ວັນທີ 29 ສິງຫານີ້ຕາມເວລາທ້ອງຖິ່ນ ຢູ່ນະຄອນຫຼວງວໍຊິງຕັນຂອງອາເມລິກາ, ທ່ານ ເບັນ ໂຣເດີສ໌ ຮອງຜູ້ຊ່ວຍວຽກງານດ້ານຄວາມໝັ້ນຄົງແຫ່ງຊາດຂອງປະທານາທິບໍດີອາເມລິກາໄດ້ກ່າວກ່ຽວກັບທ່ານ ບາຣັກ ໂອບາມາ ປະທານາທິບໍດີອາເມລິກາທີ່ຈະໄປຢ້ຽມຢາມອາຊີວ່າ: ການພົບປະເຈລະຈາລະຫວ່າງທ່ານ ສີຈິ້ນຜິງ ປະທານປະເທດຈີນກັບທ່ານ ບາຣັກ ໂອບາມາ ປະທານາທິບໍດີອາເມລິກາຮອບໃໝ່ທີ່ຈະຈັດຂຶ້ນຢູ່ເມືອງຫັງໂຈ່ວແຂວງເຈີ້ຈ່ຽງຈີນໃນຫຼາຍຫົວຂໍ້ທີ່ກວ້າງຂວາງນັ້ນ ຈະຊ່ວຍຊຸກຍູ້ການຮ່ວມມືລະຫວ່າງສອງປະເທດພ້ອມທັງແກ້ໄຂຄວາມເຫັນຕ່າງກັນໃນບາງຂົງເຂດ.
ທ່ານ ເບັນ ໂຣເດີສ໌ ກ່າວວ່າ: ຜູ້ນຳຂອງສອງປະເທດຈະທົບທວນຄືນຄວາມຄືບໜ້າການຮ່ວມມືທີ່ສອງຝ່າຍບັນລຸຫຼາຍດ້ານເຊັ່ນ: ເສດຖະກິດໂລກ, ການຮັບມືກັບການປ່ຽນແປງຂອງດິນຟ້າອາກາດ, ການສະກັດກັ້ນການແຜ່ລະບາດອາວຸດນິວເຄລຍຕາມສັນຍາວ່າດ້ວຍການຕ້ານອາວຸດນິວເຄລຍຂອງອີຣານ, ບັນຫານິວເຄລຍຂອງແຫຼມເກົາຫຼີ ແລະຫົວຂໍ້ປະຊຸມອື່ນໆ, ນອກນີ້ຍັງຈະຫາລືບັນຫາຄວາມໝັ້ນຄົງດ້ານເຄືອຂ່າຍອິນເຕີເນັດແລະອື່ນໆ. ຂະນະດຽວກັນ, ທ່ານ ບາຣັກ ໂອບາມາ ຈະເຂົ້າຮ່ວມງານລ້ຽງຄ່ຳທີ່ຈີນເປັນເຈົ້າພາບຈັດຂຶ້ນ.
ທ່ານ ເບຣັນ ດິຊີ ທີ່ປຶກສາຂັ້ນສູງຂອງປະທານາທິບໍດີອາເມລິກາກ່າວວ່າ: ການພົບປະລະຫວ່າາງທ່ານ ສີຈິ້ນຜິງ ກັບ ທ່ານ ບາຣັກ ໂອບາມາຢູ່ເມືອງຫັງໂຈ່ວຈະເນັ້ນການທີ່ອາເມລິກາແລະຈີນຊ່ວຍຊຸກຍູ້ໃຫ້ສັນຍາປາຣີເລີ່ມມີຜົນບັງຄັບໃຊ້ໂດຍໄວ. ໃນຊຸມປີຜ່ານມາ, ການຮ່ວມມືລະຫວ່າງອາເມລິກາ-ຈີນໄດ້ກາຍເປັນໜຶ່ງໃນພະລັງຊຸກຍູ້ທີ່ສຳຄັນທີ່ສຸດໃນການຮັບມືກັບການປ່ຽນແປງຂອງດິນຟ້າອາກາດໂລກ ແລະກໍຫວັງວ່າການພົບປະຄັ້ງນີ້ສາມາດສືບຕໍ່ກ້າວເຖິງຂັ້ນມີຄວາມຮັບຮູ້ຮ່ວມກັນກ່ຽວກັບການຮ່ວມມືລັກສະນະນີ້.
 |
