ຕອນບ່າຍວັນທີ 27 ສິງຫານີ້, ຄະນະຜູ້ແທນນັກກິລາດີເດັ່ນຂອງແຜ່ນດິນໃຫຍ່ຈີນທີ່ໄດ້ເຂົ້າຮ່ວມງານກິລາໂອແລມປິກຣີໂອໄດ້ເຂົ້າຮ່ວມງານລ້ຽນທີ່ຈັດໂດຍອົງການປົກຄອງເຂດບໍລິຫານພິເສດຮົງກົງຈີນ, ທັງໄດ້ພົບປະກັບບຸກຄົນວົງການຕ່າງໆຂອງຮົງກົງ.
ທ່ານລຽງເຈິ້ນຢິ່ງ ຜູ້ວ່າການເຂດບໍລິຫານພິເສດຮົງກົງ, ທ່ານລິນເຈິ້ງຢົ້ວເອີ ຫົວໜ້າກົມວຽກງານການເມືອງຮົງກົງ, ທ່ານລິວເພິງ ຫົວໜ້າກົມໃຫຍ່ກິລາແຫ່ງຊາດຈີນ, ທ່ານຮົ້ວເຈິ້ນທິງ ປະທານສະມາຄົມກິລາຮົງກົງທັງເປັນປະທານຄະນະກຳມະການໂອແລມປິກຮົງກົງຮ່ວມກັບນັກກິລາດີເດັ່ນແຜ່ນດິນໃຫຍ່ຈີນໄດ້ເຂົ້າຮ່ວມງານລ້ຽງດັ່ງກ່າວ.
ໂອກາດກ່າວປາໄສໃນງານລ້ຽງ, ທ່ານລຽງເຈິ້ນຢິ່ງກ່າວວ່າ, ງານລ້ຽງຕ້ອນຮັບທີ່ຈັດຂຶ້ນມື້ນີ້ໄດ້ສະແດງໃຫ້ເຫັນວ່າວົງການຕ່າງໆຂອງຮົງກົງຍິນດີຕ້ອນຮັບແລະເອົາໃຈໃສ່ຕໍ່ຄະນະຜູ້ແທນນັກກິລາດີເດັ່ນທີ່ໄດ້ເຂົ້າຮ່ວມງານກິລາໂອແລມປິກຣີໂອເດີນທາງມາຢ້ຽມຢາມຮົງກົງ, ທັງສະແດງຄວາມຂອບໃຈຂອງພວກຂ້າພະເຈົ້າຕໍ່ຄະນະຜູ້ແທນທີ່ມາຢ້ຽມຢາມ. ໃນໄລຍະງານກິລາໂອແລມປິກຣີໂອ, ຊາວເມືອງຮົງກົງທີ່ມີສາຍເລືອດດຽວກັນກັບນັກກິລາຈີນ, ນັ້ນໄດ້ສົ່ງກຳລັງແຮງໃຈແລະຮ້ອງໂຮຊົມເຊີຍໃຫ້ນັກກິລາຈີນ. ນັກກິລາທິມແຫ່ງຊາດຈີນໄດ້ຮັບຜົນງານດີເດັ່ນໃນຫຼາຍລາຍການຂອງງານກິລາໂອແລມປິກຣີໂອ.
ທ່ານລຽງເຈິ້ນຢິ່ງກ່າວວ່າ, ອົງການປົກຄອງເຂດບໍລິຫານພິເສດຮົງກົງຈະ ຍົກລະດັບສິ່ງກໍ່ສ້າງແລະອຸປະກອບ, ເພີ່ມທະວີການຮ່ວມມືລະຫວ່າງວົງການກິລາ, ໂຮງຮຽນກັບທົ່ວສັງຄົມເພື່ອເຜີຍແຜ່ກິລາໃນທົ່ວຮົງກົງ, ລຳລຸງກໍ່ສ້າງນັກກິລາດີເດັ່ນແລະຈັດງານມະຫະກຳກິລາຢ່າງຍິ່ງໃຫຍ່. ທ່ານລຽງເຈິ້ນຢິ່ງຫວັງໃຫ້ວົງການກິລາຮົງກົງເພີ່ມທະວີການຮ່ວມມືກັບວົງການກິລາແຜ່ນດິນໃຫຍ່, ເຮັດໃຫ້ນັກກິລາສອງແຫ່ງຮໍ່າຮຽນເຊິ່ງກັນແລະກັນແລະຖອດຖອນບົດຮຽນ.
ການສະແດງສາທິດທີ່ໜ້າປະທັບໃຈພາຍໃຕ້ຫົວຂໍ້ "ນັກກິລາດີເດັ່ນຂອງງານ ໂອແລມປິກຣີໂອສະແດງຄວາມສາມາດ" ແລະ "ນັກກິລາດີເດັ່ນງານໂອແລມປິກຣີໂອນັດກັບທ່ານ" ໄດ້ຈັດຂຶ້ນໃນວັນທີ 28 ສິງຫານີ້, ຊາວເມືອງຮົງກົງໄດ້ຊື່ນຊົມຄວາມຍອດຢ້ຽມດ້ານກິລາຂອງນັກກິລາດີເດັ່ນດັ່ງກ່າວ.