດັບການຮ່ວມມືມິດຕະພາບລະຫວ່າງສອງປະເທດຕື່ມອີກ. ສະຫະພັນປະຊາທິປະໄຕຍິນດີລົງເລິກການໄປມາຫາສູ່ກັນກັບພັກກອມມູນິດຈີນ, ເພີ່ມຄວາມໄວ້ເນື້ອເຊື່ອໃຈແລະການຮ່ວມມືຢ່າງບໍ່ຢຸດຢັ້ງ.