ຕາມຂ່າວ CRI: ທ່ານ ລູ້ຄ່າງ ໂຄສົກກະຊວງການຕ່າງປະເທດຈີນໄດ້ຖະແຫຼງ ຂ່າວໃນວັນທີ 22 ສິງຫານີ້ວ່າ, ພາຍຫຼັງ 3 ປະເທດຄືຈີນ, ຍີ່ປຸ່ນແລະ ສ.ເກົາຫຼີໄດ້ພິຈາລະນາແລ້ວກໍໄດ້ຕົກລົງຈັດກອງປະຊຸມລັດຖະມົນຕີຕ່າງປະເທດຄັ້ງທີ 8 ຢູ່ນະຄອນຫຼວງໂຕກຽວປະເທດຍີ່ປຸ່ນໃນວັນທີ 24 ສິງຫານີ້ໂດຍທ່ານ ຫວາງຢີ້ ລັດຖະມົນຕີກະຊວງການຕ່າງປະເທດຈີນຈະເຂົ້າຮ່ວມກອງປະຊຸມດັ່ງກ່າວຕາມຄຳເຊີນ.
ທ່ານ ລູ້ຄ່າງ ຍົກໃຫ້ເຫັນວ່າ, ໃນກອງປະຊຸມດັ່ງກ່າວ, ລັດຖະມົນຕີຕ່າງປະເທດຂອງ 3 ປະເທດຈະທົບທວນສະພາບຄວາມຄືບໜ້າຂອງການຮ່ວມມືລະຫວ່າງ 3 ປະເທດທັງຈະແລກປ່ຽນຄວາມຄິດຄວາມເຫັນຢ່າງເລິກເຊິ່ງກ່ຽວກັບທິດທາງການຮ່ວມມືໃນຕໍ່ໜ້າກໍຄືບັນຫາພາກພື້ນແລະສາກົນທີ່ສົນໃຈຮ່ວມກັນ. ແນວໃດກໍດີ, ຈີນຫວັງກອງປະຊຸມເທື່ອນີ້ຈະຮັກສາທ່ວງທ່າການພັດທະນາລະຫວ່າງ 3 ປະເທດ ທັງຊຸກຍູ້ຂະບວນການເຊື່ອມໂຍງກັນຂອງພາກພື້ນອາຊີຕາເວັນອອກ, ພະຍາຍາມບັນລຸເປົ້າໝາຍການສ້າງປະຊາຄົມເສດຖະກິດອາຊີຕາເວັນອອກໃນປີ 2020 ໃຫ້ປະສົບຜົນສຳເລັດເພື່ອປະກອບສ່ວນເຂົ້າໃນສັນຕິພາບແລະການພັດທະນາກໍຄືຄວາມຈະເລີນຮຸ່ງເຮືອງຂອງພາກພື້ນນີ້ໃຫ້ໃຫຍ່ຫຼວງກວ່າເກົ່າ.