ວັນທີ 26 ສິງຫານີ້, ໃນເວລາໃຫ້ສຳພາດຕໍ່ນັກຂ່າວຢູ່ສຳນັກງານໃຫຍ່ສະຫະປະຊາຊາດທີ່ນິວຢອກ, ທ່ານບັນກີມູນ ເລຂາທິການໃຫຍ່ສະຫະປະຊາຊາດໄດ້ຍົກຍ້ອງຄວາມສາມາດການນຳພາທີ່ດີເດັ່ນຂອງຈີນໃນການກະກຽມເປັນເຈົ້າພາບຈັດກອງປະຊຸມສຸດຍອດ G20 ຢູ່ຫັງໂຈ່ວ, ໂດຍເຫັນວ່າຄວາມພະຍາຍາມຂອງຈີນໃນຖານະເປັນປະເທດປະທານໄດ້ນ " ຍົກສູງລັກສະນະເປີດກວ້າງຂອງກອງປະຊຸມສຸດຍອດ G20 ຂຶ້ນສູ່ລະດັບໃໝ່ ".
ກອງປະຊຸມສຸດຍອດ G20 ຄັ້ງທີ 11 ຈະຈັດຂຶ້ນຢູ່ເມືອງຫັງໂຈ່ວ ແຂວງເຈີ້ຈ່ຽງຂອງຈີນແຕ່ວັນທີ 4 ຫາວັນທີ 5 ກັນຍາທີ່ຈະມາເຖິງ, ທ່ານບັນກີມູນຈະເຂົ້າຮ່ວມກອງປະຊຸມຕາມຄຳເຊີນ. ໃນເວລາໃຫ້ສຳພາດຕໍ່ສື່ມວນຊົນຈີນໃນວັນທີ 26 ສິງຫານີ້, ທ່ານກ່າວວ່າ, ທ່ານຮູ້ສຶກດີໃຈທີ່ຈະໄດ້ເຂົ້າຮ່ວມກອງປະຊຸມສຸດຍອດ G20 ຫັງໂຈ່ວ, ນີ້ແມ່ນທ່ານຢ້ຽມຢາມຈີນເປັນເທື່ອທີ 2 ໃນປີນີ້, ທັງເປັນການຢ້ຽມຢາມຈີນເທື່ອທີ 11 ໃນຖານະເປັນເລຂາທິການໃຫຍ່ສະຫະປະຊາຊາດ.
ວັນທີ 31 ທັນວາປີນີ້, ອາຍຸການຕຳແໜ່ງເລຂາທິການໃຫຍ່ສະຫະປະຊາຊາດຂອງທ່ານຈະສິ້ນສຸດລົງ. ກອງປະຊຸດສຸດຍອດຫັງໂຈ່ວຈະເປັນເທື່ອສຸດທ້າຍທີ່ທ່ານເຂົ້າຮ່ວມກອງປະຊຸມສຸດຍອດ G20 ໃນຖານະເປັນເລຂາທິການໃຫຍ່ສະຫະປະຊາຊາດ. ທ່ານກ່າວວ່າ, ຫວັງໃຫ້ຝ່າຍຕ່າງໆທີ່ເຂົ້າຮ່ວມກອງປະຊຸມສຸດຍອດຄັ້ງນີ້ຈະພະຍາຍາມເພື່ອຮັບມືກັບບັນຫາການປ່ຽນແປງຂອງດິນຟ້າອາກາດທົ່ວໂລກແລະບັນລຸເປົ້າໝາຍການພັດທະນາແບບຍຶນຍົງຂອງໂລກ.
