ແຫຼ່ງຂ່າວຈາກເວັບໄຊກະຊວງການຕ່າງປະເທດຈີນໃຫ້ຮູ້ວ່າ ມີນັກຂ່າວຕັ້ງຄຳຖາມໃນພິທີຖະແຫຼງຂ່າວທີ່ຈັດຂຶ້ນໃນວັນທີ 22 ສິງຫານີ້ ວ່າ: ທ່ານບາຣັກ ໂອບາມາ ປະທານາທິບໍດີອາເມລິກາຈະເດີນທາງຢ້ຽມຢາມລາວໃນເດືອນກັນຍາໜ້ານີ້, ຂະນະດຽວກັນກໍມີນັກວິຈານບາງຄົນເຫັນວ່າ, ອາເມລິກາຫວັງຜົນຕໍ່ການຢ້ຽມຢາມເທື່ອນີ້ເພື່ອຫຼຸດບົດບາດຂອງຈີນຕໍ່ລາວ. ຈີນມີຈຸດຢືນແນວໃດຕໍ່ເລື່ອງນີ້? ນອກນີ້, ຈີນເຫັນວ່າ ອາເມລິກາພັດທະນາການພົວພັນກັບລາວ, ຫວຽດນາມ ແລະ ມຽນມາໃນໄລຍະຜ່ານມານີ້ເພື່ອສະກັດກັ້ນບົດບາດຂອງຈີນທີ່ມີຕໍ່ພາກພື້ນອາຊີຕາເວັນອອກສຽງໃຕ້ ຫຼືບໍ່?
ຕໍ່ກັບຄຳຖາມດັ່ງກ່າວ, ທ່ານລູ້ຄ່າງ ໂຄສົກກະຊວງການຕ່າງປະເທດຈີນ ກ່າວວ່າ: ຂ້າພະເຈົ້າບໍ່ຮູ້ວ່ານັກວິຈານບາງຄົນທີ່ເຈົ້າເວົ້າມານັ້ນໝາຍເຖິງໃຜ. ທຳນຽບຂາວອາເມລິກາໄດ້ຖະແຫຼງຂ່າວກ່ຽວກັບທ່ານປະທານາທິບໍດີໂອບາມາຈະເດີນທາງຢ້ຽມຢາມຈີນແລະລາວແລ້ວ, ແຕ່ຂ້າພະເຈົ້າບໍ່ໄດ້ເຫັນເນື້ອໃນວິຈານທີ່ເຈົ້າເວົ້າມານັ້ນໃນຖະແຫຼງຂ່າວຂອງທຳນຽບຂາວອາເມລິກາ. ສຳລັບຈີນແລ້ວ, ພວກຂ້າພະເຈົ້າຍິນດີພັດທະນາການພົວພັນຢ່າງສ້າງສັນ ບໍ່ວ່າປະເທດໃດໆ ທັງໃນພາກພື້ນນີ້ ແລະ ນອກພາກພື້ນ ຂໍພຽງແຕ່ວ່າການພົວພັນແບບນີ້ມີຜົນດີຕໍ່ສັນຕິພາບ, ສະຖຽນລະພາບ ແລະ ຄວາມຈະເລີນຮຸ່ງເຮືອງຂອງພາກພື້ນນີ້ຢ່າງແທ້ຈິງ. ແນ່ນອນ, ອາດຈະມີບາງຄົນຫວັງຈະເຫັນການເກີດບາງເຫດການທີ່ຝຶນກັບຄວາມປາຖະໜາຂອງປະເທດໃນພາກພື້ນນີ້ ແລະຄວາມຄິດຂອງເຂົາແມ່ນຝືນກັບຄວາມປາຖະໜາຮ່ວມທີ່ສະແຫວງຫາສັນຕິພາບ ແລະ ການພັດທະນາຂອງປະເທດໃນພາກພື້ນນີ້.
