ສື່ມວນຊົນລາວລາຍງານໃນວັນທີ 19 ສິງຫານີ້ວ່າ, ເນື່ອງຈາກໃນ 10 ເດືອນທຳອິດຂອງສົກປີ 2015-2016, ການເກັບລາຍຮັບການເງິນຂອງລັດຖະບານປະເທດຕົນໄດ້ບັນລຸພຽງແຕ່ 74,52% ຕາມແຜນການຂອງສະພາແຫ່ງຊາດ ສົ່ງຜົນເຮັດໃຫ້ການປະຕິບັດງົບປະມານປະສົບຄວາມຫຍຸ້ງຍາກແລະບໍ່ສາມາດຕອບສະໜອງ ຕາມຄວາມຕ້ອງການດ້ານລາຍຈ່າຍ.
ທ່ານ ສົມດີ ດວງດີ ຮອງນາຍົກລັດຖະມົນຕີທັງເປັນລັດຖະມົນຕີກະຊວງການເງິນ ສປປ ລາວ ໄດ້ກ່າວໃນກອງປະຊຸມວຽກງານງົບປະມານທີ່ຈັດຂຶ້ນຢູ່ນະຄອນ ຫຼວງວຽງຈັນໃນວັນທີ 17-19 ສິງຫານີ້ວ່າ, "ພວກເຮົາບໍ່ສາມາດບັນລຸເປົ້າໝາຍການສ້າງລາຍຮັບໃນ 10 ເດືອນຜ່ານມາ, ຈາກນີ້, ພາກສ່ວນການເງິນຈະຕ້ອງພະຍາຍາມປະຕິບັດນະໂຍບາຍແລະມາດກະການທີ່ກຳນົດໄວ້ຢ່າງເຂັ້ມງວດກວ່າເກົ່າໃນເວລາທີ່ເຫຼືອຂອງສົກປີນີ້." ຂະນະດຽວກັນກໍເນັ້ນຄວາມໂປ່ງໃສແລະຄວາມໜ້າເຊື່ອຖືໃນການເກັບລາຍຮັບກໍຄືການບໍລິຫານງົບປະມານ. ແນວໃດກໍດີ, ກະຊວງຕົນຈະສືບຕໍ່ຮຽກຮ້ອງໃຫ້ບໍລິສັດແລະລັດວິສາຫະກິດຕ່າງໆປະຕິບັດພັນທະການເງິນແລະພາສີອາກອນ.
ໜັງສືພິມ ວຽງຈັນທາມສ໌ ລາຍງານໃນວັນທີ 18 ສິງຫານີ້ວ່າ, ເພື່ອເພີ່ມລາຍຮັບການເງິນ, ກະຊວງການເງິນ ສປປ ລາວ ພວມພິຈາລະນາຍົກອັດຕາຄ່າອາກອນທີ່ດິນແລະການນຳໃຊ້ຫົນທາງໃຫ້ສູງຂຶ້ນທັງຍົກລະດັບແລະອຳນວຍຄວາມສະດວກໃຫ້ແກ່ວຽງການເກັບສ່ວຍສາອາກອນດ້ວຍການນຳໃຊ້ລະບົບຊຳລະສະສາງເອເລັກໂຕຣນິກ.