ວັນທີ26ສິງຫານີ້,ໃນກອງປະຊຸມຂ່າວທີ່ຈັດຂຶ້ນຢູ່ນະຄອນຫຼວງປັກກິ່ງ,ທ່ານລູ້ຄ່າງ,ໂຄສົກກະຊວງການຕ່າງປະເທດຈີນກ່າວວ່າ,ພາຍໃຕ້ການຊຸກຍູ້ຂອງຝ່າຍຈີນ,ກອງປະຊຸມG20ປີນີ້ ໄດ້ຈັດເອົາບັນຫາການພັທະນາໄວ້ຢູ່ຖານະອັນພົ້ນເດັ່ນໃນຂອບນະໂຍບາຍມະຫາພາກຂອງໂລກເປັນຄັ້ງທຳອິດ; ໄດ້ກຳນົດແຜນການດຳເນີນງານຢ່າງເປັນລະບົບໂດຍປິ່ນອ້ອມການຈັດຕັ້ງປະຕິບັດວາລະພັດທະນາແບບຍືນຍົງປີ2030ເປັນຄັ້ງທຳອິດ. ຫົວຂໍ້"ພັດທະນາແບບລວບລວມແລະເຊື່ອມໂຍງກັນ"ຈະຜະເຊີນໜ້າໂດຍກົງສູ່ບັນຫາການພັດທະນາແບບຍືນຍົງ, ຊຸກຍູ້ອົງກອນເສດຖະກິດຕ່າງໆກ້າວໜ້າພ້ອມກັນ, ຂະແໜງການຕ່າງໆຮ່ວມກັນພັດທະນາແບບຕ່າງຝ່າຍຕ່າງມີຜົນປະໂຫຍດ, ຊັ້ນຄົນຕ່າງໆຊົມໃຊ້ໝາກຜົນແຫ່ງການພັດທະນາພ້ອມກັນ,ເຊິ່ງຍ່ອມຈະກາຍເປັນຈຸດເດັ່ນໃນກອງປະຊຸມສຸດຍອດຄັ້ງນີ້.
ທ່ານລູ້ຄ່າງກ່າວຕື່ມອີກວ່າ,ໂດຍຮູບປະທຳແລ້ວ, ຝ່າຍຈີນຈະຊຸກຍູ້ໃຫ້ຈັດວາງແລະຈັດຕັ້ງປະຕິບັດແຜນການດຳເນີນງານກ່ຽວກັບວາລະການພັດທະນາແບບຍືນຍົງປີ2030, ນຳໃຊ້ການເຄື່ອນໄຫວລວມໝູ່ແລະບັນດາປະເທດຕ່າງຫາກ, ໃນຂະນະດຽວກັນທີ່ຕັ້ງໜ້າຊຸກຍູ້ວຽກງານຢູ່ປະເທດຕົນນັ້ນ,ທັງໃຫ້ການສະໜັບສະໜູນແກ່ປະເທດພວມພັດທະນາອື່ນໆ, ໃຊ້ການກະທຳຕົວຈິງເພື່ອປະກອບສ່ວນເຂົ້າໃນວຽກງານຫຼັກຂອງສະຫະປະຊາຊາດ. ຈີນຈະວາງຂໍ້ລິເລີ່ມ ການຮ່ວມມືເພື່ອສະໜັບສະໜູນອາຟຼິກາແລະປະເທດດ້ອຍພັດທະນາທີ່ສຸດໃຫ້ຫັນເປັນອຸດສາຫະກຳ, ຊ່ວຍເຫຼືອປະເທດເຫຼົ່ານີ້ເລັ່ງລັດພັດທະນາອຸດສາຫະກຳ, ບັນລຸເປົ້າໝາຍດ້ານການຫຼຸດຜ່ອນຄວາມທຸກຍາກແລະພັດທະນາແບບຍືນຍົງ. ຈີນຍັງຈະປຶກສາຫາລືບັນຫາກະສິກຳ, ການປະກອບອາຊີບແລະການຄ້າແບບລວບລວມຢ່າງກວ້າງຂວາງ, ເອົາໃຈໃສ່ບັນຫາແມ່ຍິງ,ຊາວໜຸ່ມແລະກະສິກຳຂະໜາດນ້ອຍ, ຊຸກຍູ້ການປະດິດສ້າງໃໝ່ດ້ານກະສິກຳແລະການພັດທະນາແບບຍືນຍົງ, ຄົ້ນຄວ້າການພົວພັນລະຫວ່າງການປັບປຸງນະໂຍບາຍມະຫາພາກກັບການເປີດກວ້າງການປະກອບອາຊີບ, ສົ່ງເສີມໃຫ້ສ້າງໂອກາດປະກອບອາຊີບດ້ວຍການສ້າງທຸລະກິດໃໝ່.
 |
