ວັນທີ 17 ສິງຫານີ້, ທ່ານ ປະຕຣິກ ຮິກກີ ຊາວອຽກລັງ ອາຍຸ 71 ປີທີ່ ເປັນປະທານຄະນະກຳມະການໂອລິມປິກເອີຣົບໄດ້ຖືກຈັບຢູ່ຣິໂອປະເທດເບຣຊິນຫຼັງຖືກສົງໄສວ່າມີສ່ວນຮ່ວມຂາຍປີ້ເຂົ້າຊົມການແຂ່ງຂັນຢ່າງຜິດກົດໝາຍໂອລິມປິກ. ບໍລິສັດກະຈາຍສຽງອັງກິດຫຼື BBC ກ່າວວ່າ: ທ່ານ ຮິກກີ ໄດ້ເປັນຄະນະກຳມະການໂອລິມປິກອຽກລັງແຕ່ປີ 1989 ເປັນຕົ້ນມາ ທັງໄດ້ຮັບເລືອກຕັ້ງເປັນປະທານຄະນະກຳມະການໂອລິມປິກເອີຣົບໃນປີ 2006 ແລະເປັນກຳມະການປະຕິບັດງານຂອງຄະນະກຳມະການໂອລິມປິກສາກົນ ປີ 2012 ເຊິ່ງການຈັບກຸມດັ່ງກ່າວເປັນຜົນຈາກເຈົ້າໜ້າທີ່ຕຳຫຼວດເບຣຊິນເກີດຄວາມສົງໄສທ່ານ ຮິກກີ ທີ່ໄດ້ວາງອຸບາຍຢ່າງລັບແລະຊ່ວຍການຂາຍປີ້ເຂົ້າຊົມຢ່າງຜິດກົດໝາຍ.
ໜັງສືພິມ The independent ຂອງອັງກິດລາຍງານວ່າ: ປັດຈຸບັນ, ເຈົ້າໜ້າທີ່ຕຳຫຼວດເບຣຊິນພວມດຳເນີນການສືບສວນ-ສອບສວນບັນຫາປີ້ເຂົ້າຊົມໂອລິມປິກຣິໂອ 800 ໃບ ເຊິ່ງປີ້ມືສອງເຫຼົ່ານີ້ຖືກຂາຍດ້ວຍລາຄາແພງ. ຂ່າວແຈ້ງວ່າ: ຜູ້ຂາຍປີ້ເຫຼົ່ານີ້ໄດ້ມີສ່ວນກ່ຽວຂ້ອງກັບທ່ານ ແຄວິນ ມາລອນ ຊາວອຽກລັງທີ່ຮ່ວມກັບທ່ານ ຮິກກີ ເຂົ້າຮ່ວມພິທີໄຂ ຂະນະທີ່ວັນທີ 5 ສິງຫານີ້, ທ່ານ ມາລອນ ໄດ້ຖືກຮ້ອງຟ້ອງໃນຂໍ້ຫາຂາຍປີ້ເຂົ້າຊົມຢ່າງຜິດກົດໝາຍ ແລະຖືກຕຳຫຼວດຈັບໃນທີ່ສຸດ. ກ່ອນໜ້ານີ້, ທ່ານ ຮິກກີ ໄດ້ປະຕິເສດການມີສ່ວນພົວພັນກັບການຂາຍປີ້ຜິດກົດໝາຍດັ່ງກ່າວ.