ບັນດາປະເທດໃນໂລກໝັ້ນໃຈຢ່າງເຕັມສ່ວນຕໍ່ສະພາບເສດຖະກິດແລະຄວາມສາມາດບົ່ມຊ້ອນດ້ານການພັດທະນາໃນອະນາຄົດຂອງຈີນ

ໃນກອງປະຊຸມຂ່າວທີ່ຈັດຂຶ້ນໃນວັນທີ 22 ສິງຫານີ້, ມີນັກຂ່າວຖາມວ່າ: ຕາມການລາຍງານໃຫ້ຮູ້ວ່າ: ທ່ານ ຊາລິສ ໂຄລິນສ໌ ອະດີດຜູ້ຊ່ວຍລັດຖະມົນຕີກະຊວງການເງິນອາເມລິກາໄດ້ກ່າວໃນໂອກາດໃຫ້ສຳພາດຕໍ່ນັກຂ່າວກ່ຽວກັບບັນຫາເສດຖະກິດຈີນຫວ່າງມໍ່ໆມານີ້ໂດຍກ່າວວ່າ: ຕົນຍຶດໝັ້ນທ່ວງທ່າທີ່ດີແລະສຸຂຸມຮອບຄອບຕໍ່ເສດຖະກິດຈີນ ຫຼັງເຫັນວ່າໃນ 10 ຫາ 20 ປີຕໍ່ໜ້າ, ເສດຖະກິດຈີນຈະເພີ່ມຂຶ້ນຢ່າງແຂງແຮງ. ຈີນມີຄຳເຫັນແນວໃດຕໍ່ເລື່ອງນີ້?

ທ່ານ ລູ້ຄ່າງ ໂຄສົກກະຊວງການຕ່າງປະເທດຈີນກ່າວໃນເລື່ອງນີ້ວ່າ: ໄດ້ເຫັນການລາຍງານຂ່າວທີ່ກ່ຽວຂ້ອງ ແລະ ກໍໄດ້ສັງເກດການຕີລາຄາຢ່າງພາວະວິໄສຈາກບັນດາປະເທດໃນໂລກຕໍ່ການພັດທະນາເສດຖະກິດຈີນໃນໄລຍະຜ່ານມາ ເຊິ່ງສະແດງໃຫ້ເຫັນວ່າ: ເຂົາເຈົ້າມີຄວາມໝັ້ນໃຈຢ່າງເຕັມສ່ວນຕໍ່ສະພາບເສດຖະກິດແລະຄວາມສາມາດບົ່ມຊ້ອນດ້ານການພັດທະນາໃນອະນາຄົດຂອງຈີນ.

ທ່ານ ລູ້ຄ່າງ ກ່າວຕື່ມວ່າ: ໃນຖານະເປັນປະເທດປະທານກຸ່ມ 20 ປະເທດຫຼື G20 ໃນປີນີ້, ຈີນຫວັງຈະສາມາດຮ່ວມມືກັບຝ່າຍຕ່າງໆ ສຸມໃສ່ບັນຫາພົ້ນເດັ່ນທີ່ສຳຄັນແລະໃຫຍ່ຫຼວງໃນການພັດທະນາເສດຖະກິດໂລກ, ຊຸກຍູ້ກຸ່ມ G20 ຂຸດຄົ້ນພະລັງແຮງໃໝ່ແຫ່ງການເຕີບໂຕໂດຍຜ່ານການປະດິດສ້າງໃໝ່ແລະການປະຕິຮູ ກໍຄືຊຸກຍູ້ເສດຖະກິດໂລກໃຫ້ເພີ່ມຂຶ້ນຢ່າງແຂງແຮງ,ຍືນຍົງແລະໝັ້ນທ່ຽງ.