ທ່ານຫວາງຢີ້ ລັດຖະມົນຕີກະຊວງການຕ່າງປະເທດຈີນ, ທ່ານຟູມີໂອ ກີຊີດະ ລັດຖະມົນຕີກະຊວງການຕ່າງປະເທດຍີ່ປຸ່ນ ແລະ ທ່ານຢຸນບິງເຊ ລັດຖະມົນຕີກະຊວງການຕ່າງປະເທດ ສ.ເກົາຫຼີ ໄດ້ເຂົ້າຮ່ວມກອງປະຊຸມລັດຖະມົນຕີຕ່າງປະເທດສາມປະເທດໃນວັນທີ 24 ສິງຫານີ້.
ທ່ານຫວາງຢີ້ ກ່າວວ່າ: ຈີນ, ຍີ່ປຸ່ນ ແລະ ສ.ເກົາຫຼີແມ່ນ 3 ກຸ່ມເສດຖະກິດໃຫຍ່ຢູ່ອາຊີຕາເວັນອອກ ຈຶ່ງມີຄວາມຮັບຜິດຊອບສຳຄັນໃນການຊຸກຍູ້ການພັດທະນາເສດຖະກິດອາຊີຕາເວັນອອກ, ນຳພາການຮ່ວມມືພາກພື້ນ ແລະປົກປັກຮັກສາສັນຕິພາບແລະສະຖຽນລະພາບຂອງພາກພື້ນ. ທັງສາມປະເທດຄວນຜ່ານຜ່າຄວາມຫຍຸ້ງຍາກ, ກຳຈັດສິ່ງກໍ່ກວນ, ສ້າງຄວາມຮັບຮູ້ທີ່ເປັນເອກະພາບກັນ ແລະ ສຸມໃສ່ການຮ່ວມມື ດ້ວຍຈິດໃຈທີ່ "ປະເຊີນກັບປະຫວັດສາດຢ່າງຖືກຕ້ອງ, ຫັນໜ້າສູ່ອະນາຄົດ" ເພື່ອຮັບປະກັນໃຫ້ການຮ່ວມມືລະຫວ່າງສາມປະເທດພັດທະນາໄປຕາມທິດທາງທີ່ຖືກຕ້ອງຢ່າງໝັ້ນທ່ຽງ.
ທ່ານຫວາງຢີ້ ກ່າວຕື່ມວ່າ: ຈີນຈະຈັດກອງປະຊຸມສຸດຍອດກຸ່ມ 20 ປະເທດ ຫຼື G20 ຢູ່ເມືອງຫັງໂຈ່ວ. ຂະນະທີ່ຈີນ, ຍີ່ປຸ່ນ ແລະ ສ.ເກົາຫຼີ ລ້ວນແຕ່ແມ່ນສະມາຊິກສຳຄັນຂອງ G20, ຈີນຍິນດີເພີ່ມທະວີການແລກປ່ຽນແລະຮ່ວມມືກັບຍີ່ປຸ່ນ ແລະ ສ.ເກົາຫຼີ ຊຸກຍູ້ກອງປະຊຸມສຸດຍອດເທື່ອນີ້ໃຫ້ເປັນກອງປະຊຸມທີ່ເສີມສ້າງຄວາມໝັ້ນໃຈ, ເຕົ້າໂຮມຄວາມຮັບຮູ້ທີ່ເປັນເອກະພາບກັນ ແລະ ຊີ້ທິດເຍືອງທາງ, ປະກອບສ່ວນຕາມທາງສົມຄວນເພື່ອຊຸກຍູ້ໃຫ້ເສດຖະກິດໂລກພັດທະນາ ແລະ ປັບປຸງການຄຸ້ມຄອງເສດຖະກິດໂລກໃຫ້ດີຂຶ້ນ.
ທ່ານ ຫວາງຢີ້ ກ່າວວ່າ: ເມື່ອທຽບໃສ່ເຂດອື່ນຢູ່ໃນໂລກແລ້ວ, ສະຖານະການຢູ່ອາຊີຕາເວັນອອກມີສັນຕິພາບໂດຍລວມ, ເສດຖະກິດໄດ້ເພີ່ມຂຶ້ນຢ່າງວ່ອງໄວ. ປະເທດອາຊີຕາເວັນອອກຄວນຊຸກຍູ້ຂະບວນການເຊື່ອມໂຍງເຂົ້າກັນ, ປົກປັກຮັກສາສະຖຽນລະພາບຂອງພາກພື້ນແລະການພັດທະນາຄວາມຈະເລີນຮຸ່ງເຮືອງ.
ທ່ານ ຟູມີໂອ ກີຊີດະ ແລະ ທ່ານ ຢຸນບຶງເຊ ກ່າວວ່າ: ການຮ່ວມມືລະຫວ່າງສາມປະເທດມີຜົນດີຕໍ່ການບັນລຸສັນຕິພາບ,ສະຖຽນລະພາບແລະຄວາມຈະເລີນຮຸ່ງເຮືອງຂອງພາກພື້ນນີ້ທັງມີຄວາມໝາຍສຳຄັນແລະໃຫຍ່ຫຼວງ. ໃນຕໍ່ໜ້າ, ສາມຝ່າຍຄວນເພີ່ມທະວີການຮ່ວມມືຕື່ມອີກ ເພື່ອເຮັດໃຫ້ ສາຍພົວພັນລະຫວ່າງສອງຝ່າຍໄດ້ຮັບການປັບປຸງໃຫ້ດີຂຶ້ນ. ຄວນເລັ່ງລັດຂະບວນການເຈລະຈາກ່ຽວກັບເຂດການຄ້າເສລີລະຫວ່າງສາມປະເທດ, ຊຸກຍູ້ການເຈລະຈາກ່ຽວກັບສັນຍາການພົວພັນຄູ່ຮ່ວມມືເສດຖະກິດຮອບດ້ານໃນພາກພື້ນໃຫ້ປະສົບຜົນສຳເລັດຕາມກຳນົດເວລາ. ຍີ່ປຸ່ນ ແລະ ສ.ເກົາຫຼີ ສະໜັບສະໜູນຈີນໃນການຈັດກອງປະຊຸມສຸດຍອດຫັງໂຈ່ວກຸ່ມ 20 ປະເທດຫຼື G20 ໃຫ້ດີ, ຍິນດີຮ່ວມກັນຊຸກຍູ້ກອງປະຊຸມໃຫ້ໄດ້ຮັບໝາກຜົນຢ່າງໃຫຍ່ຫຼວງ.