ໃນໂອກາດທີ່ກອງປະຊຸມສຸດຍອດ G20 ຈະຈັດຂຶ້ນຢູ່ເມືອງຫັງໂຈ່ວ ແຂວງເຈີ້ຈ່ຽງ ສປ ຈີນໃນເດືອນກັນຍາໜ້ານີ້, ເມື່ອມໍ່ໆນີ້, ສື່ມວນຊົນປາກິສະຖານໄດ້ໂພສບົດຄວາມຂອງທ່ານໂມຮາເມັດ ອາຣຊາດ ນັກຂຽນຄໍລຳທັງເປັນຜູ້ຟັງປາກິສະຖານຂອງວິທະຍຸສາກົນແຫ່ງປະເທດຈີນຫຼືCRIຢູ່ເວັບໄຊໂດຍບົດຄວາມດັ່ງກ່າວໄດ້ລະບຸວ່າ: ຫວັງໃຫ້ກອງປະຊຸມສຸດຍອດ G20ຈະສ້າງໂອກາດໃຫ້ໂລກຈະເລີນຮຸ່ງເຮືອງແລະມີສະຖຽນລະພາບຫຼາຍກວ່າເກົ່າ.
ທ່ານອາຣຊາດເຫັນວ່າ: ຈີນເປັນປະເທດທີ່ສາມາດຖອດຖອນເອົາບົດຮຽນທີ່ດີຈາກປະເທດຕ່າງໆຕະຫຼອດມາໂດຍສະເພາະການຮັບເອົາຂໍ້ສະເໜີຈາກປະເທດອື່ນ. ຈາກນີ້, ກອງປະຊຸມສຸດຍອດຫັງໂຈ່ວທີ່ຈະຈັດຂຶ້ນນີ້ຈະປະສົບຜົນສຳເລັດຢ່າງຈົບງາມຢ່າງແນ່ນອນ. ກອງປະຊຸມສຸດຍອດ G20 ໄດ້ເອົາໃຈໃສ່ສະພາບເສດຖະກິດໂລກຕະຫຼອດມາກໍຄືບັນຫາຕ່າງໆທີ່ຈະປຶກສາຫາລືໃນກອງປະຊຸມສຸດຍອດທີ່ຈະຈັດຂຶ້ນຢູ່ເມືອງຫັງໂຈ່ວໃນໄວໆນີ້ເຊັ່ນການພັດທະນາແບບຍືນຍົງ, ການຕ້ານການສໍ້ລາດບັງຫຼວງ,ການຄ້າຫຼາຍຝ່າຍ, ການຫຼຸດຜ່ອນຄວາມທຸກຍາກແລະການປະຕິຮູບລ້ວນແຕ່ມີຄວາມສຳຄັນຫຼາຍ. ນອກຈາກເສດຖະກິດແລ້ວກໍຄາດວ່າ, ກອງປະຊຸມສຸດຍອດຍັງຈະມີບົດບາດທີ່ດີໃນການສົ່ງເສີມສາຍພົວພັນລະຫວ່າງຈີນກັບປະເທດຕາເວັນຕົກ.
ທ່ານອາຣຊາດໃຫ້ທັດສະນະວ່າ: ໃນຖານະເປັນປະເທດໃກ້ຄຽງທີ່ມີໄມຕີຈິດມິດຕະພາບຂອງຈີນ, ປາກິສະຖານຫວັງໃຫ້ກອງປະຊຸມສຸດຍອດG20ຫັງໂຈ່ວທີ່ຈະຈັດຂຶ້ນປະສົບຜົນສຳເລັດ ແລະສ້າງໂອກາດທີ່ດີກວ່າເກົ່າເພື່ອສັນຕິພາບ,ສະຖຽນລະພາບຂອງໂລກແລະຄວາມຈະເລີນຮຸ່ງເຮືອງຂອງຄົນລຸນຫຼັງ.
