ເວັບໄຊກະຊວງການຕ່າງປະເທດຈີນລາຍງານວ່າ: ໃນວັນທີ 15-16 ສິງຫານີ້ຢູ່ເມືອງໝັ້ນໂຈ່ວລີ, ຈີນແລະບັນດາປະເທດໃນອາຊຽນໄດ້ຮ່ວມກອງປະຊຸມເຈົ້າໜ້າທີ່ອາວຸໂສກ່ຽວກັບການປະຕິບັດ "ຖະແຫຼງການແຫ່ງການປະພຶດຂອງບັນດາຝ່າຍໃນທະເລຈີນໃຕ້" ຄັ້ງທີ 13 ແລະກອງປະຊຸມໜ່ວຍງານປະສົມຄັ້ງທີ 18.
ກອງປະຊຸມເທື່ອນີ້ໄດ້ຈັດຂຶ້ນຫຼັງກອງປະຊຸມລັດຖະມົນຕີຕ່າງປະເທດຈີນ-ອາຊຽນແລະກ່ອນກອງປະຊຸມສຸດຍອດຈີນ-ອາຊຽນໂດຍຜູ້ເຂົ້າຮ່ວມໄດ້ປຶກສາຫາລືກ່ຽວກັບການຈັດຕັ້ງປະຕິບັດ "ຖະແຫຼງການແຫ່ງການປະພຶດຂອງບັນດາຝ່າຍໃນທະເລຈີນໃຕ້" ຢ່າງຮອບດ້ານແລະມີປະສິດທິຜົນກໍຄືປຶກສາຫາລື "ກົດລະບຽບແຫ່ງການປະພຶດຢູ່ທະເລຈີນໃຕ້" ແລະຫົວຂໍ້ອື່ນໆຢ່າງເລິກເຊິ່ງແລະໄດ້ຮັບໝາກຜົນຢ່າງຕັ້ງໜ້າ.
ໂອກາດດັ່ງກ່າວ, ຝ່າຍຕ່າງໆໄດ້ກ່າວຢ້ຳຈະແກ້ໄຂຄວາມຂັດແຍ້ງກັນຢ່າງເໝາະສົມທັງເພີ່ມທະວີຄວາມໄວ້ເນື້ອເຊື່ອໃຈກັນແລະກຳຈັດສິ່ງກີດຂວາງເພື່ອສຸມໃສ່ສ້າງທະເລຈີນໃຕ້ເປັນທະເລແຫ່ງສັນຕິພາບ, ມິດຕະພາບແລະການຮ່ວມມື. ນອກນີ້, ຍັງຍິນດີຖືເອົາກອງປະຊຸມສຸດຍອດເພື່ອລະນຶກຈີນ-ອາຊຽນສ້າງຕັ້ງສາຍພົວພັນຄູ່ເຈລະຈາຄົບຮອບ 25 ປີເປັນໂອກາດ, ລົງເລິກການຮ່ວມມື ເພື່ອຊຸກຍູ້ສາຍພົວພັນຄູ່ຮ່ວມຍຸດທະສາດຮອບດ້ານລະຫວ່າງຈີນ-ອາຊຽນໃຫ້ໄດ້ຮັບການພັດທະນາກ້າວຂຶ້ນສູ່ລະດັບໃໝ່.
 |
